Friday, March 29, 2024

ပၼ်ႁႃၶိူဝ်းတႆး/မိူင်းတႆး မိူဝ်ႈၼႆႉ တေႁဵတ်းႁိုဝ်ၵႄႈလိတ်ႈ – တွင်ႈထၢမ် ၸွမ်သိုၵ်းလူင်ယွတ်ႈသိုၵ်း

Must read

ပၼ်ႁႃၶိူဝ်းတႆး/မိူင်းတႆး မိူဝ်ႈၼႆႉ တေႁဵတ်းႁိုဝ်ၵႄႈလိတ်ႈ – တွင်ႈထၢမ် ၸွမ်သိုၵ်းလူင်ယွတ်ႈသိုၵ်း

ၼႂ်းၸိုင်ႈတႆး ဝၼ်းမိူဝ်ႈၼႆႉ ပၼ်ႁႃ ပၢင်တိုၵ်းသိုၵ်းသိူဝ်၊ ပၼ်ႁႃယႃႈမဝ်းၵမ်၊ ပၼ်ႁႃ သႄႇယူင်းပူင်းၸႃႉ လၢတ်ႈၵႂၢမ်းၽိတ်းၽႅၵ်ႇတႅၵ်ႈငၢၵ်ႈၵၼ်၊ လွင်ႈၽွမ်ႉသဵင်ပဵင်းပၢၵ်ႇ ၼႂ်းၸိုင်ႈတႆး ၼႂ်းၶိူဝ်းတႆး ၸတ်ႉငၢၵ်ႈ လႄႈ ထုၵ်ႇလီၵႄႈလိတ်ႈၸိူင်ႉႁိုဝ်၊ ၸွမ်သိုၵ်းလူင် ယွတ်ႈသိုၵ်းႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး မီးပၢႆႉ ဝူၼ်ႉ ပူၵ်းပွင်ႇလွင်ႈၽွမ်ႉႁူမ်ႈ ၸိုင်ႈတႆးၶိုၼ်းၸိူင်ႉႁိုဝ် ၸုမ်းၶၢဝ်ႇၽူႈတွႆႇႁွၵ်ႈ ႁူပ်ႉထူပ်း တွင်ႈထၢမ်ဝႆႉ ၼင်ႇၼႆ။

- Subscription -

ထၢမ် – ပေႃးတူၺ်း  ၼိူဝ်ဢွၼ်လၢႆး ၼိူဝ်ဢိၼ်ႊတိူဝ်ႊၼႅတ်ႉၼႆ လွင်ႈတႅၵ်ႇယႅၵ်ႈ ၽိတ်းမေႃးၵၼ် ၼႂ်း ၵႄႈၵူၼ်းၼုမ်ႇ ၼႂ်းၵႄႈမူႇၸုမ်းဢၼ်တၢင်တူဝ်ၸိူဝ်ႉၸၢတ်ႈ ႁၢင်ႈၼမ်မႃး ၵွပ်ႈပိူဝ်ႈၼႆ ၼင်ႇႁိုဝ်ပေႃး တေလူတ်းယွမ်းလႆႈၵႂၢမ်းပႅင်းၸင်းၵၼ်သေ ႁႂ်ႈပေႃးပဵၼ်ၵၢၼ်ၵမ်ႉၸွႆႈလွင်ႈၽွမ်ႉႁူမ်ႈၼၼ်ႉ ႁၼ်ထိုင်ၸိူင်ႉႁိုဝ်၊ ထုၵ်ႇလီႁဵတ်း ၸိူင်ႉႁိုဝ်ၽွင်ႈၶႃႈ?။

တွပ်ႇ – ပေႃးမႃးတူၺ်းၼႂ်းဢွၼ်ႊလၢႆႊ ဢၼ်ၶဝ်လၢတ်ႈၵၼ်ၼႂ်း YouTube, Facebook ၸိူဝ်းၼႆႉ ပဵၼ်ၵူၼ်းၼုမ်ႇၾႆးႁႅင်း၊ ၸႂ်ႁတ်းႁႅင်း၊ ၸႂ်ၶႂ်ႈပဵၼ်ႁႅင်းၼႃႇ ၶဝ်ၵေႃႈလၢတ်ႈၸွမ်းလူမ်း/ၸွမ်းႁႅင်းၼမ်ႉ ၸႂ်ၶွင်ၶဝ်။ ဢၼ်ၼႆႉမၼ်းၵေႃႈလီပိူင်ၼိုင်ႈ မၼ်းပဵၼ်ၵၢၼ်ပူၵ်းတိုၼ်ႇၵၼ်၊ ပၼ်သတိၵၼ်။ ႁႂ်ႈၽူႈယႂ်ႇၵူၼ်းလူင်မႃးလၢတ်ႈသႄႉၵၼ်ၼႄးၵၼ်ၼႆႉ မၼ်းဢေႇၼႃႇ၊ ႁဝ်းဢမ်ႇပေႃးႁၼ် ဢၼ်ၼႆႉတေပဵၼ်လွင်ႈလီယူႇ။ ၼႂ်းဢွၼ်ႊလၢႆႊ (Online) ၾဵတ်ႊပုၵ်ႉ (Facebook) ၸိူဝ်းၼႆႉ မၢင်ၵေႃႉၶဝ်ဢမ်ႇႁူႉသင်၊ ဢမ်ႇႁူႉၶေႃႈမုလ်း၊ ဢမ်ႇႁူႉပိုၼ်း၊ ၶၢဝ်ႇပိူၼ်ႈဢွၵ်ႇၸိူင်ႉႁိုဝ်ၵေႃႈ မၼ်းသိုပ်ႇလၢတ်ႈၸိူင်ႉၼၼ်ၵူၺ်း ဢဝ်တၢင်းမူၼ်ႈသိူဝ်းမူၼ်ႈပၢၵ်ႇမၼ်းၵူၺ်း ၸိူဝ်းၼႆႉၵေႃႈမၼ်းမီး။ ဢၼ်မီးလၢၵ်ႇလၢႆၸိူင်ႉၼႆၼႆႉ မၼ်းပဵၼ်ၵၢပ်ႈမၼ်းယဝ်ႉ၊ ႁဝ်းၵႂႃႇႁၢမ်ႈၶဝ်ၵေႃႈမၼ်းဢမ်ႇပေႃးထုၵ်ႇ။

