ငိုၼ်းၸေႈမၢင် 500 ပျႃးဢၼ်ပႃးႁၢင်ႈၸွမ်ႁၢၼ်ဢွင်ႇသၢၼ်းၼၼ်ႉ လူင်ပွင်ၸိုင်ႈ ၼူၵ်ႉယုင်း ဢိတ်ႇဢွၵ်ႇၸႂ်ႉၼႂ်းဝၼ်းတီႈ 19 ၵျူႊလၢႆႊမၢႆတွင်းဝၼ်းၽူႈႁတ်းငၢၼ်မိူင်းႁူမ်ႈတုမ်။
ငိုၼ်းၸေႈမၢင်ဢၼ်ပႃးႁၢင်ႈ ၸွမ်ႁၢၼ်ဢွင်ႇသၢၼ်း ဢၼ်ထုၵ်ႇၽဵဝ်ႈ၊ ၵဵပ်းပႅတ်ႈမိူဝ်ႈပၢၼ်လူင်ပွင်ၸိုင်ႈသိုၵ်း ၼဢၽ ၼၼ်ႉ ၼႂ်းပီၼႆႉၵူၺ်း လူင်ပွင်ၸိုင်ႈၼူၵ်ႉယုင်းၶိုၼ်း ဢိတ်ႇဢွၵ်ႇပိုၼ်ၽႄ 2 ပွၵ်ႈပႃးၼႆႉယဝ်ႉ။ ၵမ်းတီႈ 1 မိူဝ်ႈဝၼ်းတီႈ 7/1/2020 ဢိတ်ႇငိုၼ်းၸေႈ မၢင် 1000 မႂ်ႇဢၼ်ပႃးႁၢင်ႈဢွင်ႇသၢၼ်း၊ ထိုင်ဝၼ်းတီႈ 19/7/2020 ဢိတ်ႇဢွၵ်ႇထႅင်ႈ မၢင် 500 ပျႃး။
ဢၼ်ႁဵတ်းဢွၵ်ႇမၢင်ၸေႈၵမ်းၼႆႉၵေႃႈ ဢမ်ႇတႅမ်ႈပႃး တူဝ်လိၵ်ႈဢၼ်ဝႃႈ မိူင်းႁူမ်ႈတုမ်ၼႆၼၼ်ႉလႄႈ ယူႇတီႈၵူၼ်းမိူင်းၵမ်ႈၽွင်ႈ ထတ်းသၢင်ဝႃႈ ပဵၼ်ၸေႈငိုၼ်းဢၼ်ဢမ်ႇမီးၾၢင်ႁၢင်ႈမိူင်းႁူမ်ႈတုမ်။ လူင်ပွင်ၸိုင်ႈၼူၵ်ႉယုင်း ႁဵတ်းတႃႇပၢင်လိူၵ်ႈတင်ႈ 2020 ၼႆႉၵူၺ်းႁိုဝ် ဝႃႈၼႆ။
ငိုၼ်းၸေႈပၢၼ်ၵဝ်ႇ ဢၼ်ပႃးႁၢင်ႈၸွမ်ႁၢၼ်ဢွင်ႇသၢၼ်း
ၸၢႆးဢေး ၵူၼ်းလႃႈသဵဝ်ႈလၢတ်ႈဝႃႈ – “မိူင်းႁူမ်ႈတုမ်ၼႆႉ မီးၸၢဝ်းၶိူဝ်းလၢႆလၢႆဢၼ်ႁူမ်ႈၵၼ်ယူႇသဝ်းၼႃႇ။ ၶဝ်သမ်ႉဢမ်ႇတႅမ်ႈသႂ်ႇပႃးတူဝ်လိၵ်ႈဢၼ်ဝႃႈ မိူင်းႁူမ်ႈတုမ်ၼႆၼၼ်ႉလူး။ပဵၼ်ဢၼ်လီဝူၼ်ႉဢၼ်ၼိုင်ႈၵႂႃႈ”- ဝႃႈၼႆ။
ၵူၺ်းၵႃႈၵူၼ်းမိူင်းၵမ်ႈၽွင်ႈလၢတ်ႈဝႃႈ ဢၼ်ပႃးႁၢင်ႈဢွင်ႇသၢၼ်းၼႆႉ ၶႅၼ်းလိူဝ်ဢၼ်ပႃးႁၢင်ႈသၢင်ႇသီႈၼၼ်ႉယူႇ- ဝႃႈၼႆ။
