Thursday, March 28, 2024

ၶူဝ်လႅၼ်လိၼ် တႃႈၶီႈလဵၵ်း – မႄႈသၢႆပိၵ်ႉဢိုတ်းၶွပ်ႈတဵမ် 7 လိူၼ် ယင်းပႆႇမီးၾၢင်ႁၢင်ႈတႃႇပိုတ်ႇၶိုၼ်း

Must read

ဢိင်ၼိူဝ်တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်ႈႁၢဝ်ႈႁႅင်း တင်ႇတႄႉႁူဝ်ပီၼႆႉမႃးသေ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇ ပိၵ်ႉဢိုတ်းတၢင်းၶဝ်ႈဢွၵ်ႇၸွမ်းလႅၼ်လိၼ် တႆး – ထႆး ၵူႈတီႈ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးႁႃၵၼ် မီးၶၢဝ်းတၢင်း တဵမ် 7 လိူၼ် ယဝ်ႉသေတႃႉ ပႆႇမီးၾၢင်ႁၢင်ႈတႃႇတေပိုတ်ႇၶိုၼ်း။

Photo by – ႁႅင်းၵၢၼ်/ ၽၵ်းတူၶဝ်ႈဢွၵ်ႇ တီႈမႄႈသၢႆ

တႄႇဢဝ် ဝၼ်းတီႈ 23/3/2020 – 23/10/2020 တီႈၶူဝ် မိုတ်ႈၵိုဝ်းမၢႆ 1 တႃႈၶီႈလဵၵ်း – မႄႈသၢႆၼၼ်ႉ လႆႈထုၵ်ႇပိၵ်ႉဢိုတ်းမႃး ႁၢမ်ႈၵူၼ်းၶဝ်ႈ ၵႂႃႇမႃးႁႃၵၼ် မီးၶၢဝ်းတၢင်း 7 လိူၼ်ယဝ်ႉ။ လိူဝ်ၼၼ်ႉ ၸွမ်းလႅၼ်လိၼ်တႆး – ထႆး တၢင်းၶဝ်ႈဢွၵ်ႇ ၵႂႃႇမႃး ဢၼ်ၵၢႆႇၸူးၵၼ် ၵူႈႁူးၵူႈတၢင်း တၢင်းလၢၼ်ႇ PB1 ၊ လၢၼ်ႇပႃၶီး၊ လၢၼ်ႇၼႃးမူၼ်း၊ လၢၼ်ႇဝဵင်းႁႅင်လႄႈ လၢၼ်ႇၼမ်ႉ ယွၼ်း ၸိူဝ်းၼၼ်ႉ လႆႈသင်ႇပိၵ်ႉဢိုတ်းမႃးၵူႈတီႈ ၼႆယဝ်ႉ။

- Subscription -

ၸၢႆးၼုမ်ႇတုၺ်ႈ ၼေႃႇၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈဝႃႈ – “ယၢမ်းလဵဝ်ၼႆႉ ၼႂ်း မိူင်းႁူမ်ႈတုမ်ႁဝ်းၶႃႈသမ်ႉ တၢင်းပဵၼ်ၼႆႉ ပဵၼ်ၶိုၼ်ႈမႃးထႅင်ႈလွပ်ႈထီႉသွင်လႄႈ လွင်ႈတႃႇတေပိုတ်ႇၶူဝ်ၼႆႉ ပႆႇငၢႆႈၶႃႈ။ လႆႈ ႁူႉဝႃႈ ယူႇတီႈၽူႈမီးပုၼ်ႈၽွၼ်း တင်းသွင်ၾၢင်ႇမိူင်း ၶတ်းၸႂ်ဢုပ်ႇဢူဝ်းငူပ်ႉငီႉၵၼ် မႃးလၢႆလၢႆၵမ်းၵေႃႈ ပႆႇပဵၼ်ပိုတ်ႇ” – ဝႃႈၼႆ။

