မိူဝ်ႈဝၼ်းတီႈ 16/12/2020 ၵႅမ်ၽူႈၵွၼ်းတိူင်းသိုၵ်း ယလၶ ၶူဝ်လမ် ဢိၵ်ႇပႃး ၵူၼ်းသိုၵ်းၵမ်ႈၽွင်ႈ ပႃးၵွင်ႈၸေးမိုဝ်း သေ ၵႂႃႇႁၢမ်ႈ ၵၢၼ်ၵေႃႇၵွင်းမူး တီႈလွႆဝဵင်း ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ယွၼ်ႉဝႃႈ ဢွင်ႈတီႈ လိၼ်ၸိူဝ်းၼၼ်ႉ ပဵၼ် ၼႂ်းလိၼ်တပ်ႉသိုၵ်းမၢၼ်ႈ ဝႃႈၼႆ။

ၸဝ်ႈတူၼ်ၶူးလူင် Dr. ပၺ်ႇၺႃႇၼၼ်ႇတ (ဢၵ်ႉၵမႁႃႇပၼ်ႇတိတ) ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆး ၵႅမ်ႁူဝ်ပဝ်ႈသင်ႇၶမႁႃႇၼႃႇယၵၸိုင်ႈမိူင်း ဝတ်ႉထၢတ်ႈတေႃႇ ဝဵင်းလွႆလႅမ် လၢတ်ႈဝႃႈ – “ၵႅမ်ၽူႈၵွၼ်းတိူင်းသိုၵ်းၶူဝ်လမ်မႃး ဝႃႈ  ဢွင်ႈတီႈလိၼ်ၼႆႉတေႁဵတ်းတပ်ႉထႅင်ႈလႄႈ တေဢမ်ႇပၼ်သိုပ်ႇၵေႃႇၵွင်းမူး။ ၵူၺ်းၵႃႈ ဢၼ်ၸဝ်ႈ သြႃႇၶဝ်တိုၵ်ႉ ၵေႃႇဝႆႉၼႆႉၵေႃႈ တေဢမ်ႇပၼ်ယဝ်ႉလၢႆ။ ႁဝ်းၶႃႈၶဝ်တေသိုပ်ႇၵေႃႇၵႂႃႇၼႆ ပွင်ႇဝႃႈ ၶဝ်တေဢဝ်ႁဵတ်းၵွင်းမူးၼႂ်းတပ်ႉၶဝ် ၼၼ်ႉၼႃႇ ။  တၢင်းလိၵ်ႈ တၢင်းလၢႆးတႄႉ ၶဝ်ဢမ်ႇဝႃႈႁိုဝ်မႃး”- ဝႃႈၼႆ။

ဢိင်ၼိူဝ်လွင်ႈတီႈလိၼ်ၼႆႉသေ ယူႇတီႈၸဝ်ႈတူၼ်ၶူးလူင် ပၺ်ႇၺႃႇၼၼ်ႇတ ထၢတ်ႇတေႃႈလွႆလႅမ် လႆႈႁဵတ်းလိၵ်ႈသေ တၢင်ႇယွၼ်းဢဝ်ၶိုၼ်းႁႂ်ႈပဵၼ် တီႈလိၼ်သႃႇသၼႃႇမႃးၼႆႉ မီးလၢႆပွၵ်ႈလၢႆၵမ်းယဝ်ႉ ဝႃႈၼႆ။

