By- ၸၢႆးသၢႆလႅင်း
ၵူၼ်းၸၢႆးဢႃယု 19 ပီၵေႃႉၼိုင်ႈ ၺႃးယိုဝ်းတၢႆ တီႈဝဵင်းတႃႈၶီႈလဵၵ်း ၊ ပဵၼ်ၽႂ် ယွၼ်ႉသင်ပလိၵ်ႈတိုၵ်ႉၵူတ်ႇထတ်းယူႇ။
ဝၼ်းတီႈ 31/8/2020 ယၢမ်းၵၢင်ၶမ်ႈ 7 မူင်းၽွင်းမၼ်းၸၢႆးတိုၵ်ႉမီးယူႇၼႂ်းႁိူၼ်းမၼ်း ပွၵ်ႉသၼ်သၢႆးလိုဝ်ႉ သဵၼ်ႈတၢင်းပူင်ႇလူဝ်ႉၼၼ်ႉ မီးၵူၼ်းၶီႇရူတ်ႉၶိူင်ႈလတ်းမႃးၼႃႈႁိူၼ်းသေ ယိုဝ်းသႂ်ႇမၼ်းၸၢႆး။
ၽူႈၵွၼ်းပလိၵ်ႈ ဝဵင်းတႃႈၶီႈလဵၵ်း ၺီႇၺီႇထူၺ်း လၢတ်ႈဝႃႈ – ပဵၼ်ၼမ်ႉမိုဝ်းၽႂ်ယင်းပႆႇႁူႉၶႃႈ။ တိုၵ်ႉၵူတ်ႇထတ်းတူၺ်းယူႇ- ဝႃႈၼႆ။
ၵေႃႉၺႃးယိုဝ်းတၢႆၼႆႉ ၸိုဝ်ႈႁွင်ႉဝႃႈ မွင်ႇသုတမူဝ်း။ မၼ်းၸၢႆးႁဵတ်းၵၢၼ်ပႂ်ႉယၢမ်း တီႈႁူင်းႁႅမ်းဢၼ်ၼိုင်ႈၼႂ်းဝဵင်းတႃႈၶီႈလဵၵ်း။
ဢူးၶျၢၼ်းမျေႉၸေႃး ၽူႈၵွၼ်းၸေႈဝဵင်း တႃႈၶီႈလဵၵ်းလၢတ်ႈဝႃႈ – ႁဝ်းၶႃႈတိုၵ်ႉဢွၼ်ၵၼ်ၵူတ်ႇထတ်းယူႇလႄႈ ပႆႇၸၢင်ႈလၢတ်ႈသင်ၼမ်- ဝႃႈၼႆ။ ဝဵင်းတႃႈၶီႈလဵၵ်းၼႆႉ ပဵၼ်ဝဵင်းဢၼ်ယူႇတီႈလႅၼ်လိၼ် တႆး-ထႆး၊ လွင်ႈၵေႃႇၵၢၼ်ႁၢႆႉၵေႃႈၵမ်းၵမ်းပဵၼ်၊ ဢၼ်ယိုဝ်းၵၼ်တၢႆၵေႃႈၵႆႉၵႆႉမီး။