ဢိင်ၼိူဝ် လွင်ႈပိၵ်ႉၶူဝ်ၼႆႉသေ ၵၢၼ်ပၢႆးမၢၵ်ႈမီး တၢင်းၾင်ႇမိူင်းထႆး မႄႈသၢႆ လႄႈ တၢင်းၾၢင်ႇမိူင်းတႆး တႃႈၶီႈလဵၵ်းတႄႉ ဢမ်ႇပဵၼ်ၵၢၼ် ၵူၼ်းတူၵ်းၵၢၼ်/ငၢၼ်း ၵၼ် ၼမ် ၼႆယဝ်ႉ။

ၸၢႆးၵႅဝ်ႈ ၵူၼ်းတႃႈၶီႈလဵၵ်း လၢတ်ႈဝႃႈ – “တင်ႈတႄႇၶဝ်ပိၵ်ႉၶူဝ်မႃးၼႆႉ ၵၢၼ်ၵႃႉၵၢၼ်ၶၢႆၵေႃႈ ဢမ်ႇပဵၼ်။ ၵူၼ်းတူၵ်းၵၢၼ်/ ငၢၼ်းၵေႃႈၼမ်ၼႃႇ။ ၶူဝ်ၼႆႉ ယွၼ်ႉပိၵ်ႉႁိုင်ၵႂႃႇသေ ယူႇတီႈၵူၼ်းပိုၼ်ႉတီႈတႃႈၶီႈလဵၵ်းႁဝ်းၶႃႈၵေႃႈ ဢမ်ႇၸၢင်ႈႁဵတ်းႁိုဝ်ယဝ်ႉၶႃႈ ။ ပေႃးမီးၵၢၼ်ၵေႃႈႁဵတ်းသေ ဢမ်ႇမီးၵေႃႈ ယူႇလၢႆ ႁေၼႆၵူၺ်းၶႃႈဢေႃႈ” – ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ ၽႄႈလၢမ်းႁၢဝ်ႈႁႅင်း ၼႂ်းမိူင်းႁူမ်ႈတုမ် ပွၵ်ႈၵမ်းသွင်သေ တႄႇဢဝ် ႁၢင်လိူၼ်သႅပ်ႊ ထႅမ်ႊၿိူဝ်ႊၼႆႉမႃး ယူႇတီႈလူင်ပွင်ၸိုင်ႈ မိူင်းထႆးပိုၼ်ၽၢဝ်ႇ ၸီႉသင်ႇ ပၼ်ၶႂၢင်ႉရူတ်ႉၵႃးတၢင်ႇၵုၼ်ႇ တၢင်းသွင်ၾၢႆႇ ၶဝ်ႈ ဢွၵ်ႇၵႂႃႇမႃး ၼိုင်းဝၼ်းလႂ် ၾၢႆႇလႂ် 6 လမ်းၵူၺ်း။ ဢိင်ၼိူဝ်လွင်ႈၼႆႉ ယူႇတီႈၽူႈမီးပုၼ်ႈၽွၼ်းတၢင်းၵူၼ်းမိူင်းတင်းသွင် ၾင်ႇ ယၢမ်ႈမီးပၼ်ႁႃၵၼ် ၵမ်ႉၼိုင်ႈ ၼႆယဝ်။