“တီႈလိၼ်ၼႆႉ ႁဝ်းၸဝ်ႈ တၢင်ႇယွၼ်းလႆႈပွၵ်ႈယဝ်ႉ မိူဝ်ႈမိၼ်းဢွင်ႇလၢႆႇမႃးတီႈၵဵင်းတုင်ၼၼ်ႉ ႁဝ်းၸဝ်ႈၵႂႃႇထူပ်းမၼ်း တီႈဝတ်ႉ ဝၸီႇပိၵ်ႉသေ ၵမ်းၼႆႉ ၸဝ်ႈသြႃႇဝၸီႇပိၵ်ႉၵေႃႈ ၵပ်းသိုပ်ႇပၼ် ယၢမ်းလဵဝ်ၼႆႉ မၼ်းၸဝ်ႈတေႁဵတ်းၵွင်း မူး ၶူးဝႃးဝုၼ်းၸုမ်ႉ မၼ်းၸဝ်ႈတႅၵ်ႈဝႆႉတီႈလိၼ်ယဝ်ႉ။ ၵမ်းၼႆႉ မိၼ်းဢွင်ႇလႅင်ႇၵေႃႈဝႃႈ  40 ဢေႊၶိူဝ်ႊၼၼ်ႉႁႃႉ ။ ႁဵတ်းသင် ဝႆႉလၢႆလၢႆယဝ်ႉၼႆလႄႈ   ႁဝ်းလႆႈလၢတ်ႈဝႃႈႁဵတ်း ႁူင်းထမ်း၊ ၵျွင်းၸဝ်ႈၶူး ဝႃးၵိင်း၊ ၵျွင်းႁေႃးတြႃး၊ တီႈသုမ်းသွမ်း၊ ဢွင်ႈတီႈ မိုဝ်ႉႁုင် လႄႈ ၵေႃႇၵွင်းမူးဝႆႉတိၼ်မၼ်းယဝ်ႉ လၢတ်ႈၼႄၼင်ႇၼႆ။ မၼ်းၵေႃႈဝႃႈ – ၶႃႈတပႄး တေၸႂ်ႉၽူႈၵွၼ်း တိူင်းသိုၵ်းမိူဝ်းတူၺ်းသေ ႁဵတ်းပၼ်-  ဝႃႈမႃးၸိူင်ႉၼႆ။ ယူႇတီႈမိၼ်းဢွင်ႇလၢႆႇတႄႉ လၢတ်ႈတီႈၸဝ်ႈႁဝ်းဝႆႉမဵဝ်းၼႆႉ”-  ၸဝ်ႈတူၼ်ၶူးလူင် ပၺ်ႇၺႃႇၼၼ်ႇတ သပ်းလႅင်းလၢတ်ႈၼႄၼင်ႇၼႆ။

ဢွင်ႈတီႈလိၼ်ဢၼ်ပႃးၶဝ်ႈၵႂႃႇၼႂ်းတပ်ႉသိုၵ်းမၢၼ်ႈႁုပ်ႈဢဝ်ဝႆႉၼၼ်ႉ ပဵၼ်တီႈ လိၼ်ၶွင်ၵူၼ်းဝၢၼ်ႈၼွင်တဝ်းတင်း ဝၢၼ်ႈၼွင်ႁူး ယုၵ်ႉဢၢပ်ႈလူႇတၢၼ်းပၼ် တီႈၸဝ်ႈတူၼ်ၶူးလူင် Dr. ပၺ်ႇၺႃႇၼၼ်ႇတဝႆႉ။ ဢွင်ႈတီႈလိၼ်ၼၼ်ႉ တေၵေႃႇသၢင်ႈဝႆႉပၼ် ၸဝ်ႈသိလ်ထမ်းၶူးဝႃးပေႃႈဝုၼ်ႉၸုမ်ႉ တႃႇမႃးၵိင်း၊ မႃးလိုဝ်ႈ၊ မႃးမဵတ်ႉတႃႇ တြႃး လႄႈ တေသၢင်ႈ ၵွင်းမူးဝႆႉသူႇၼိုင်ႈ ၼႆယဝ်ႉ။ ယၢမ်းလဵဝ် တီႈဢၼ်သိုၵ်းမၢၼ်ႈမႃးႁၢမ်ႈၼႆႉ ၵျွင်းလႄႈႁွင်ႈမိုဝ်ႉ ဢၼ်ၵေႃႇ သၢင်ႈဝႆႉ ၼၼ်ႉ ၵေႃႈ ၶဝ်ႈႁူမ်ႈပႃး -လႆႈႁူႉၼင်ႇၼႆ။ 

