ပူႇၵႄႇဝၢၼ်ႈလႄႈ ၽူႈမၢႆဝၢၼ်ႈ ၼႂ်းၸႄႈဝဵင်းၵူတ်ႉၶၢႆ မိူင်းတႆး ပွတ်းႁွင်ႇ ၼၼ်ႉ ၵိၼ်ၼမ်ႉလီႇပူဝ်ႇသေ တႃႇၵေႃႉၼိုင်ႈ တၢႆၵႂႃႇ၊ တင်းဝၢၼ်ႈတင်းသူၼ် ဢွၼ်ၵၼ်ထၢင်ႇထိူမ်ဝႃႈ မီးၵူၼ်းဝၢင်းယႃမိူဝ်ႇ ၼႂ်းတဝ်ႈလီႇပူဝ်ႇ ဝႆႉပၼ်ၶႃၵိၼ်။
ပူၼ်ႉမႃးဢမ်ႇလၢႆဝၼ်းၼႆႉ ၸၢႆးယီႈလူႇ ပူႇၵႄႇဢွၼ်ႇ(ၵႅမ်ၽူႈၵွၼ်းမူႇဝၢၼ်ႈ)လႄႈ ၽူႈမၢႆၼႂ်းဝၢၼ်ႈ ၸၢႆးသၢင်ႇလူႇ ဝၢၼ်ႈၽႃ ဢိူင်ႇမိူင်းယႃႉ ၸႄႈဝဵင်းၵူတ်ႉ ၶၢႆ ၸိုင်ႈတႆးပွတ်းႁွင်ႇ ၼၼ်ႉ ၵိၼ်ၼမ်ႉဝၢၼ်လီပူဝ်ႇ သေလူႉတၢႆ။ ၸၢႆးသၢင်ႇလူႇ ဢၼ်လႆႈၵိၼ်ၺႃး လီႇပူဝ်ႇ မူတ်းတင်းတဝ်ႈၼၼ်ႉ ပဵၼ်ၵိၼ်းလိူဝ်ႁႅင်း၊ ၵႂႃႇယူတ်းယႃ တီႈႁူင်းယႃ တႃႈမိူင်းငႅၼ်း ယႃဢမ်ႇလႆႈသေ လႆႈလူႉတၢႆၵႂႃႇ မိူဝ်ႈဝၼ်းတီႈ 14/8/2020 ယၢမ်းၵၢင်ၶိုၼ်း။ တူဝ် ၵႅမ်ၽူႈၵွၼ်းဝၢၼ်ႈ (ႁိုဝ်) ပူႇၵႄႇဢွၼ်ႇ ၸၢႆးယီႈလူႇ ၵေႃႈ ဝၢႆးၵိၼ်ၼမ်ႉဝၢၼ်လီႇပူဝ်ႇယဝ်ႉ မဝ်းလူမ်ႉလိုမ်းတူဝ်ၵႂႃႇ ၊ ယူတ်းယႃ တၼ်းၶိုတ်း ႁူႉတူဝ် ၶႅၼ်းၶိုၼ်း ဝႃႈၼႆ။
ၸၢႆးယီႈပွႆး ပူႇၵႄႇလူင်ဝၢၼ်ႈၽႃ လၢတ်ႈဝႃႈ – “ ၸႂ်ႈၶႃႈဢေႃႈ ၽူႈမၢႆဝၢၼ်ႈႁဝ်းၶႃႈ လႆႈလူႉတၢႆၵႂႃႇၶႃႈ။ ၼႂ်းတဝ်ႈလီႇပူဝ်ႇၼၼ်ႉ မီး ၵွင်ႉယႃမိူဝ်ႇၶႃႈ ပဵၼ်ႁွႆးမိုဝ်းၽႂ်ႁဵတ်းတႄႉ ဢမ်ႇႁူႉ။ တဝ်ႈလီႇပူဝ်ႇၼၼ်ႉ တင်းမူတ်းမီး 3 တဝ်ႈ။ မႃးတမ်းဝႆႉတီႈႁိူၼ်း ၶႃႈ ႁဝ်း တဝ်ႈၼိုင်ႈ၊ တီႈႁိူၼ်းပူႇၵႄႇဢွၼ်ႇ ၸၢႆးယီႈလူႇတဝ်ႈၼိုင်ႈလႄႈ ႁိူၼ်းၽူႈမၢႆၸၢႆးသၢင်ႇလူႇတဝ်ႈၼိုင်ႈ။ မိူၼ်ၼင်ႇ တီႈႁိူၼ်းၶႃႈတႄႉ တၼ်းတူၺ်းသေ ဢမ်ႇၵိၼ်ၶႃႈ ဢမ်ႇတၼ်းလႆႈပဵၼ်သင်” – ဝႃႈၼႆ။