ၼၢင်းႁွမ် ၵူၼ်းၵႃႉၶၢႆ တႃႈၶီႈလဵၵ်း လၢတ်ႈဝႃႈ – “ၶူဝ်းၶွင်မၢင်မဵဝ်းၵေႃႈ ၶိုၼ်ႈမႃးဢိတ်းၶႃႈဢေႃႈ။ မၢင်မဵဝ်းၵေႃႈ လူင်းၶိုၼ်း မိူၼ်ၶၼ်ၵဝ်ႇယူႇၶႃႈ။ မိူဝ်ႈၵူႈပွၵ်ႈတႄႉ လႆႈတေႃႉၵႂႃႇတေႃႉမႃးထၢင်ႇႁၢင်ႈလူမ်ၸႂ် မိူဝ်ႈလဵဝ်ၼႆႉသမ်ႉ ၼိုင်ႈဝၼ်းလႂ် တေလႆႈ ၶဝ်ႈဢွၵ်ႇၵႃးလႂ်လမ်းၵႃႈၼႆႉၵူၺ်းလႄႈ ၶူဝ်းၶွင်တႄႉ မၢင်ဢၼ်ၵေႃႈ ဢမ်ႇၸေး ၶၢတ်ႇဝႆႉၸိူင်ႉၼႆၵေႃႈမီးဢေႃႈ။ ၶၢၼ်ၶၢႆ တႄႉ ဢမ်ႇပိူင်ႈသင်ၶႃႈ ၶိုၼ်ႈဢိတ်း၊ လူင်းဢိတ်းၸိူင်ႉၼၼ်ၵူၺ်း” – ဝႃႈၼႆ။

မိူဝ်ႈဝၼ်းတီႈ 27/8/2020 ပူၼ်ႉမႃးၼၼ်ႉ ယူႇတီႈႁွင်ႈၵၢၼ်ပၢႆးယူႇလီ မိူင်းထႆး ပိုၼ်ၽၢဝ်ႇ ၸီႉသင်ႇၸူးၽူႈၵွၼ်းၸႄႈ တွၼ်ႈသေ ႁႂ်ႈသင်ႇလူင်းၸူးတီႈၽူႈၵွၼ်းၸႄႈဝဵင်း ၸိူဝ်းတိတ်းၸပ်းလႅၼ်လိၼ်မိူင်းထႆး – မိူင်းႁူမ်ႈတုမ် တင်းမူတ်း ႁၢမ်ႈ ၵူၼ်းမိူင်းႁူမ်ႈတုမ် ၸိူဝ်းလၵ်ႉၶဝ်ႈမိူင်း ဢမ်ႇၸွမ်းမၢႆမီႈ ၸိူဝ်းၼႆႉ ႁႂ်ႈပၼ်တၢမ်ႇ ၸွမ်းၼင်ႇမၢႆမီႈဝၢၼ်ႈမိူင်းလႄႈ မၢႆမီႈတၢင်း ပဵၼ်ၶူဝ်ႊဝိတ်ႉ 19 မီးဝႆႉၼၼ်ႉ။

ယူႇတီႈလူင်ပွင်ၸိုင်ႈမိူင်းထႆး ပိုၼ်ၽၢဝ်ႇၸီႉသင်ႇ ႁႂ်ႈၵၼ်ႈဝႆႉ ၸွမ်းလႅၼ်လိၼ်ဢၼ်တိတ်းၸပ်းၵၼ်တၢင်း မိူင်းႁူမ်ႈတုမ် မၢၼ်ႈ မိူၼ်ၼင်ႇ ၸႄႈတွၼ်ႈၵၼ်ၶျၼပူးရီး၊ ၶျုမ်းၽွၼ်း၊ ၵဵင်းႁၢႆး၊ ၵဵင်းမႆႇ၊ တၢတ်ႇ၊ ပၸူပ်ႇၶရီႊၶၼ်၊ ၽဵတ်ႉပူးလီး၊ မႄႈ ႁွင်ႈသွၼ်၊ ရယွင်း လႄႈ ရတ်ႉပူးလီး ၸိူဝ်းၼႆႉ။

ယၢမ်းလဵဝ် ၼႂ်းမိူင်းႁူမ်ႈတုမ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 41,008 ၵေႃႉ၊ ယူတ်းယႃ 18,859 ၵေႃႉ၊ ယႃၶႅၼ်း 21,144 ၵေႃႉလႄႈ လူႉတၢႆ 1,005 ၵေႃႉ ယူႇတီႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း