ၵူၺ်းၵႃႈ ႁဝ်းၶႂ်ႈလၢတ်ႈၼႆႉတႄႉ ၾဵတ်ႊပုၵ်ႉ ယူႊထုပ်ႊ (YouTube) ဢွၼ်ႊလၢႆႊၸိူဝ်းၼႆႉ ပေႃးႁဝ်းမေႃၸႂ်ႉတိုဝ်းမၼ်းၼႆႉ မၼ်းပဵၼ်ၽွၼ်းလီတႃႇဝၢၼ်ႈမိူင်း၊ ပေႃးဢမ်ႇမေႃၸႂ်ႉတိုဝ်း ပဵၼ်ၽွၼ်းႁၢႆႉတႃႇဝၢၼ်ႈမိူင်းၵူၺ်းဢမ်ႇၵႃး ပဵၼ်ၽွၼ်းၸႃႉပုၼ်ႈတႃႇတူဝ်ၸဝ်ႈၵဝ်ႇထႅင်ႈၵွၼ်ႇ။ ႁဵတ်းသင်လႄႈ ပဵၼ်ၽွၼ်းၸႃႉတူဝ်ၸဝ်ႈၵဝ်ႇၼႆၼႆႉ တူၺ်းဢဝ်ပၼ်ႁႃၵၢၼ်မိူင်းမိူင်းထႆးၼႆႉ၊ ၵွပ်ႈပိူဝ်ႈလၢတ်ႈၼိူဝ်ၾဵတ်ႊပုၵ်ႉ ဢွၼ်ႊလၢႆႊဢွၼ်ႇၵူၺ်း ၸွမ်းၶႃႈၵၼ်ႁႅမ်ၵၼ်တၢႆမႃးၵႃႈႁိုဝ်ယဝ်ႉ၊ ၼႆႉပဵၼ်ပွႆးတိုၵ်းလူမ်းၸွမ်းၾဵတ်ႊပုၵ်ႉ ၸွမ်းၶႃႈၵၼ်ၸွမ်းႁႅမ်ၵၼ် ဢၼ်ၼႆႉပဵၼ်တူဝ်ယၢင်ႇမၼ်း။

ၸင်ႇဝႃႈ ၾဵတ်ႊပုၵ်ႉၼႆႉ ပေႃးႁဝ်းမေႃၸႂ်ႉတိုဝ်းၵေႃႈ ပဵၼ်ၽွၼ်းလီႁဝ်း၊ ပဵၼ်ၽွၼ်းလီဝၢၼ်ႈမိူင်းႁဝ်း၊ ပေႃးႁဝ်းဢမ်ႇမေႃၸႂ်ႉတိုဝ်းၼႆၵေႃႈ ပဵၼ်ၽေးႁဝ်း။ ၵွပ်ႈၼႆလႄႈ ၵူၼ်းၼုမ်ႇႁဝ်းၵေႃႈလီ ၵူၼ်းၵေႃႉလႂ် ၵေႃႈလီ ဢၼ်ယိပ်းၾဵတ်ႊပုၵ်ႉ ဢွၼ်ႊလၢႆႊသေ လၢတ်ႈယူႇတင်းသဵင်ႈၸိူဝ်းၼၼ်ႉၼႆႉ လူဝ်ႇလဵပ်ႈႁဵၼ်း လီလီ၊ ႁူႉငဝ်ႈႁူႉႁၢၵ်ႈမၼ်း၊ ယႃႇပေႁႂ်ႈၵႂႃႇတုမ်ႉတိူဝ်ႉၸုမ်းလႂ်ၸုမ်းၼိုင်ႈ၊ ယႃႇႁႂ်ႈၵႂႃႇတုမ်ႉတိူဝ်ႉ သုၼ်ႇတူဝ်ၽႂ်ၵေႃႉလႂ်၊ ႁႂ်ႈပဵၼ်ၵၢၼ်တိုၵ်းသူၼ်း ပၼ်ၶၢဝ်ႇတႃႇၵူၼ်းမိူင်းႁဝ်းသေ ပိုတ်ႇႁူပိုတ်ႇတႃ ၵူၼ်းမိူင်း ႁဝ်းၵူၺ်း။

မိူၼ်ၼင်ႇႁဝ်းထတ်းသၢင် ၸုမ်းၼၼ်ႉပဵၼ်ၼႆ ၸုမ်းၼႆႉပဵၼ်ၼႆ ၸုမ်းၼႆႉလူဝ်ႇႁဵတ်းၼႆ ႁဝ်းလူဝ်ႇ ပၼ်တၢင်းႁၼ်ထိုင်ၸုမ်းၼႆႉၸိူင်ႉၼႆ ၸဵမ်ၵႂႃႇၸိူဝ်းၼႆႉ မၼ်းဢမ်ႇမီးၽွၼ်းလီ၊ တူဝ်ၶဝ်ၵေႃႈဢမ်ႇမီး ၽွၼ်းလီ၊ ၶဝ်လၢတ်ႈဢွၵ်ႇၸိူဝ်းၼၼ်ႉၵေႃႈဢမ်ႇမႅၼ်ႈလွၵ်းမႅၼ်ႈလၢႆး၊ မၼ်းၵေႃႈဢမ်ႇမီးၽွၼ်းလီ၊ မၼ်းႁဵတ်းႁႂ်ႈၵူၼ်းမိူင်းၸိူဝ်းဢၼ်ဢမ်ႇႁူႉသင် လႆႈငိၼ်းလႆႈႁၼ်သေၵႂင်ၵႂႃႇပႅတ်ႈ၊ ၸိူင်ႉၼၼ်ၼႆႉ ၽွၼ်းလီမၼ်းဢမ်ႇမီးတင်းသွင်ၾၢႆႇ။ ဢၼ်ၼႆႉၶႂ်ႈၾၢင်ႉတိူၼ်ပၼ် ၽူႈယိပ်းၾဵတ်ႊပုၵ်ႉ ႁဝ်းၶဝ် တင်းသဵင်ႈ ႁႂ်ႈမီးပၢႆးဝူၼ်ႉလီလီ ႁႂ်ႈလဵပ်ႈႁဵၼ်းၶေႃႈမုလ်းလီလီ၊ ႁႂ်ႈပဵၼ်ၽွၼ်းလီတႃႇ ၸိူဝ်ႉၶိူဝ်းႁဝ်း တၢင်းၼႃႈ။ ဢၼ်လႃႇၵၼ် ဢၼ်သႄႉၼႄႉၵၼ်ယူႇၸိူဝ်းၼႆႉ ယႃႇဝႃႈတေမီးၽွၼ်းလီ ၽွၼ်းႁၢႆႉယင်းမႃး ၸူးၶိုၼ်းတူဝ်ၸဝ်ႈၵဝ်ႇၵွၼ်ႇ။

ထၢမ် – ၸိုင်ႈတႆးၼႆႉ မူႇၸုမ်းၼမ်၊ ၸုမ်းယိပ်းၵွင်ႈၵၢင်ႇၼမ်၊ မိူဝ်ႈပီပူၼ်ႉမႃးၸိူဝ်းၼႆႉၵေႃႈ ထိုင်တီႈပေႃး ပဵၼ်ပၢင်တိုၵ်းၵၼ်မႃး။ ၼင်ႇႁိုဝ် ၸိုင်ႈတႆး ပေႃးတေမိူၼ်ၶိုၼ်း ၵွၼ်ႇၸုမ်းသိုၵ်းၼေႇဝုၼ်းယိပ်းဢႃႇၼႃႇ၊ ၵွၼ်ႇပႆႇဢဝ်ၵွၼ်းၶေႃ 1948 ၼၼ်ႉ ၵိုင်ႇလီႁဵတ်းၸိူင်ႉ ႁိုဝ်ၽွင်ႈၶႃႈ?။