တဝ်ႈလီႇပူဝ်ႇၼၼ်ႉ မီးဝႆႉတီႈႁိူၼ်းပူႇၵႄႇလူင်၊ ပူႇၵႄႇဢွၼ်ႇလႄႈ ၽူႈမၢႆၼၼ်ႉ ၼိုင်ႈႁိူၼ်းလႂ် 1 တဝ်ႈ တင်း မူတ်းမီး 3 တဝ်ႈ။ တီႈၽႃႁူမ်ႇ(ၵၢႆ) တဝ်ႈလီႇပူဝ်ႇၼၼ်ႉ မီးႁွႆးဢဝ်ၶဵမ်ၸီးပွင်ႇဝႆႉၵူႈတဝ်ႈသေ ဢဝ်ၶီႈတဵၼ်း ဢိုတ်းႁူမ်ႇ တၢင်း ၼိူဝ် မၼ်းဝႆႉ ၸၢႆးတိုၼ်းၶိူဝ်း ၵူၼ်းဢိူင်ႇမိူင်းယႃႉ လၢတ်ႈၼႄၼင်ႇၼႆ။
“ပဵၼ်ၽီမိုဝ်းၽႂ် မႃးဝၢင်းယႃၵေႃႈဢမ်ႇႁူႉ ပူႇၵႄႇလူင်တႄႉ ဢမ်ႇတၼ်းၵိၼ်လႄႈ ဢမ်ႇတၼ်းပဵၼ်သင်၊ ပူႇၵႄႇဢွၼ်ႇ တႄႉ တင်းဢိုၵ်ႉၵမ်းၼိုင်ႈ၊ မဝ်းလူမ်ႉၵႂႃႇ ၵူၼ်းဝၢၼ်ႈဢွၼ်ၵၼ်မိပ်ႇမိပ်ႇၽၼ်ႉၽၼ်ႉပၼ်သေ ၸင်ႇ ႁူႉတူဝ်မႃးၶိုၼ်း။ ၽူႈမၢႆ သမ်ႉတၼ်းၵိၼ်မူတ်းတင်းတဝ်ႈ။ မၼ်းၸၢႆးၵိၼ်ယဝ်ႉသေ ဢၢင်ႈတေၵႂႃႇၽၼ်းမႆႉ မိူဝ်ႈၽွင်းၵႂႃႇ ၸွမ်းတၢင်းၼၼ်ႉ ႁူဝ်မဝ်းႁူဝ်ၶႆႈၼႆသေ ၼႅတ်ႈပွၵ်ႈႁိူၼ်းၽိူဝ်ႇၽႅဝ်တီႈႁိူၼ်းၵေႃႈ ၼွၼ်းလူမ်ႉၵႂႃႇ ဢမ်ႇႁူႉတူဝ်။ ၵူၼ်းဝၢၼ်ႈ ဢွၼ် ၵၼ် ဢဝ်ၵႂႃႇသူင်ႇႁူင်းယႃတႃႈမိူင်းငႅၼ်း။ မေႃယႃၶဝ် လၢင်ႉတွင်ႉပၼ်မၼ်းၸၢႆးသေ ႁူႉတူဝ်မႃးၵႅပ်ႉၼိုင်ႈ ထိုင်မႃး ယၢမ်းၵၢင် ၶိုၼ်း 12 မူင်းၵေႃႈ လူႉသဵင်ႈၵႂႃႇၶႃႈဢေႃႈ” – ၸၢႆးတိုၼ်းၶိူဝ်း ၵေႃႉၸမ်ၸႂ် ၽူႈမၢႆ သၢင်ႇလူႇ ၼၼ်ႉ လၢတ်ႈၼႄၼင်ႇၼႆ။
ဢိင်ၼိူဝ်လွင်ႈၼႆႉ ပဵၼ်ၼမ်ႉမိုဝ်းၽႂ် ၵေႃႉလႂ်မႃးႁဵတ်း ၽႂ်မႃးဝၢင်းဝႆႉၼႆ ဢမ်ႇပႆႇႁူႉ ၊ ၵူၼ်းဝၢၼ်ႈ ၵူၼ်းသူၼ် ပႃးၸဵမ် ၸဝ်ႈၵၢၼ်ႇၸဝ်ႈၵျွင်း ဢွၵ်ႇသဵင်လဵဝ်ၵၼ်ဝႃႈ မီးၵူၼ်းဝၢင်းယႃမိူဝ်ႇ ၼႂ်းတဝ်ႈလီႇပူဝ်ႇ။ ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈ ၵပ်းႁႃ ၽူႈၵွၼ်းႁူင်းယႃ တႃႈမိူင်းငႅၼ်း လၢႆၵမ်းၵေႃႈ ဢမ်ႇႁပ်ႉသၢႆၾူၼ်း တႃႇတွပ်ႇလၢတ်ႈပၼ်။
