ပီႈၼွင်ႉတႆး ၼႂ်းၸႄႈဝဵင်းၾၢႆၶုၼ် ၸိူဝ်းယူႇတၢင်းဢွၵ်ႇၼွင် သိပ်းဝၢၼ်ႈပၢႆ ၸတ်းပၢင်ပွႆးႁပ်ႉတွၼ်ႈ ပီမႂ်ႇတႆး 2115 ၊ ၸတ်းဝၢၼ်ႈၽႂ်ဝၢၼ်ႈမၼ်း ပိူဝ်ႈၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ။
ဝၼ်းတီႈ 14/12/2020 (လိူၼ်သိပ်းသွင်လပ်း၊ ပီတႆး 2114) မိူဝ်ႈၼႆႉ ယူႇတီႈ မူႇဝၢၼ်ႈပီႈၼွင်ႉတႆး ၸိူဝ်းယူႇသဝ်းၵိၼ်သၢင်ႈ ၼႂ်းၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸတ်းႁဵတ်းပၢင်ပွႆးႁပ်ႉတွၼ်ႈ ပီမႂ်ႇတႆး 2115 ၼီႈ။ ၵူၺ်းၵႃႈ ဢိင်ၼိူဝ်ပဵၼ်ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈသေ ၸတ်းၸွမ်းလၢႆးၵႅတ်ႇၵင်ႈတၢင်းပဵၼ်၊ ႁဵတ်းတီႈဝၢၼ်ႈၽႂ်ဝၢၼ်ႈမၼ်း၊ ဝၢၼ်ႈၼိုင်ႈလႄႈဝၢၼ်ႈၼိုင်ႈ ဢမ်ႇၸတ်းႁူမ်ႈၵၼ် ၼႆယဝ်ႉ။
ၸၢႆးဝိၸေႃႇၶမ်း ၶူးသွၼ် ၵေႃႉတူင်ႉၼိုင်ၼႂ်းၵေႃလိၵ်ႈလၢႆးလႄႈၾိင်ႈငႄႈတႆး (ၸႄႈဝဵင်းၾၢႆၶုၼ်ႇ) လၢတ်ႈတီႈၽူႈတွႆႇႁွၵ်ႈ ဝႃႈ– “ၵူႈပီပူၼ်ႉမႃးၼႆႉ ယူႇတီႈၵေႃၸႄႈဝဵင်းႁဝ်းၶႃႈ ဢွၼ်ႁူဝ်ႁဵတ်းၶႃႈဢေႃႈ၊ တွၼ်ႈတႃႇပီၼႆႉတႄႉ ဢမ်ႇလႆႈဢွၼ်ႁူဝ်ႁဵတ်းၶႃႈ။ ယူႇတီႈ ၵေႃၸႄႈဝဵင်းႁဝ်းၶႃႈ တိုၼ်းပိုၼ်ၽၢဝ်ႇဝႆႉဝႃႈ တွၼ်ႈတႃႇပီၼႆႉ ယွၼ်ႉပိူဝ်ႈပဵၼ်ၶၢဝ်းတၢင်းပဵၼ်ၶူဝ်ႊဝိတ်ႉလႄႈ ႁႂ်ႈပွင်ႇၸႂ်သေႁဵတ်းၵႂႃႇဝၢၼ်ႈၽႂ်ဝၢၼ်ႈမၼ်းၵူၺ်း ၼႆၶႃႈဢေႃႈ” ဝႃႈၼႆ။
