မိူင်းတႆး ပွတ်းႁွင်ႇ ၼႂ်းၸႄႈဝဵင်းၵူတ်ႉၶၢႆၼၼ်ႉ ၵေႃႉပဵၼ်ပီႈဢၢႆႈ ဢမ်ႇတၼ်းၼႆသေ ၵေႃႉပဵၼ်ၼွင်ႉၸၢႆး ဢႃယုႇ ပႆႇတဵမ် 18 ပီၼၼ်ႉ ၵႂႃႇတွတ်ႈၶႅပ်းတႅၼ်းတၢင်ပီႈဢၢႆႈ လႄႈ ဢဝ်လိူင်ႈထိုင်ၶွမ်ႊမသျိၼ်ႊလိူၵ်ႈတင်ႈ လႆႈႁူႉၼင်ႇၼႆ။
ဝၼ်းတီႈ 8/11/2020 ဝၼ်းပၢင်လိူၵ်ႈတင်ႈ မိူဝ်ႈၼႆႉ ၸတ်းႁဵတ်းပတ်းပိုၼ်ႉတူဝ်ႈမိူင်းႁူမ်ႈတုမ်၊ ၼႂ်းၸႄႈတွၼ်ႈမူႇၸေႊ ၸႄႈဝဵင်းၵူတ်ႉၶၢႆ – ႁူင်းတွတ်ႈၶႅပ်း မၢႆ 2 ၊ ဢၼ်မီး ၼႂ်း ပွၵ်ႉ 7 ၼၼ်ႉ ဢွၼ်ႇၸၢႆး ၸၢဝ်းၶိူဝ်းၶႄႇ ဢႃႇယု 15 ၵေႃႉၼိုင်ႈ ယိပ်းမၢႆၾၢင် မၢတ်ႇပူင်ႇတိၼ်ႇၵေႃႉပဵၼ်ပီႈဢၢႆႈသေ ၵႂႃႇတွတ်ႈၶႅပ်းၵၢင်ၸႂ် တႅၼ်းတၢင်ပီႈဢၢႆႈ ။ ယွၼ်ႉပိူဝ်ႈၵေႃႉပဵၼ်ပီႈဢၢႆႈဢမ်ႇယူႇႁိူၼ်း တိုၵ်ႉၵႂႃႇႁဵတ်းၵၢၼ်မီးမိူင်းၶႄႇလႄႈ – ဝႃႈၼႆ။ လွင်ႈၼႆႉ ပႃႇတီႇၵၢၼ် မိူင်း ၊ ၸုမ်းပၵ်းတႃပႂ်ႉတူၺ်းၶဝ် ဢဝ်လိူင်ႈၼႆႉ ယိုၼ်ႈထိုင်ၶွမ်ႊမသျိၼ်ႊ ၵမ်ၵၢၼ်လိူၵ်ႈတင်ႈ ၸႄႈဝဵင်းဝႆႉယဝ်ႉဝႃႈၼႆ။
“ၸႂ်ႈတႄႉဢေႃႈလွင်ႈၼႆႉ၊ မၼ်းတၼ်းလႆႈတွတ်ႇမႄးတီႈ ပုင်း သၽႃးၵူၼ်းမိူင်းယဝ်ႉဢေႃႈ၊ သၽႃးၸႄႈမိူင်းတင်း ၸိူဝ်ႉၸၢတ်ႈတႄႉ ပႆႇတၼ်းလႆႈတွတ်ႈ၊ ႁဝ်းၶႃႈလႆႈႁပ်ႉႁၼ်သေ တၼ်းထတ်းထွင် သင်ႇၵိုတ်း၊ ဢဝ်လိူင်ႈမၼ်း ၸၢႆး မွပ်ႈပၼ်ၵေႃႇမသျိၼ်ႊၵမ်ၵၢၼ်လိူၵ်ႈတင်ႈယဝ်ႉၶႃႈ”- ၼႆ ၼေႃႈၽူႈတႅၼ်းသၽႃးၵူၼ်းမိူင်း ၸၢႆးပျေႉၽဵဝ်းၵျေႃႇ ပႃႇတီႇႁိူဝ်သိူဝ် ဝဵင်းၵူတ်ႉၶၢႆလၢတ်ႈၼႄၼင်ႇၼႆ။
ၵဵဝ်ႇၵပ်းလွင်ႈၼႆႉသေ ဢူးၵျေလၸမ် ႁူဝ်ပဝ်ႈၶွမ်ႊမသျိၼ်ႊၵမ်ၵၢၼ်လိူၵ်ႈတင်ႈ ဝဵင်းၵူတ်ႉၶၢႆ ယိုၼ်ယၼ် ဝႃႈလႆႈႁူႉၸွမ်းယူႇ ပဵၼ်တေႉမီးတေႉ၊ ႁူဝ်ယွႆႈႁႂ်ႈၵပ်းႁႃ ၽူႈၼမ်းၼႂ်း ဝႃႈၼႆသေတႃႉ ၽူႈၼမ်းၼႂ်းၶွမ်ႊမသျိၼ်ႊၵမ်ၵၢၼ်လိူၵ်ႈတင်ႈ ဝဵင်းၵူတ်ႉၶၢႆ တေႃႇတွင်ႇၵျႃၶွၼ်ႊဢမ်ႇႁပ်ႉသၢႆ တွပ်ႇလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