ၸဝ်ႈသြႃႇပူတ်းပွႆႇတၢင်းၽိတ်းပၼ် ၸဝ်ႈသၢင်ႇဢွၼ်ႇဢၼ်ၾၼ်းတႅင်းမၼ်းၸဝ်ႈၼၼ်ႉသေတႃႉ လုမ်းတြႃးဢမ်ႇပွႆႇဝၢင်း

မိူဝ်ႈၵၢင်လိူၼ်ၼူဝ်ႊဝႅၼ်ႊပိူဝ်ႊၼၼ်ႉ ၸဝ်ႈသၢင်ႇဢွၼ်ႇ ဢႃႇယု 13 တူၼ်ၼိုင်ႈ ဢဝ်ၽႃႉမိတ်ႈ ၾၼ်းတႅင်း ၵေႃႉပဵၼ် ၸဝ်ႈတူၼ်ၶူး ၸဝ်ႈၵွၼ်းဝတ်ႉ ဝိႁၢရ်ပၢင်ႇၶႃး ဝဵင်းသီႇပေႃႉ ၊ လွင်ႈၼႆႉ ၸဝ်ႈတူၼ်ၶူးပူတ်းပွႆႇဝၢင်းၽႃႈတၢင်းၽိတ်းပၼ်ယဝ်ႉ သေတႃႉလုမ်းတြႃးသမ်ႉဢမ်ႇပွႆႇၽႃႈလႄႈ ၸဝ်ႈသၢင်ႇဢွၼ်ႇၼၼ်ႉ ၸၢင်ႈၺႃးတၢင်းၽိတ်း ၸွမ်းၼင်ႇပိူင်တြႃးလုၵ်ႈဢွၼ်ႇ ထုၵ်ႇလႆႈၺႃး။

ဝၼ်းတီႈ 16/12/2020 ၼႆႉ ၸဝ်ႈသၢင်ႇ ဢႃယု 13 ပီ ၵေႃႉၾၼ်း ၸဝ်ႈၵွၼ်းဝတ်ႉပၢင်ၶႃး ဢိူင်ႇဢုမ်မူႉ ၸႄႈဝဵင်းသီႇပေႃႉ မိူဝ်ႈၵၢင်လိူၼ်ၼူဝ်ႊဝႅမ်ႊ ၿိူဝ်ႊၼၼ်ႉ ၾၢႆႇၸဝ်ႈသြႃႇ ပူတ်းပွႆႇတၢင်းၽိတ်း ပၼ် လႄႈ ၸဝ်ႈသၢင်ႇလႆႈၶႂၢင်ႉဢွၵ်ႇၶွၵ်ႈမႃး သေ မိူဝ်းယူႇၸွမ်းပေႃႈမႄႈၶိုၼ်းတီႈဝၢၼ်ႈ။ ၸွမ်းၼင်ႇမၢႆႈမီႈဝၢၼ်ႈမိူင်းမီးၼၼ်ႉ လုမ်းတြႃးသမ်ႉ ဢမ်ႇၽႃႈတၢင်းၽိတ်း ပၼ်၊  ႁွင်ႉမိူဝ်ႈလႂ် တေလႆႈၶိုၼ်ႈလုမ်းတြႃး ၸွမ်းၼင်ႇ တမ်းဝၢင်းဝႆႉတႃႇ လုၵ်ႈဢွၼ်ႇဢၼ်ႁဵတ်းၽိတ်း။

ၸၢႆးသႅင် ၽူႈတူင်ႉၼိုင် ၸွႆႈထႅမ် တူင်ႇဝူင်းၵူၼ်း သီႇပေႃႉ လၢတ်ႈဝႃႈ – “မိူဝ်ႈၼႆႉ ၸဝ်ႈသၢင်ႇဢွၼ်ႇ ၼၼ်ႉ ဢွၵ်ႇၶွၵ်ႈ မႃးၶိုၼ်ႈလုမ်းတြႃး၊ သွင်ၾၢႆႇၵေႃႈလႆႈ တူၵ်းလူင်း(ကျေအေး) ၵၼ်ၵႂႃႇယဝ်ႉ။ ပိူင်လုမ်းတြႃးတႄႉ ဢမ်ႇယဝ်ႉ။ တေႃႇလဵဝ် ဢၼ်လႆႈပွႆႇတူဝ်မိူဝ်ႈၼႆႉ ယွၼ်ႉမၼ်းပဵၼ်လုၵ်ႈဢွၼ်ႇ ဢႃယုလဵၵ်ႉ 13 ပီ ပႆႇတဵမ် 18 ပီလႄႈ လႆႈပွၵ်ႈမိူဝ်းယူႇၸွမ်းပေႃႈ မႄႈတီႈႁိူၼ်း”- ဝႃႈၼႆ။

ယၢမ်းလဵဝ် တူဝ်ၸဝ်ႈၵွၼ်းဝတ်ႉပၢင်ၶႃး ဢိူင်ႇဢုမ်မူႉ ၵေႃႉထုၵ်ႇၾၼ်းၼၼ်ႉတႄႉ လူင်းႁူင်းယႃယဝ်ႉသေ သိုပ်ႇယူႇယူတ်း ယႃတူဝ်ဝႆႉတီႈဝတ်ႉရတၼႃသူၺ်ႇၵူႇ ဝဵင်း သီႇပေႃႉ။ ၸဝ်ႈသၢင်ႇ ၼၼ်ႉတႄႉ ၺႃးၸႅင်ႈၵႂၢမ်း လူၺ်ႈမၢႆမီႈလုၵ်ႈဢွၼ်ႇ ႁဵတ်းတၢင်းၽိတ်း ၶေႃႈမတ်ႉတႃ 326 ဝႆႉ။ ၾၢႆႇလုမ်းတြႃးတႄႉ တေႁဵတ်းၵႂႃႇ ၸွမ်းပိူင်ထမ်း ၵူၺ်း ဝႃႈၼႆ။

ၸဝ်ႈသၢင်ႇ တင်း ၸဝ်ႈၵွၼ်းဝတ်ႉပၢင်ၶႃး ဢိူင်ႇဢုမ်မူႉၼႆႉ ပဵၼ်လုင်းလၢၼ်ၵၼ်၊ ၸဝ်ႈၵွၼ်းဝတ်ႉၼႆႉ ပဵၼ်ပီႈဢၢႆႈပေႃႈ ၸဝ်ႈသၢင်ႇ ၵေႃႉၾၼ်းၼၼ်ႉ ဝႃႈၼႆ။ မိူဝ်ႈဝၼ်းတီႈ 18/11/2020 ယၢမ်းၵၢင်ၼႂ် ၵေႃႉပဵၼ်လုင်းမုၼ်ပွင်ႉထ လႄႈ ၸဝ်ႈသၢင်ႇ ဢႃ ယု 13 ပီ လၢၵ်ႈၽႃႉ/ မိတ်ႈၾၼ်းသႂ်ႇ တိူဝ်ႉမၢတ်ႇ တီႈ ၵွင်ႇၵေႃႈ ႁၢဝ်ႈႁႅင်း လႆႈႁၢမ်သူင်ႇႁူင်းယႃလူင် ဝဵင်းသီႇပေႃႉ။