ပိူဝ်ႈတႃႇ လွင်ႈၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ၼၼ်ႉ ႁၢင်ႈႁႅၼ်းဝႆႉဝၢၼ်ႈၽႂ်ဝၢၼ်ႈမၼ်း တီႈပၢင်ပွႆးၽႂ်ပၢင်ပွႆးမၼ်း။ တွၼ်ႈပၢင်မူၼ်ႈသိူဝ်းၼၼ်ႉၵေႃႈ ဢမ်ႇမွၵ်ႇထိုင် ၽူႈႁွင်ႉၵႂၢမ်းၸိုဝ်ႈသဵင်လိုဝ်းလင် တၢင်ႇတီႈသီႇလႅၼ် ၶဝ်ႈႁူမ်ႈလဝ်ႇမူၼ်ႈတူၼ်ႈၸႂ်၊ ၵမ်ႈၼမ် တေမီးတၢင်းၵႃႈၾိင်ႈငႄႈၾိင်ႈထုင်းလႄႈ ႁွင်ႉၵႂၢမ်းဢိတ်းဢွတ်းၵူၺ်း ၼႆယဝ်ႉ။
“တီႈၼႂ်းထုင်ႉႁဝ်းၶႃႈၼႆႉ ႁဵတ်းပွႆးပီမႂ်ႇတႆးၵူႈဝၢၼ်ႈ၊ ၵူၺ်းၵႃႈ ႁဵတ်းတီႈဝၢၼ်ႈၽႂ်ဝၢၼ်ႈမၼ်းၵူၺ်းၶႃႈ၊ ဝၢၼ်ႈဢုမ်ႇတိုင်းႁဝ်းၶႃႈၵေႃႈႁဵတ်းႁင်းၵူၺ်း၊ ဝၢၼ်ႈၼိုင်ႈတင်းဝၢၼ်ႈၼိုင်ႈၼႆႉ ႁဝ်းၶႃႈဢမ်ႇပၼ်ႁူမ်ႈၵၼ်ၶႃႈ၊ ဢမ်ႇႁဵတ်းလေႃးၵၼ်။ ဢမ်ႇမွၵ်ႇၵူၼ်းတၢင်ႇဝၢၼ်ႈ၊ ၵူၼ်းတၢင်ႇဝၢၼ်ႈမႃးၼႆၵေႃႈ ႁဝ်းၶႃႈတေဢမ်ႇပၼ်ၶဝ်ႈပၢင်ပွႆးႁဝ်း”– ၸၢႆးဝိၸေႃႇၶမ်း သိုပ်ႇလၢတ်ႈထႅင်ႈၼင်ႇၼႆ။
ၶပ်းမၢႆပၢင်ပွႆးတႄႉ ၶမ်ႈၶိုၼ်းလိူၼ်သိပ်းသွင်လပ်း (15 ၶမ်ႈ)ၼႆႉ မိူဝ်ႈၸဝ်ႉ မီးပၢင်မူၼ်ႈသိူဝ်း၊ ထိုင်ယၢမ်းတဵင်ႈၶိုၼ်း 12 မူင်းမႃး မီးပၢင်ႁပ်ႉၸဵင်။ လိူဝ်သေၼၼ်ႉ ပေႃးထိုင်မႃး လိူၼ်ၸဵင်မႂ်ႇဝၼ်းၼိုင်ႈ (မိူဝ်ႈၽုၵ်ႈ) တေမီးပၢင်ထွမ်ႇထမ်း/တြႃး ယၢတ်ႇၼမ်ႉၶႂမ်ႈတဝ်ႈ ၸႅၵ်ႇဝၢၵ်ႈၵုသူလ်ႇၼႃးမုၼ်၊ မီးပႃးပၢင်လဵၼ်ႈၸဵင် ၸိူဝ်းၼႆႉ ၼႆယဝ်ႉ။
ဝၢၼ်ႈဢုမ်ႇတိုင်းၼႆႉ လင်ႁိူၼ်းမီးမွၵ်ႈ 90 လင်၊ ယူႇၼႂ်းၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း၊ ပဵၼ်လႅၼ်လိၼ် တိတ်းၸပ်းၸႄႈမိူင်းယၢင်းလႅင်။
တီႈၼႂ်းၸႄႈဝဵင်းၾၢႆၶုၼ်ႇၼႆႉ ဝၢၼ်ႈတႆး ဢၼ်ၸတ်းႁဵတ်းပၢင်ပွႆးပီမႂ်ႇတႆးၼႆႉ မီးတင်းမူတ်း 12 ဝၢၼ်ႈ၊ ပဵၼ်ဝၢၼ်ႈၸိူဝ်းယူႇတၢင်းဢွၵ်ႇၼွင် ၼႆယဝ်ႉ။