တွပ်ႇ-ပေႃးတႄႉတႄႉမၼ်း MTA ဝၢင်းၶိူင်ႈယဝ်ႉ ႁဝ်းဢမ်ႇဝၢင်းၼႆႉ ႁဝ်းၶတ်းၸႂ်ၵၢၼ်ၽွမ်ႉႁူမ်ႈမႃး တႃႇသေႇ၊ ဢွၵ်ႇ MTA ၵႂႃႇယဝ်ႉၵေႃႈ ႁဝ်းဢမ်ႇယိူင်းဢၢၼ်းတႃႇတေတင်ႈမုၵ်ႉၸုမ်း။ ၵွပ်ႈပိူဝ်ႈ ၸဝ်ႈၵၢၼ်းယွတ်ႈ ၸဝ်ႈၸၢႆးယီႈ ႁဝ်းပဵၼ်ဢူၺ်းၵေႃႉၵၼ်သေ ဢၢၼ်းၵႂႃႇႁူမ်ႈၵၼ်သေ ပူၵ်းပွင်၊ တႆးၼႆႉ Automatic သေၽွမ်ႉၵၼ်ယဝ်ႉ ႁဝ်းမီးၶေႃႈယိူင်းဢၢၼ်းတူဝ်ၼၼ်ႉ။ ၵူၺ်းၵႃႈ တၢင်းဢၼ်ႁဝ်း ယိူင်းဢၢၼ်းလႄႈ ငဝ်းလၢႆးဢၼ်ပဵၼ်ယူႇၼၼ်ႉ မၼ်းဢမ်ႇမိူၼ်ၵၼ်၊ ႁဝ်းၸင်ႇလႆႈတင်ႈ မုၵ်ႉၸုမ်းၶိုၼ်ႈမႃး၊ ပေႃးမီးမုၵ်ႉၸုမ်းယဝ်ႉၼႆၵေႃႈ ႁဝ်းၵႃႈလႆႈမီးပေႃႇလသီႇ၊ ႁဝ်းၵႃႈတေလႆႈမီးပၵ်းပိူင်၊ ၵႂႃႇၸူးၸုမ်းလႂ်ၵေႃႈ မိူဝ်ႈၶၢဝ်းၼၼ်ႉ ၼႂ်းမိူင်းတႆးၼႆႉ ပိူၼ်ႈၵိုတ်းသိုၵ်းမူတ်း၊ MTA ဝၢင်းၶိူင်ႈယဝ်ႉ ၶၢဝ်းတၢင်း 15 ပီၼႆႉ မီးၸုမ်းႁဝ်းၸုမ်းလဵဝ် သိုပ်ႇတိုၵ်းယူႇၼႆႉ။

ၵွပ်ႈပိူဝ်ႈသင်လႄႈတိုၵ်း ၵွပ်ႈပိူဝ်ႈဝႃႈ မၢၼ်ႈဢမ်ႇယွမ်းႁပ်ႉဢုပ်ႇႁဝ်း၊ ႁဝ်းပဵၼ်ၸုမ်းဝၢင်းၶိူင်ႈ ၶဝ်ဝႃႈၼႆ၊ မၢၼ်ႈၵေႃႈဝႃႈ ဝၢင်းၶိူင်ႈၵူၺ်း ယွတ်ႈသိုၵ်းၼႆႉ၊ တိုၵ်းၵေႃႈတိုၵ်းၵူၺ်းဢိူဝ်ႈ။ ၸုမ်းလႂ်ႁပ်ႉၵေႃႈတေတိုၵ်းပႃး ၸုမ်းၼၼ်ႉ ၵႂႃႇလွၵ်ႇပႅတ်ႈၸုမ်းၵိုတ်းသိုၵ်းၸိူဝ်းၼႆႉ၊ ၵမ်းၼႆႉ ၸုမ်းၵိုတ်းသိုၵ်းၵေႃႈၵူဝ်၊ ပေႃးၵူဝ်ယဝ်ႉၼႆ ပေႃးၵႂႃႇယူႇၸမ်ၶဝ်ၵေႃႈ ဝႃႈပဵၼ်ပူဝ်ႇႁူဝ်ၶႆႈဝႃႇ၊ ပဵၼ်ပူဝ်ႇမိူင်းႁၢမ်းဝႃႇ၊ လွင်ႈဝႃႈ မၢၼ်ႈႁဵတ်းႁႂ်ႈႁူဝ်ၶႆႈ မၢၼ်ႈႁဵတ်းႁႂ်ႈမိူင်းႁၢမ်း ၶဝ်သမ်ႉဢမ်ႇလၢတ်ႈယဝ်ႉ။ ၸိူဝ်းၼႆႉတႆးႁဝ်းၼႆႉ မၼ်းႁၼ်ၵႅပ်ႈႁၼ်ပွတ်း တေႃႇၵၼ်၊ ထိုင်တီႈ ႁဝ်းပေႃးတင်ႈပဵၼ်မုၵ်ႉၸုမ်းၶိုၼ်ႈမႃး။

ႁဝ်းၶဝ်ႈမႃးလႅၼ်လိၼ်၊ ႁဝ်းၵေႃႈမႃးႁဵတ်းဝႆႉ ႁႂ်ႈၵေႃႇသၢင်ႈၶိုၼ်ႈမႃး တႆးၽွမ်ႉႁူမ်ႈၵၼ်၊ ႁဵတ်းမႃးၸုမ်း ၶွမ်ႊမတီႊတႆး တေႃႇမႃးပဵၼ် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၊ တီႈတႄႉမၼ်း ႁႂ်ႈတႆးတေႃႇတႆး ႁူမ်ႈၵၼ်၊ ပေႃးတႆးတေႃႇတႆးႁဝ်းႁူမ်ႈၵၼ်ယဝ်ႉ ၶႂ်ႈႁႂ်ႈၸၢဝ်းၶိူဝ်းၼႂ်းမိူင်းတႆးတင်းသဵင်ႈၶိုၼ်းမႃးႁူမ်ႈၵၼ် ဢၼ်ၼႆႉပဵၼ်ၶေႃႈယိူင်းဢၢၼ်းႁဝ်း၊ CSSU ၼႆႉ ႁဝ်းဝူၼ်ႉဝႆႉဝႃႈ ႁႂ်ႈမၼ်းပဵၼ်ၸိၵ်းၸွင်ႈၸိူဝ်ႉၸၢတ်ႈ၊ ယႃႇပေႁႂ်ႈၵဵဝ်ႇတၢင်းၵၢၼ်မိူင်း။

