ၵူၼ်းမိူင်းတႆးပွတ်းဢွၵ်ႇ ၸႄႈဝဵင်းတႃႈၶီႈလဵၵ်း လႆႈတွၵ်ႇၶႅပ်းၵၢင်ၸႂ် ၵူၼ်းမိူင်းပွတ်းၸၢၼ်း ၸႄႈဝဵင်းၾၢႆၶုၼ် ပွတ်းလႅၼ်လိၼ်မိူင်းယၢင်းလႅင်။
ပၢင်လိူၵ်ႈတင်ႈ 08/11/2020 မိူဝ်ႈၼႆႉ တီႈႁူင်းတွတ်ႈၶႅပ်းမၢႆ 1 ၊ ပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼၼ်ႉ ၵူၼ်းဝၢၼ်ႈၵူၼ်းမိူင်း လႆႈတွၵ်ႇမႅၼ်ႈၶႅပ်းၵၢင်ၸႂ် ၵူၼ်းမိူင်းတႆးပွတ်းၸၢၼ်း ၸႄႈဝဵင်းၾၢႆၶုၼ် ဢၼ်လႅၼ်လိၼ်တိတ်းၸပ်း တၢင်းမိူင်းယၢင်းလႅင်။ ၵူၼ်းၸိူဝ်းတွၵ်ႇမႅၼ်ႈၵႂႃႇၼၼ်ႉ ႁူမ်ႈပဵၼ်ၵူၼ်း 100 ၵေႃႉ-ၼႆယဝ်ႉ။
ၼၢင်းပိၼ်းတိပ်ႉ ၼေႃႇၽူႈတႅၼ်းၸႄႈမိူင်း ၶဵတ်ႇလိူၵ်ႈတင်ႈမၢႆ 1 ပႃႇတီႇႁူဝ်သိူဝ် (SNLD) ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈ ဝႃႈ- “လွင်ႈၼႆႉ လႆႈထတ်းႁၼ်မႅၼ်ႈ မိူဝ်ႈယၢမ်း 14:45 မူင်း (ဝၢႆးဝၼ်း)မိူဝ်ႈၼႆႉ။ ပီႈၼွင်ႉၽူႈမီးသုၼ်ႇတွတ်ႈၶႅပ်း လႆႈတွၵ်ႇမႅၼ်ႈၵႂႃႇတင်းမူတ်း 2 ပပ်ႉ၊ ႁူမ်ႈ 100 ဝႂ်၊ တႃႇၵူၼ်း 100 ၵေႃႉ။ တၢင်းၼွၵ်ႈမၼ်းတႄႉ ၶဝ်တႅမ်ႈဝႆႉဝႃႈ တႃႈၶီႈလဵၵ်း၊ ၵူၺ်းၵႃႈမၢင်ၸေႈတၢင်းၼႂ်းမၼ်းသမ်ႉ ပဵၼ်ၾၢႆၶုၼ်ဝႆႉ” ဝႃႈၼႆ။
လွင်ႈပဵၼ်ၵႂႃႇၸိူင်ႉၼႆၼႆႉ ဢမ်ႇၵွမ်ႉၵႃႈ တီႈပွၵ်ႉမႄႈၶၢဝ် ဝဵင်းတႃႈၶီႈလဵၵ်းၵူၺ်း၊ ဝၼ်းတီႈ 07/11/2020 မိူဝ်ႈဝႃး မိူဝ်ႈဢဝ်ၶႅပ်းၵၢင်ၸႂ်လူင်ႈၼႃႈ တၢင်းဢိူင်ႇမိူင်းၽူင်းၵေႃႈပဵၼ်၊ ၵူၺ်းၵႃႈ ဢမ်ႇပဵၼ်ၼမ် ၼႆယဝ်ႉ။
“လၢႆးၵႄႈပၼ်ႁႃမၼ်းတႄႉ ၶဝ်တေႁွင်ႉၵူၼ်းၸိူဝ်းဢၼ်တွၵ်ႇၵႂႃႇၼၼ်ႉ မႃးၶိုၼ်း၊ ၵူၼ်းၸိူဝ်းၼၼ်ႉ ပဵၼ်ၽႂ်လၢႆလၢႆၼႆ သဵၼ်ႈမၢႆမၼ်းမီးဝႆႉတီႈ ၶွမ်ႊမသျိၼ်ႊၶဝ်ယူႇ။ လွင်ႈၼႆႉ ယူႇတီႈၽူႈၵွၼ်းပွၵ်ႉမႄႈၶၢဝ် ပွႆႇၵူၼ်းႁူဝ်သိပ်းႁူဝ်သၢဝ်း ၵႂႃႇႁွင်ႉၶဝ်မႃးၶိုၼ်း၊ ၵူၺ်းၵႃႈ ၸွင်ႇတေမႃးၶိုၼ်းၵူၼ်းၼိုင်ႈပၢၵ်ႇႁႃႉၼႆၵေႃႈ ႁဝ်းၵေႃႈဢမ်ႇလၢတ်ႈလႆႈ၊ ၵူၼ်းၵူႈၵေႃႉၼႆႉ မၢင်ၵေႃႉၵေႃႈတေဢမ်ႇၶႂ်ႈမႃးၶိုၼ်း ၵေႃႈတေမီး” ၼၢင်းပိၼ်းတိပ်ႉ သိုပ်ႇလၢတ်ႈထႅင်ႈၼင်ႇၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈၵုမ်း/ၵွၼ်း ႁူင်းတွတ်ႈၶႅပ်း လၢတ်ႈဝႆႉဝႃႈ-တတ်းမၵ်းဝႆႉ ပၼ်ၶၢဝ်းယၢမ်းတေႃႇထိုင် 7 မူင်းၵၢင်ၶမ်ႈ၊ ပေႃးမႃးၵေႃႈမႃး၊ ပေႃးဢမ်ႇမႃးၵေႃႈ တေပိၵ်ႉဢိုတ်းႁူင်းတွတ်ႈၶႅပ်းယဝ်ႉ – ဝႃႈၼႆ။