ပၢင်လိူၵ်ႈတင်ႈပွၵ်ႈၼႆႉၵေႃႈ တီႈၼမ်ႉၶမ်း ၶႅပ်းမႄးပႃႇတီႇတဢၢင်း TNP ၼမ်ဝႆႉထႅင်ႈ

ပၢင်လိူၵ်ႈတင်ႈ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼႆႉ တေႃႇထိုင်ယၢမ်းလဵဝ် ၸွမ်းၼင်ႇလႆႈႁူႉႁူဝ်ၼပ်ႉၶႅပ်းၵၢင်ၸႂ်ဝႆႉၽွင်ႈၼၼ်ႉ ပႃႇတီႇၸိူဝ်ႉၸၢတ်ႈတဢၢင်း TNP လႆႈၶႅပ်းသဵင်ၼမ်လိူဝ်ဝႆႉထႅင်ႈ ဝႃႈၼႆ။

ပၢင်လိူၵ်ႈတင်ႈတီႈၸႄႈဝဵင်း ၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸွမ်းၼင်ႇလႆႈႁပ်ႉႁူႉမၢႆၼပ်ႉၶႅပ်းမႄး ဝႆႉတႄႉ  ပႃႇတီႇၸိူဝ်ႉၸၢတ်ႈတဢၢင်း TNP ပေႉပုၼ်ႈၵိၼ်ၶၢတ်ႇ တင်း 4 တီႈၼင်ႈ၊ တီႈၼင်ႈ ၽူႈတႅၼ်းသၽႃး ၸိူဝ်ႉ ၸၢတ်ႈ၊ ၵူၼ်းမိူင်း၊ ၸႄႈမိူင်း 1 လႄႈ ၸႄႈမိူင်း 2 ၸိူဝ်းၼႆႉ။ ၵူၺ်းၵႃႈ ၶႅပ်းသဵင်ၵၢင်ၸႂ်ယင်းပႆႇဢၢၼ်ႇယဝ်ႉတူဝ်ႈလီငၢမ်းလႄႈ ပႆႇလႆႈႁူႉတႅတ်ႈတေႃး။

ၾၢႆႇၼိုင်ႈ ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈ ၵေႃႈ ယင်းပႆႇလႆႈပိုၼ်ၽၢဝ်ႇလွင်ႈပေႉလွင်ႈသုမ်း ပဵၼ်တၢင်းၵၢၼ်။

 ၵူၼ်းမိူင်းၼမ်ႉၶမ်းလႄႈၽူႈပၵ်းတႃၵၢၼ်မိူင်းတႄႉ ဢွၼ်ၵၼ်လၢတ်ႈဝႃႈ – သင်ဝႃႈၵူၼ်းမိူင်းၽွမ်ႉၵၼ်သႂ်ႇပၼ်ပႃႇတီႇတႆး ဢၼ်လႂ်ဢၼ်ၼိုင်ႈၸိုင် ၸၢင်ႈၵိၼ်ၶၢတ်ႇပေႉပုၼ်ႈဢွင်ႇမၢၼ်လႆႈတီႈၼင်ႈဢမ်ႇႁၢင်ႉ – ဝႃႈၼႆ။

တီႈမိူင်းၼမ်ႉၶမ်းၼႆႉ မိူဝ်ႈပၢင်လိူၵ်ႈတင်ႈ 2015 ပူၼ်ႉမႃးၵေႃႈ ပႃႇတီႇတဢၢင်းဢွင်ႇပေႉလႆႈတီႈၼင်ႈဝႆႉ။