ၵၢၼ်ၸိၵ်းၸွင်ႈၸိူဝ်ႉၸၢတ်ႈ ဢၼ်ဝႃႈၼႆႉ ၸဝ်ႈသင်ႇၶရႁၢၼ်းၵေႃႈလူဝ်ႇပႃး၊ ၸဝ်ႈၽူႈမီးပၺ်ႇၺႃႇ ၸဝ်ႈပၢႆးမေႃၶဝ် ဢၼ်မီးၵၢၼ်ထူပ်းမိုဝ်းတင်းသဵင်ႈ လူဝ်ႇပႃး၊ ၸုမ်းၵေႃလိၵ်ႈလၢႆးၾိင်ႈငႄႈ လူဝ်ႇပႃး၊ ပႃႇတီႇလူဝ်ႇပႃး၊ တပ်ႉသိုၵ်းလူဝ်ႇပႃး။ ပေႃးပႃးၸိူင်ႉၼႆယဝ်ႉ ႁႂ်ႈပဵၼ်ၸိၵ်းၸွင်ႈၸိူဝ်ႉၸၢတ်ႈ၊ ယႃႇၵဵဝ်ႇတင်းၵၢၼ်မိူင်း၊ ႁႂ်ႈယူႇၼိူဝ်ၵၢၼ်မိူင်း၊ ႁႂ်ႈပဵၼ်သုၼ်ၵၢင် ႁဝ်းဝူၼ်ႉၸိူင်ႉၼႆ။ ၵူၺ်းမၼ်းဢမ်ႇပဵၼ်မႃးၸိူင်ႉၼႆ၊ ဢၼ်ဢမ်ႇပဵၼ်မႃးၸိူင်ႉၼႆၼႆႉ ၵွပ်ႈပိူဝ်ႈဢဝ် CSSU ႁူမ်ႈၵၼ်သေ ၵႂႃႇလူင်းသူၼ်းတုမ်ၵူၼ်းမိူင်း တႃႇႁဵတ်း ပၢင်ၵုမ်ၵၢၼ်မိူင်းၸိူဝ်ႉၸၢတ်ႈတႆး ND ဢွၼ်တၢင်း၊ ပေႃးၼႆၽူႈၶဵၼ်ႁဝ်းၵေႃႈတူၺ်း။

ဢၼ်လူင်းလၢႆးမိုဝ်းၼႆႉပဵၼ် RCSS လူး၊ ဢမ်ႇၸႂ်ႈ CSSU လူး၊ ၵမ်းလိုၼ်းမႃး ပိူၼ်ႈဢဝ်မၢၵ်ႇတႃပၵ်းသႂ်ႇ CSSU သေ တေႃႇထိုင်ဝႃႈ ဢမ်ႇၸၢင်ႈႁဵတ်းပၢင်ၵုမ်။ ဢၼ်ၼႆႉ မၼ်းပဵၼ်တၢင်းၽိတ်း မိူဝ်ႈႁူမ်ႈၵၼ်လၢႆၾၢႆႇသေ ၵႂႃႇလူင်းသူၼ်းတုမ်ၵူၼ်းမိူင်းၼၼ်ႉ။ ႁႅင်းၸႂ်ၵူၼ်းမိူင်းတႄႉၸူမ်းဢိူဝ်ႈ လီဢိူဝ်ႈ၊ ပေႃးတႃႇၾၢႆႇႁဝ်းတူၺ်းတႄႉ မၼ်းလီဢိူဝ်ႈ၊ ၾၢႆႇၽူႈၶဵၼ်တူၺ်းသမ်ႉ မၼ်းဢမ်ႇလီပႅတ်ႈယဝ်ႉ။ ဢၼ်ၼႆႉပွင်ႇဝႃႈ လွၵ်းလၢႆးႁဝ်းႁဵတ်းမၼ်းၽိတ်းတၢင်းမၼ်း၊ ဝၼ်းမိူဝ်ႈၼႆႉ မၼ်းတေလႆႈမူၼ်ႉမႄး။

ထၢမ် – ပေႃး CSSU ဢမ်ႇၵဵဝ်ႇၵၢၼ်မိူင်း – သမ်ႉတေႁဵတ်းႁိုဝ်ၶႃႈလႃႇ ၵၢၼ်ၽွမ်ႉႁူမ်ႈ၊ ၵၢၼ်ပူတ်းပွႆႇၸိူဝ်ႉၸၢတ်ႈ။

တွပ်ႇ – ၼႂ်းမိူင်းႁူမ်ႈတုမ်တင်းသဵင်ႈၼႆႉၵေႃႈလီ ၼႂ်းမိူင်းတႆးႁဝ်းၵေႃႈလီ လွင်ႈၽွမ်ႉႁူမ်ႈၼႆႉ မၼ်းပဵၼ်ၵၢၵ်ႇသေႃးလူင် ႁဝ်းလၢတ်ႈမႃးတႃႇသေႇ၊ ၵၢၼ်ၽွမ်ႉႁူမ်ႈၼႆႉ လၢတ်ႈဢဝ်လၢႆလၢႆၵူၺ်းဢမ်ႇလႆႈ၊ တႃႇတေလႆႈလွင်ႈၽွမ်ႉႁူမ်ႈၼႆႉ မီး 5 ပိူင်-

1.ငဝ်းလၢႆး (ၵႃႇလတေႇသ) တေလႆႈတူၺ်းငဝ်းလၢႆး။ ပေႃးငဝ်းလၢႆးမၼ်းဢမ်ႇပႆႇပၼ်ၼႆႉ ၵႂႃႇႁဵတ်း လွင်ႈၽွမ်ႉႁူမ်ႈၵေႃႈပဵၼ်လူမ်းၵူၺ်း၊ မၼ်းဢမ်ႇလႆႈ။

2.ႁႅင်းၽူႈမီးၼမ်ႉၵတ်ႉတၢင်းၶႅၼ်ႇ။ ၽူႈမီးၼမ်ႉၵတ်ႉတၢင်းၶႅၼ်ႇၶဝ်ၼႆႉ လူဝ်ႇလူတ်းယွမ်းမႃႇၼသေလႄႈ ဢဝ်ၸိူဝ်ႉၸၢတ်ႈမႃးပဵၼ်ယႂ်ႇ၊ ဢမ်ႇၸႂ်ႈဝႃႈ ပေႃးၵႂႃႇႁူမ်ႈၵၼ် ႁႂ်ႈထွမ်ႇၵႂၢမ်းၵဝ်၊ ႁႂ်ႈထွမ်ႇၵႂၢမ်းမၼ်း ပိူင်လဵဝ် ၼႆ မၼ်းပဵၼ်ၵႂႃႇဢမ်ႇလႆႈ၊ ႁဝ်းလူဝ်ႇထွမ်ႇၵၼ်ဢိူဝ်ႈ။ ၸဝ်ႈမီးပၺ်ႇၺႃႇၶဝ် ၽူႈမီးၼမ်ႉၵတ်ႉတၢင်းၶႅၼ်ႇ ၶဝ်လူဝ်ႇလႆႈဢွၵ်ႇ၊ မူၵ်းဝႆႉယူႇမိူၼ်ၸိူင်ႉၼင်ႇ သႅင်ယူႇၼႂ်းလွႆၵူၺ်းၼႆႉ မၼ်းဢမ်ႇလၢၵ်ႇလၢႆးသင် ပဵၼ်မၢၵ်ႇႁိၼ်ၵူၺ်း။

