ႁႅင်းၵၢၼ်တႆး လႄႈ ပီႈၼွင်ႉတႆး ၼႂ်းမိူင်းၶႄႇ ႁူမ်ႈၵၼ်လူႇတၢၼ်းတႃႇသၢင်ႈတၢင်းၶိုၼ်ႈထၢတ်ႈလွႆလဵင်း ၼႂ်းၸေႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။
ဝၼ်းတီႈ 6/8/2020 လႄႈ ဝၼ်းတီႈ 17/8/2020 ႁႅင်းၵၢၼ်တႆးႁွတ်ႈမိူင်းၶႄႇ 60 ၵေႃႉႁူမ်ႈၵၼ်တၢၼ်းငိုၼ်းထိုင် ၵေႃႇမတီႇ ၵေႃႇၵွင်းမူးလွႆလဵင်း တင်းမူတ်းငိုၼ်းၶႄႇ 6026 ယႂၼ်ႊ။
ၼွင်ႉလၢဝ် ၸုမ်းတႆးၽွမ်ႉႁူမ်ႈၸွႆႈၸိူဝ်ႉၸၢတ်ႈ (မိူင်းၶႄႇ) လၢတ်ႈဝႃႈ – “လႆႈလူႇတၢၼ်း 2 ၵမ်းၶႃႈ။ 2012 ယႂၼ်ႊၵမ်းၼိုင်ႈလႄႈ 4014 ယႂၼ်ႊၵမ်းၼိုင်ႈ။ လႆႈလူႇတၢၼ်းတီႈ ၸဝ်ႈတူၼ်ၶူး ၵေႃးလိယ ဝတ်ႉၵျွင်း ပွၵ်ႉမၢႆ 4 ဝဵင်းတၢင်ႉယၢၼ်းၶႃႈဢေႃႈ။ ၸဝ်ႈတႃႇၼႃႉတႄႉ ၵမ်ႈၼမ်ပဵၼ်ပီႈၼွင်ႉတႆးဢၼ်ယူႇသဝ်းၼႂ်းမိူင်းတိင် ၊ ၵမ်ႈၽွင်ႈသမ်ႉပဵၼ်ပီႈၼွင်ႉတႆး ဢၼ်မႃးႁဵတ်းၵၢၼ်ၼႂ်းမိူင်းၶႄႇၶႃႈဢေႃႈ။” – ဝႃႈၼႆ။
ယၢမ်းလဵဝ် ပီႈၼွင်ႉၵူၼ်းမိူင်းတၢင်ႉယၢၼ်း တိုၵ်ႉၵေႃႇသၢင်ႈ ထၢတ်ႈၵွင်းမူးတီႈၼိူဝ်လွႆလဵင်း (သုင် 8777 ထတ်း လွႆဢၼ်သုင်သုတ်းၼႂ်းၸိုင်ႈတႆး) ။ တေႁဵတ်းပႃးသိၵ်ႈၶိုၼ်ႈလႆ တႃႇၶိုၼ်ႈလွႆ ၵႂႃႇလူႇတၢၼ်းဝႆႈသႃထၢတ်ႈပႃးထႅင်ႈလူးၵွၼ်ႇ ။