ပိူင်ပဵၼ် မိူဝ်ႈဝၼ်းတီႈ 6/8/2020 တီႈႁိူၼ်းပူႇၵႄႇလူင် ၸၢႆးယီႈပွႆးလႄႈ ၼၢင်းပၢင်ႇၼၼ်ႉ ၵေႃႉပဵၼ်မေးၼၢင်း လႆႈႁၼ်တဝ်ႈလီႇပူဝ်ႇ သႂ်ႇဝႆႉၼႂ်းထူင် ႁွႆႈဝႆႉႁိမ်းၸဵင်ႇၽႃ ဢၢင်ႈတေၵိၼ် ၽိူဝ်ႇပိုတ်ႇတူၺ်းဢၢႆသႅဝ်မဵၼ်ႁႅင်းလႄႈ ထွၵ်ႇပႅတ်ႈ ဢမ်ႇတၼ်းလႆႈၵိၼ် ဝႃႈၼႆ။
ထိုင်မႃးဝၼ်းတီႈ 7/8/2020 ၼၼ်ႉ တီႈႁိူၼ်းပူႇၵႄႇဢွၼ်ႇ ၸၢႆးယီႈလူး တင်းၼၢင်းၶမ်းမႆႇ မီးတပ်ႉလူင်ပွင်ၸိုင်ႈမၢၼ်ႈ မႃး ၵိုတ်းလိုတ်ႈသဝ်း။ ထိုင်ယၢမ်းၵၢင်ဝၼ်း တပ်ႉသိုၵ်းလူင်ပွင်ၸိုင်ႈမၢၼ်ႈ ဢွၵ်ႇတၢင်းၵႂႃႇ ၸဝ်ႈႁိူၼ်းၼၢင်းၶမ်းမႆႇ ၵႂႃႇႁႃ ၼေႃႇပွၵ်ႈမႃးသေ ႁၼ်တဝ်ႈလီႇပူဝ်ႇၼၼ်ႉ တမ်းဝႆႉၼိူဝ်ၶဵင်ႇ တဝ်ႈၼိုင်ႈ၊ (ဢမ်ႇၵိၼ်မႅၼ်ႈသေ ဢဝ်ၶၢႆႉ ဝႆႉ) ။ ထိုင်မႃး ဝၼ်းတီႈ 10/8/2020 ၵေႃႉပဵၼ်ၸၢႆးယီႈလူး တင်းၼၢင်းၶမ်းမႆႇ ၵႂႃႇၼႃးပွၵ်ႈမႃးႁိူၼ်းသေ ၸၢႆးယီႈလူး မႃးပိုတ်ႇတဝ်ႈလီႇပူဝ်ႇ ႁိုဝ်ႈသႂ်ႇၵွၵ်း တၼ်းလႆႈဢိုၵ်ႉၵိၼ်ၵမ်းၼိုင်ႈ ။ ၼၢင်းၶမ်းမႆႇတႄႉ ဢမ်ႇတၼ်းၵိၼ်။ မၼ်းၸၢႆး ႁူဝ် ၼၵ်းမႃး မဝ်းလူမ်ႉၼွၼ်းၵႂႃႇတီႈႁိူၼ်းသေ ၼၢင်းၶမ်းမႆႇ ၼႅတ်ႈႁွင်ႉၵူၼ်းႁိမ်းႁွမ်းၸိူဝ်းၼၼ်ႉ မႃးၸွႆႈလႄႈ ၶိုၼ်းႁူႉတူဝ် မႃးၶိုၼ်း- ၸၢႆးတိုၼ်းၶိူဝ်း လၢတ်ႈၼႄၼင်ႇၼႆ။
တေႃႇထိုင်ယၢမ်းလဵဝ် ပဵၼ်ၼမ်ႉမိုဝ်းၽႂ် ၊ တၢႆယွၼ်ႉသင်တႄႉတႄႉ ၼႆၾႆႇပၢႆးယူႇလီၵေႃႈ ပႆႇၸၢင်ႈယိုၼ်ယၼ်ပၼ်သင်။ ဢမ်ႇၼၼ် မီးၵူၼ်းပႅင်းၸင်းၵၼ်သေ လၵ်ႉလွမ်ဝၢင်းယႃႈမိူဝ်ႇတႄႉႁိုဝ်ၼႆၵေႃႈ ၸဝ်ႈၼႃႈတီႈယင်းပႆႇပိုၼ်ၽၢဝ်ႇပဵၼ်တၢင်းၵၢၼ်။