3.လူဝ်ႇမီးငိုၼ်း။ ပေႃးဢမ်ႇမီးငိုၼ်း မီးပတ်ႊၵျႅတ်ႉ ဢမ်ႇလဵင်ႉလူၵၼ်လႆႈပေႃးၼႆ ဢမ်ႇႁဵတ်းသင်လႆႈသေပိူင်၊ တၵ်းတေလႆႈမီးငိုၼ်းပတ်ႊၵျႅတ်ႉ။

4.ႁဝ်းတၵ်းလႆႈမီးဢဵၼ်ႁႅင်း။ ဢဵၼ်ႁႅင်းသိုၵ်း ဢဵၼ်ႁႅင်းၵူၼ်းမိူင်း ဢဵၼ်ႁႅင်းငိုၼ်းတွင်း ဢဵၼ်ႁႅင်းၵွင်ႈမၢၵ်ႇမိုဝ်ႈၸိုၼ်းယၢမ်း ႁဝ်းလူဝ်ႇလႆႈမီး၊ ဢမ်ႇမီးႁႅင်းၼႆႉၽႂ်ၵေႃႈဢမ်ႇယုမ်ႇႁဝ်း၊ မိူၼ်တင်းၵူၼ်းၶႂ်ႈၵႃႉၶၢႆ မၼ်းမေႃၵႃႉၶၢႆ မၼ်းႁဵၼ်းဢွင်ႇပူၼ်ႉၾၢႆႇၵႃႉၶၢႆမႃး ၵႃႈႁိုဝ်ၵေႃႈယဝ်ႉ မၼ်းဢမ်ႇမီးငိုၼ်း မၼ်းဢမ်ႇမီးတိုၼ်းလၢင်း မၼ်းမီးပၢႆးဝူၼ်ႉၵူၺ်း၊ မၼ်းၵေႃႈပဵၼ်လုၵ်ႈၸၢင်ႈ ပိူၼ်ႈၵူၺ်း။ ပေႃးပဵၼ်လုၵ်ႈၸၢင်ႈပိူၼ်ႈၵေႃႈ ၸၢင်ႈယူႇတိၵ်းတိၵ်း မၼ်းဢမ်ႇၸၢင်ႈၵႃႉၶၢႆသေပွၵ်ႈယဝ်ႉ။

5.ႁဝ်းလူဝ်ႇမီးထိမ်ႊငၢၼ်း/ၸုမ်းႁဵတ်းၵၢၼ်။ ႁဝ်းလူဝ်ႇၸတ်းတင်ႈ ထိမ်ႊငၢၼ်းႁႂ်ႈမၼ်းၵႅၼ်ႇၶႅင်၊ ထိမ်ႊငၢၼ်ႊ ဢၼ်ဝႃႈၼၼ်ႉ မိူၼ်ၼင်ႇ ထဵၵ်ႊၼိၵ်ႊၵိူလ်ႊထိမ်ႊ  (Technical Team) ၊ ပေႃးမီးတူဝ် ၼႆႉၵွၼ်ႇ မၼ်းၸင်ႇၸၢင်ႈႁဵတ်းပၼ်ၵၢၼ်ၵူၼ်းလူင်၊ မၼ်းၸင်ႇၸၢင်ႈၶူၼ်ႉၶႂႃႉသေ ဢွၵ်ႇမႃးလႆႈ။

မိူဝ်ႈလဵဝ်ၼႆႉ ၼႂ်း 5 ဢၼ်ၼႆႉႁဝ်းပႆႇမီး။ 1.ငဝ်းလၢႆး (ၵႃႇလတေႇသ) ၊ မိူဝ်ႈလဵဝ် ၽႂ်ၵေႃႈတိုၵ်ႉထၢင်ႇယႂ်ႇၽႂ် ထၢင်ႇယႂ်ႇမၼ်းယူႇ၊ ၽႂ်ၵေႃႈဝႃႈၽႂ်ၵျႃႉယူႇတိၵ်းတိၵ်း၊ ငဝ်းလၢႆးဢမ်ႇပႆႇပၼ်။ 2.ႁႅင်း၊ ႁႅင်းၵေႃႈပႆႇမီး။ 3.ၵူၼ်းမီးပၺ်ႇၺႃႇၵေႃႈပႆႇဢွၵ်ႇ၊ တိုၵ်ႉယူႇၼႂ်းၽႃႈၵင်ႈသေ ၶျွင်းတူၺ်းမိူၼ်ၼင်ႇၵူၼ်းတူၺ်းၸၢတ်ႈ ၼၼ်ႉၵူၺ်း၊ ယင်းလီ ၶဝ်မေႃၶျွင်းတူၺ်းဝႃႈၽႂ်ႁဵတ်းသင်။ ဢမ်ႇတူၺ်းဢီႈသင် တူၺ်းလိၵ်ႈယူႇ တင်းဝၼ်းတင်းၶိုၼ်း တႃပေႃးတႅၵ်ႇၵေႃႈဢမ်ႇမီးၽွၼ်းလီ။

ထၢမ်- ဝၢၼ်ႈမိူင်းတေႃႈလဵဝ်ၼႆႉ လုမ်ႈၾႃႉၵေႃႈမိပ်ႇႁႅင်း၊ မိူင်းၶႄႇၵေႃႈ ၶိုင်တိုတ်ႉ။ ဢမေႊရိၵၼ်ႊၵေႃႈ ၸၼ်။ ၼင်ႇႁိုဝ်မိူင်းတႆးႁဝ်းပေႃးတေဢမ်ႇတူၵ်းပဵၼ်မၢၵ်ႇမူႉ ၶမ်ၵႄႈႁိပ်ႇၼၼ်ႉ ၵိုင်ႇလီႁဵတ်းသၢင်ႈၵႂႃႇ ၸိူင်ႉႁိုဝ်ၽွင်ႈၶႃႈ?။

တွပ်ႇ- ငဝ်းလၢႆးဢၼ်ၼႆႉ ပဵၼ်ငဝ်းလၢႆးလမ်ႇလွင်ႈတႄႉတႄႉ။ ငဝ်းလၢႆးဢမေႊရိၵၼ်ႊတင်းၶႄႇ မိူဝ်ႈလဵဝ်ၼႆႉ ႁဝ်းဝႆႉမဝ်မၢင်ဢမ်ႇလႆႈ။ ပေႃးႁဝ်းၵႂႃႇတူၵ်းလွၵ်းမၼ်း ယႃႇဝႃႈတေပဵၼ်ၽွၼ်းလီ ယင်းပဵၼ်ၽေးၸၢင်ႈႁၢႆ ၊ ၸၢင်ႈႁၢႆလူၺ်ႈၼႂ်းၸုမ်းဢဵၼ်ႁႅင်းယႂ်ႇၶဝ်ၼႆႉ။