“တီႈလွႆဝဵင်းၼႆႉ ၸဝ်ႈၶူးဝႃးဝုၼ်းၸုမ်ႉၵေႃႈၵျိူၵ်ႈဢိူဝ်ႈ တီႈၵႃႈၼႆႈ မၼ်းၸဝ်ႈမႃး  2 ပွၵ်ႈယဝ်ႉ။ မိူဝ်ႈၸဝ်ႈတိုၵ်ႉယူႇၼႂ်း ထမ်ႈၼႆႉၵေႃႈ ၵႆႉတႅမ်ႈလိၵ်ႈမႃးၸူး မီး 3 ၵမ်းယဝ်ႉ ၵွင်းမူးလွႆဝဵင်း ဢၼ်တီႈၸဝ်ႈသြႃႇထၢတ်ႈတေႃႇလူင် တေႁဵတ်းၼႆႉၵေႃႈ ႁႂ်ႈၸွႆႈၵၼ်ႁဵတ်းသၢင်ႈႁႂ်ႈမၼ်းယဝ်ႉသေ ႁႂ်ႈၸဵဝ်းလႆႈတၢင်ႇထီး ပေႃးဢွၵ်ႇထမ်ႈမႃး တေမိူဝ်းတၢင်ႇထီးပၼ် ၸဝ်ႈႁဝ်းတႄႉ ဝႃႈၼႆမႃးဝႆႉ” –  ၸဝ်ႈတူၼ်ၶူးလူင် Dr. ပၺ်ႇၺႃႇၼၼ်ႇတ ထၢတ်ႈတေႃႇလွႆလႅမ် သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ်လွင်ႈၼႆႉသေ တေသိုပ်ႇႁဵတ်းႁိုဝ်ၼႆၼၼ်ႉ ယူႇတီႈၸဝ်ႈတူၼ်ၶူးလူင် Dr. ပၺ်ႇၺႃႇၼၼ်ႇတတႄႉ လႆႈပွင်ႇၸူး တီႈၸဝ်ႈသြႃႇဝၸီႇပိၵ်ႉ ၵဵင်းတုင် ဝႆႉယဝ်ႉ ဝႃႈၼႆ။  

“ၵူၺ်းၵႃႈ တႃႇတေလႆႈၼႆႉ မၼ်းၵေႃႈ တေဢမ်ႇငၢႆႈယဝ်ႉ ပေႃးဝႃႈယူႇၼႂ်းတပ်ႉသိုၵ်း ၶဝ်ယဝ်ႉတႄႉ လိၼ်ႁဝ်းၵေႃး မီးဝႆႉ ယူႇတီႈၼိုင်ႈႁင်းၶေႃလႄႈ ႁဝ်းတေၶၢႆႉၵႂႃႇႁဵတ်းတီႈၼၼ်ႈဢဝ်ၵူၺ်းယဝ်ႉ ႁဝ်းၸဝ်ႈတႄႉ ယိူင်းဢၢၼ်းဝႆႉၸိူင်ႉၼႆ”- ၸဝ်ႈတူၼ်ၶူးလူင် Dr. ပၺ်ႇၺႃႇၼၼ်ႇတ လၢတ်ႈၼႄၼင်ႇၼႆ။

တီႈလိၼ်လွႆဝဵင်းၼၼ်ႉ ယူႇတီႈတၵ်ႉၵႃႇသတ်ႉထႃးလႄႈ သင်ၶၸဝ်ႈ ႁူမ်ႈၵၼ် တႄႇၵေႃႇသၢင်ႈမႃး ဝတ်ႉ၊ ႁူင်းသဝ်း၊ ဢွင်ႈ တီႈမဵတ်ႉတႃႇတြႃး၊ ႁူင်းသုင်းသွမ်းလႄႈ ၵွင်းမူးၼႆႉမႃး တင်ႈတႄႇပီ 2018 ဝၢႆးဢွၵ်ႇဝႃႇသႃ ဝႃႈၼႆ။