ၶူဝ်ၽႅၼ်ၵဝ်ႇ ၶၢမ်ႈၼမ်ႉမၢဝ်းၼႂ်းၵႄႈမိူင်းတႆး – မိူင်းၶၢင်ၼၼ်ႉပုတ်းၶၢတ်ႇၵွႆတူၵ်းၼမ်ႉ

ၶူဝ်ၽႅၼ်ၵဝ်ႇ ဢၼ်မီးဢႃယု 100 ပီပၢႆ ဢၼ်ၵၢႆႇၼႂ်ႈၵႄႈ မိူင်းတႆးတင်း မိူင်းၶၢင်ၼၼ်ႉ ၽင်ႉၶၢတ်ႇ ယၢတ်ႇတူၵ်းၼမ်ႉမၢဝ်း ပႅတ်ႈတင်းမူတ်းယဝ်ႉ ဝႃႈၼႆ။

ၶူဝ်လဵၵ်းၽႅၼ်ၼႆႉ  လုၵ်ႉၸႄႈဝဵင်းၼမ်ႉၶမ်း ၶၢမ်ႈၼမ်ႉမၢဝ်းၵၢႆႇၸူး  ၸႄႈဝဵင်းမၢၼ်ႈမေႃႇ ၸႄႈမိူင်းၶၢင်။  မိူဝ်ႈၼႆႉ ဝၼ်းတီႈ 23/11/2020 ယၢမ်းၵၢင်ဝၼ်း  လႆႈလူႉၵွႆပုတ်းၶၢတ်ႇယၢတ်ႇတူၵ်းၼမ်ႉမၢဝ်းပႅတ်ႈတင်းလင်ယဝ်ႉယွၼ်ႉ  ၸိူၵ်ႈလဵၵ်းၽင်ႉၵွႆလႅဝ်မူတ်း။

ၸၢႆးမၢဝ်း ၵူၼ်းၼမ်ႉၶမ်းလၢတ်ႈဝႃႈ – “ႁူး ……….. ၶူဝ်ၼၼ်ႉတႄႉ ၵဝ်ႇၵႄႇႁႅင်းၼႃႇယဝ်ႉၶႃႈ။  ဢႃယု တေဢမ်ႇယွမ်း 100 ပီၼႆႉ ယဝ်ႉ။ ပဵၼ်ၶူဝ်ဢၼ်လႅၼ်သုတ်း ၼႂ်းမိူင်းတႆး ပွတ်းႁွင်ႇ ဢၼ်ၵၢႆႇၸူးတၢင်းမိူင်းၶၢင်ၼၼ်ႉယဝ်ႉ။ သၢင်ႈမႃးၸဵမ်မိူဝ်ႈပၢၼ်ႇ ဢိင်းၵလဵတ်ႈပုၼ်ႉၶႃႈၼေႈ”- ဝႃႈၼႆ။

ၶူဝ်ၽႅၼ်ၼႆႉတႄႉ ၵဝ်ႇႁႅင်းၽင်ႉႁႅင်းၼႃႇယဝ်ႉလႄႈ ဢမ်ႇပၼ်ၵူၼ်းတႆႇၵႂႃႇမႃး ပေႃးႁိုင်ယဝ်ႉ။  တႃႇၵူၼ်းဝၢၼ်ႈလႆႈၸႂ်ႉသမ်ႉ လႆႈၶိုၼ်းၵၢႆႇဝႆႉပၼ်ၶူဝ်မႂ်ႇ လင်ၼိုင်ႈ ႁိမ်းၶူဝ်ၵဝ်ႇၼၼ်ႉၵူၺ်းၼင်ႇၵဝ်ႇ ။