မိူဝ်ႈလဵဝ်ၼႆႉ ပေႃးမႃးတူၺ်းပေႃႇလသီႇၶႄႇၼႆၵေႃႈ မၼ်းၶဵင်ႈၶႅင်ၶိုၼ်ႈမႃး၊ ၶဝ်မီးပေႃႇလသီႇ တႃႇတေမႃးဝႆႉသိုၵ်းမိူင်းမၢၼ်ႈ၊ မိူင်းထႆး၊ မိူင်းၵမ်ႇပူးၶျႃး။ ပေႃးမီးမႃးၸိူင်ႉၼၼ် လူင်ပွင်ၸိုင်ႈမၢၼ်ႈၵေႃႈ တေၶၢၼ်ၸႂ်၊ ဢၼ်မၢၼ်ႈၶဝ်ယူႇၼႂ်းၵႄႈၵၢင် 3 ၾၢႆႇ ဢမေႊရိၵၼ်ႊ၊ ၶႄႇ ယူႊရူပ်ႊ ယူႇၼႂ်းၵၢင်မၼ်းသေ လဵၼ်ႈၵၢၼ်မိူင်း၊ ဢဝ်သၢၵ်ႈသႃႇယူႇၼႂ်းၵႄႈမၼ်း ပူၼ်ႉမႃးၼႆႉ၊ ယူႇမႃးတေႃႇဝၼ်းမိူဝ်ႈၼႆႉၵေႃႈ ၵွပ်ႈပိူဝ်ႈၶဝ်ယူႇၼႂ်းၵႄႈၵၢင်ၼႆႉ။ ၵူၺ်းၵႃႈ သိုပ်ႇၵႂႃႇၼႃႈၼႆႉ ငဝ်းလၢႆးၼႆႉ ႁႂ်ႈယူႇၼႂ်းၵႄႈၵၢင်မၼ်း သေလဵၼ်ႈ ဢမ်ႇလႆႈယဝ်ႉ၊ တေလႆႈယူႇၾၢႆႇလႂ်ၾၢႆႇၼိုင်ႈ ငဝ်းလၢႆးၵမ်ႇၽႃႇမိပ်ႇမႃးၸိူင်ႉၼႆ။ ယႃႇပေဝႃႈမိူင်းမၢၼ်ႈ မိူင်းထႆးၵေႃႈတေႃႈၼၼ်၊ ငဝ်းလၢႆးဝၼ်းမိူဝ်ႈၼႆႉ မိူင်းထႆးၵေႃႈတေလႆႈဝူၼ်ႉလီလီ၊ တေၸုၵ်းၾၢႆႇဢမေႊရိၵၼ်ႊႁႃႉ တေၸုၵ်းၾၢႆႇၶႄႇႁႃႉ။

ပေႃးမႃးတူၺ်းၼႂ်းဢႃႊသျႅၼ်ႊ (ASEAN) ၵေႃႈသမ်ႉဢူၼ်ႈဢွၼ်ႇႁႅင်းဝႆႉ၊ ဢႃႊသျႅၼ်ႊၼႆႉ မၼ်းဢမ်ႇမီးသုၼ်ၵၢင် ဢမ်ႇမီးဢၼ်ၵႅၼ်ႇၶႅင်သင်၊ မၼ်းဢမ်ႇတေႃႇလွင်း/သဵတ်ႈၵႃႈသဵတ်ႈႁူဝ်လႆႈ။ သင်ဝႃႈဢႃႊသျႅၼ်ႊၼႆႉ ၵႅၼ်ႇၶႅင်ၶိုၼ်ႈမႃးၼႆ တေႃႇလွင်းလႆႈၶႄႇ တေႃႇလွင်းလႆႈဢမေႊရိၵၼ်ႊ။ မိူဝ်ႈလဵဝ်ၼႆႉ ဢမ်ႇၸၢင်ႈတေႃႇလွင်းဢီႈသင်လႆႈ။

ၵွပ်ႈပိူဝ်ႈၸိူင်ႉၼႆ တီႈၼႆႈၼႆႉ ဢၼ်လမ်ႇလွင်ႈပဵၼ် ၽူႈဢွၼ်ႁူဝ်ၵၢၼ်ပၢႆးမိူင်းၶဝ်၊ ၵူၼ်းမိူင်းၵေႃႈ လူဝ်ႇလႆႈလဵပ်ႈႁဵၼ်း၊ မိူဝ်ႈလဵဝ်ၵူၼ်းမိူင်းႁဝ်းၼႆႉသမ်ႉ 1.ပၢႆးပၺ်ႇၺႃႇတူၵ်းတႅမ်ႇ၊ ဢမ်ႇႁူႉသင်တႄႉတႄႉ၊ ၵူၼ်းႁူႉမၼ်းဢေႇၼႃႇ၊ ဢၼ်ၼႆႉၵေႃႈပဵၼ်ၽေး။

2.ပၢႆးမၢၵ်ႈမီးၵေႃႈတူၵ်း၊ ၵူၼ်းၽၢၼ်ၼမ်၊ ၵူၼ်းမီးသမ်ႉဢဝ်ပေႉပုၼ်ႈၵူၼ်းၽၢၼ်၊ သမ်ႉလႅၼ်၊ ဢမ်ႇသိုဝ်ႈယူဝ်း၊ ၼမ်ႉၸႂ်ၶႂ်ႈၸွႆႈထႅမ်ၵၼ်ဢမ်ႇမီး၊ မိူင်းတႆးႁဝ်းပဵၼ်ဝႆႉၸိူင်ႉၼႆ ဝၼ်းမိူဝ်ႈၼႆႉ။ ပေႃးပဵၼ်ၸိူင်ႉၼႆ ၵူၼ်းမိူင်းတႆးႁဝ်းၼႆႉ ဢႃႉ—ငဝ်းလၢႆးပဵၼ်ၸိူင်ႉၼႆၼႆႉ လူဝ်ႇဢဝ်တူဝ်လွတ်ႈဢိူဝ်ႈ၊ ပေႃးဢဝ်တူဝ်လွတ်ႈၼႆ ၸိူဝ်ႉၸၢတ်ႈဢမ်ႇလွတ်ႈၵေႃႈ ၵမ်းလိုၼ်းမႃး ၸဝ်ႈၵဝ်ႇၵေႃႈသုမ်းၶိုၼ်းၵူၺ်း ၼင်ႇၵဝ်ႇ၊ ၵူၼ်းမိူင်းၼႆႉ ႁႂ်ႈပေႃးဝူၼ်ႉထိုင်လွင်ႈၸိူဝ်းၼႆႉမၼ်းဢေႇၼႃႇ။

ပေႃးမႃးတူၺ်း ၸုမ်းလုၵ်ႉၽိုၼ်ႉႁဝ်းၵေႃႈ လူဝ်ႇလႆႈလွင်ႈၸွႆႈထႅမ်ၵူၺ်း ႁဝ်းဢမ်ႇမုင်ႈႁၼ်ဢၼႃႇၵၢတ်ႈ တၢင်းၼႃႈ၊ ၵမ်ႈၼမ်လၢႆးလုၵ်ႉၽိုၼ်ႉႁဝ်းဢၼ်ပူၼ်ႉမႃးၼႆႉ မွင်းလႆႈတၢင်းၸွႆႈထႅမ်တီႈမိူင်းၼွၵ်ႈၵူၺ်း၊ ႁႂ်ႈပိုင်ႈဢိင်ၶႅင်ႈၶႃတူဝ်ၵဝ်ႇသေ ၵေႃႇတင်ႈၶိုၼ်ႈမႃးၼႆႉ မၼ်းဢေႇၼႃႇ။ မိူၼ်ၼင်ႇ 7 ၸုမ်း ဢၼ်ယူႇပွတ်းၼိူဝ်ၵေႃႈ မုင်ႈႁၼ်ႁႂ်ႈၶႄႇၸွႆႈ၊ ႁႂ်ႈလႆႈတၢင်းၸွႆႈထႅမ်တီႈၶႄႇ။ ပေႃးလႆႈတၢင်းၸွႆႈထႅမ် တီႈၶႄႇၵေႃႈ ပွင်ႇဝႃႈႁႅင်းၸႂ်ၶိုၼ်ႈယဝ်ႉ ႁႅင်းၸႂ်ယႂ်ႇယဝ်ႉ ႁဝ်းမီးၵွင်ႈယဝ်ႉ ႁဝ်းမီးၵွင်ႈလီလီယဝ်ႉ၊ ႁဝ်းမီးႁႅင်းသိုၵ်းၶိုၼ်ႈမႃးယဝ်ႉ၊ ႁဝ်းဢမ်ႇမုင်ႈႁၼ်ၵၢၼ်မိူင်း ဢၼႃႇၵၢတ်ႈမိူဝ်းၼႃႈ။

သိုၵ်းဢၼ်ဝႃႈၼႆႉ ၵႃႈၶႂ်ႈမီးၵွင်ႈၵၢင်ႇၶႅမ်ႉ၊ ၵႃႈၶႂ်ႈမီးႁႅင်းသိုၵ်းယႂ်ႇ ပေႃးဝႃႈၵၢၼ်ပၢႆးမိူင်း ၵူၼ်းမိူင်းၼႆႉ ဢမ်ႇယွမ်းႁပ်ႉ ဢမ်ႇၵမ်ႉထႅမ်ပေႃးၼႆ ၵမ်းလိုၼ်းမႃးၵေႃႈမၼ်းႁၢႆၵူၺ်း။ ႁဵတ်းသင်ၼႆ မၼ်းလူဝ်ႇဢဝ်တွၼ်ႈသွၼ်မိူဝ်ႈ ပၵပ ၊ မၢဝ်ႇၸိုဝ်ႇတူင်း ပၼ်ႁႅင်းပႃႉတဵင်းတိၼ်ႇ တႃႇတေယိုတ်းမိူင်းမၢၼ်ႈ။

မိူဝ်ႈႁဝ်းၵႂႃႇမိူင်းၶႄႇမိူဝ်ႈပီ 2009 ႁဝ်းလႆႈၵႂႃႇၺႃးၽူႈၶဝ်ႈပႃႇတီႇ ၶွမ်ႊမိဝ်ႊၼိတ်ႉ ပၢၼ်မၢဝ်ႇၸိုဝ်ႇတူင်း၊ ႁဝ်းဢုပ်ႇၺႃးၵၼ် ႁဝ်းထဵင်ၵၼ်။ ဢၼ်သူၸွႆႈမိူင်းမၢၼ်ႈ ပၢၼ်ၶွမ်ႊမိဝ်ႊၼိတ်ႉၼႆႉ သူႁဵတ်းႁႂ်ႈ ၸၢဝ်းၶိူဝ်းၼႂ်းမိူင်းႁဝ်းတႅၵ်ႇယၢႆႈၵၼ်ဢိူဝ်ႈ၊ သူၸွႆႈၶိူဝ်းၵူၺ်း သူဢမ်ႇၸွႆႈမိူင်း၊ သင်ဝႃႈသူၸွႆႈမိူင်း ဢမ်ႇဝႃႈမိူင်းတႆး မိူင်းၶၢင် မိူင်းၶျၢင်း မိူင်းယၢင်းၸိူဝ်းၼႆႉ ႁဝ်းလႆႈမိူင်းမူတ်းယဝ်ႉ၊ ပေႃးၸိူင်ႉၼႆ သူၵေႃႈမီးၽွၼ်းလီ ႁဝ်းၵေႃႈမီးၽွၼ်းလီ။

ၵွပ်ႈပိူဝ်ႈသူၸွႆႈၶိူဝ်းၼႆ သူၵႂႃႇၸွႆႈၶိူဝ်းမၢၼ်ႈ၊ ၵႂႃႇမုင်ႈႁၼ်ဢဝ်ပႃႇတီႇၶွမ်ႊမိဝ်ႊၼိတ်ႉမၢၼ်ႈၵူၺ်း၊ မၢၼ်ႈသမ်ႉဢဝ်ၸၢဝ်းၶိူဝ်းပဵၼ်ၶိူင်ႈမိုဝ်းၶဝ်၊ ဢမ်ႇဝႃႈမၢၼ်ႈလမ် မၢၼ်ႈလႅင် ႁဝ်းဝႃႈႁင်းၶဝ်။ မိူဝ်ႈတႄႇမၼ်း မၼ်းဢၢင်ႈၶႂ်ႈထဵင်ႁဝ်း၊ ၵမ်းလိုၼ်းမႃး မၼ်းယွမ်းႁပ်ႉ ဢိူဝ်ႈၵွပ်ႈပိူဝ်ႈ ႁၼ်ဝႃႈငဝ်းလၢႆး ဢၼ်ပႃႇတီႇၶွမ်ႊမိဝ်ႊၼိတ်ႉႁဵတ်းၼႆႉ မၼ်းဢမ်ႇမႅၼ်ႈလႄႈ ႁဝ်းၸင်ႇၵွႆႈယိုတ်းပႅတ်ႈလွင်ႈၸွႆႈထႅမ် မၼ်းလၢတ်ႈမႃးၸိူင်ႉၼႆ။ ၵွပ်ႈပိူဝ်ႈသူယိုတ်းပႅတ်ႈလွင်ႈၸွႆႈထႅမ်လႄႈ ဝၢႆးသူယိုတ်းလွင်ႈၸွႆႈထႅမ်ၼႆႉ ၶဝ်တႅၵ်ႇၵၼ်ပဵၼ်လၢႆၸုမ်း ႁဝ်းဝႃႈႁင်းၶဝ်ၸိူင်ႉၼႆ။

တီႈၼႆႈၼႆႉ ပဵၼ်တွၼ်ႈသွၼ်တႄႉတႄႉ။ ပေႃးဝႃႈႁဝ်းမၢင်ႇလႆႈၵွင်ႈၵၢင်ႇၵူၺ်း ပၢၼ်ပႃႇတီႇ ၶွမ်ႊမိဝ်ႊၼိတ်ႉၼႆႉ ၵူၼ်းမိူင်းႁဝ်းလႆႈထူပ်းၽေးၵႃႈႁိုဝ်၊ ၵူၼ်းမိူင်းႁဝ်းလႆႈတၢႆပဵၼ်ၵႃႈႁိုဝ်၊ ၽွၼ်းလီမၼ်းသမ်ႉၵႂႃႇတူၵ်းတီႈၽႂ်၊ ၸိူဝ်းၼႆႉလူဝ်ႇပဵၼ်တွၼ်ႈသွၼ် ဝၼ်းမိူဝ်ႈၼႆႉ။ ႁဝ်းမုင်ႈမွင်းၶႂ်ႈလႆႈငိုၼ်းတီႈပိူၼ်ႈ ၶႂ်ႈလႆႈၵွင်ႈၵၢင်ႇပိူၼ်ႈၼႆႉ ၵမ်းလိုၼ်းမႃးၵူၼ်းမိူင်းႁဝ်းတေပၢႆႈ တေတၢႆ တေၽၢၼ်၊ ၵမ်းၼႆႉ ပိူၼ်ႈသမ်ႉတေမႃးယူႇဢိူဝ်ႈ ၽႅၼ်ႇလိၼ်ႁဝ်းၼႆႉ။

ထၢမ်- ယွၼ်းသိုပ်ႇထၢမ်ၶိုၼ်းလွင်ႈ CSSU ဢိတ်းၼိုင်ႈၶႃႈ။ တေႃႈလဵဝ် CSSU ႁဵတ်းသင်ယူႇ၊ ၼင်ႇႁိုဝ် ပေႃးတေပဵၼ်ၵၢၼ်လိူဝ်ၵဝ်ႇၼၼ်ႉ တေၸၢင်ႈႁဵတ်းၸိူင်ႉႁိုဝ်ၵႂႃႇလႆႈၶႃႈ?။

တွပ်ႇ-မိူဝ်ႈလဵဝ် CSSU ၼႆႉၶဝ်ၵေႃႈတႅမ်ႈပၵ်းပိူင်ဝႆႉယူႇ၊ တႃႇမိူဝ်းတၢင်းၼႃႈၼႆႉ ႁႂ်ႈႁဵတ်းႁူဝ်ပဝ်ႈပၼ်ႇၼႆႉ ဢမ်ႇလူဝ်ႇႁဵတ်းယဝ်ႉၼႆၼႆႉ ႁဝ်းၵေႃႈလၢတ်ႈဝႆႉယူႇ။ မိူဝ်ႈလဵဝ် ၶဝ်ၵေႃႈတႅမ်ႈပိူင်မၼ်းဝႆႉဝႃႈ တႃႇၶၢဝ်း တၢင်း ၼႃႈၼႆႉ တေဢမ်ႇမီးယဝ်ႉ ႁူဝ်ပဝ်ႈပၼ်ႇၼႆႉ။ ႁႂ်ႈႁဝ်းၸၢင်ႈလိူၵ်ႈႁႃၵူၼ်းၵၢင်မၼ်း၊ မၼ်းဢမ်ႇ ၸႂ်ႈႁူဝ်ပဝ်ႈၸုမ်းလႂ်၊ ပေႃးပဵၼ်ႁူဝ်ပဝ်ႈၸုမ်းလႂ်ၸုမ်းၼိုင်ႈ မႃးဢွၼ်ႁူဝ်ၼႆ ၵဝ်ၵုမ်ႇၼႄးမႂ်း မႂ်းၵုမ်ႇၼႄး ၵဝ်၊ ၵဝ်ဢမ်ႇယုမ်ႇမႂ်း မႂ်းဢမ်ႇယုမ်ႇၵဝ်၊ ၵဝ်ဢဝ်ဢၶႂၢင်ႉဢယေး/တိုဝ်ႉတၢင်းဢၼ်ၼႆႉ ဢဝ်ၼမ်ႉတွၼ်း မၼ်းသေ မၼ်းပဵၼ်မႃးၸိူင်ႉၼႆၼႆႉ မၼ်းဢမ်ႇလီ၊ ၸင်ႇဝႃႈႁဝ်းလူဝ်ႇႁႃၵူၼ်းၵၢင်မၼ်း၊ ႁႂ်ႈမၼ်းယႃႇပေ ၵႂႃႇယုင်ႈတင်းၵၢၼ်မိူင်း၊ ႁႂ်ႈမၼ်းပဵၼ်ၵၢၼ်ၸိူဝ်ႉၸၢတ်ႈၵူၺ်း၊ ဢၼ်ၼႆႉႁဝ်းလူဝ်ႇလႆႈမႄး၊ တေဢုပ်ႇၵၼ်၊ ပၵ်းပိူင်ႁဝ်းၶဝ်ၵေႃႈမီးဝႆႉယူႇ။ ယူင်ႉၶၢပ်ႈ CSSU ၵေႃႈႁဝ်းပႆႇယႃႉ၊ မိူဝ်ႈလဵဝ်ၼႆႉ ၵွပ်ႈပိူဝ်ႈငဝ်းလၢႆးလၢႆၾၢႆႇ၊ ၵၢၼ်မိူင်းလၢႆၾၢႆႇ၊ ၵွပ်ႈပိူဝ်ႈရေႃးၵႃႇထႅင်ႈသေ ႁဝ်းပႆႇၸၢင်ႈဢုပ်ႇၵၼ်။ မီးသဵၼ်ႈတၢင်းဢၼ်ၼႆႉၵူၺ်းယဝ်ႉ တႃႇတေၵႄႈပၼ်ႁႃၵၢၼ်ၽွမ်ႉႁူမ်ႈ။

ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းလူင်ယွတ်ႈသိုၵ်း ပၼ်ၶၢဝ်းယၢမ်း ၸုမ်းၶၢဝ်ႇၽူႈတွႆႇႁွၵ်ႈ လႆႈႁူပ်ႉထူပ်း တွင်ႈထၢမ်ယႂ်ႇယႂ်ႇၼမ်ၼမ် ယူႇဢေႃႈ။ ၵၢၼ်တွင်ႈထၢမ် ၸွမ်သိုၵ်းလူင်ယွတ်ႈသိုၵ်း တင်းမူတ်း သုတ်းယဝ်ႉတီႈၼႆႈၶႃႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း