“ၵူႈၸိုင်ႈမိူင်းၼႂ်းလုမ်ႈၾႃႉၵေႃႈ ငိုၼ်းပိူၼ်ႈၼၼ်ႉ ပဵၼ်ႁၢင်ႈၽူႈၵတ်ႉၶႅၼ်ႇ ၽူႈၼမ်းမိူင်းပိူၼ်ႈလူး။ ဢမ်ႇမီးႁၢင်ႈတူဝ်သတ်းမိူၼ်မိူင်းမၢၼ်ႈ ”- ၵူၼ်းမိူင်းလႃႈသဵဝ်ႈၵေႃႉၼိုင်ႈ ဢၼ်မႃးထုၵ်ႈငိုၼ်းလိူၼ် ပိၼ်ႊသဵၼ်ႊ လၢတ်ႈတီႈၽူႈတွႆႇႁွၵ်ႈၼင်ႇၼႆ။
မၢင် 500 ပျႃးငိုၼ်းၸေႈမႂ်ႇဢၼ်ပႃးႁၢင်ႈဢွင်ႇသၢၼ်းၼႆႉ တၢင်းၵႂၢင်ႈ 130 မီႊလီႊမီႊတိူဝ်ႊ၊ တၢင်းသုင်မီး 70 မီႊလီႊမီႊတိူဝ်ႊ ၊ ပဵၼ်သီလႅင်ၶွၼ်ႇ၊ တႅမ်ႈဝႆႉတၢင်းၼႃႈဝႃႈ – ယေးငိုၼ်းလူင်ၸိုင်ႈမိူင်းမၢၼ်ႈ – ဝႃႈၼႆဝႆႉ။
(ငိုၼ်းၸေႈမၢင်ဢၼ်ပႃး ႁၢင်ႈဢွင်ႇသၢၼ်းပၢၼ် မၢင် 5- 10-15-25-35- 75- 100 -ၸိူဝ်းၼႆႉ တႅမ်ႈဝႆႉဝႃႈ ယေးငိုၼ်းၸိုင်ႈမိူင်း မိူင်းႁူမ်ႈတုမ် -ပြည်ထေါင်စုမြန်မာနိုင်ငံဘဏ် -ၼႆလွၼ်ႉလွၼ်ႉ။ ထိုင်မႃးမၢင်ငိုၼ်းၸေႈဢၼ်ပႃးႁၢင်ႈသၢင်ႇသီႈ ပၢၼ်သိုၵ်းမၢၼ်ႈၽွင်းငမ်းမိူင်း ပၢၼ်ၼဢၽ ၼဝတ တင်ႈဢဝ်မွၵ်ႈ 1990 မႃးၸိူဝ်းၼႆႉတႄႉ ဢမ်ႇမီးပႃးၶေႃႈၵႂၢမ်းဢၼ်ဝႃႈမိူင်းႁူမ်ႈတုမ် ၼႆၼၼ်ႉယဝ်ႉ ၊တေႃႇထိုင်ယၢမ်းလဵဝ်)
တီႈၼႃႈတၢင်းလင် ငိုၼ်းၸေႈမၢင်ႈ 500 ဝႂ်မႂ်ႇၼႆႉသမ်ႉပဵၼ်ႁၢင် ယေးငိုၼ်းလူင်ၸိူင်ႈမိူင်းမၢၼ်ႈ ။ ၼႃႈယေးငိုၼ်းသမ်ႉမီးပႃးႁၢင်ႈသဝ်တုင်း (ၸွမ်ပိဝ်) ။ တုင်းသမ်ႉပဵၼ်သီလႅင် (မိူၼ်တုင်းပႃႇတီႇၼူၵ်ႉယုင်း NLD )ဝႆႉလႄႈ ဢၼ်ၼႆႉၵေႃႈႁဵတ်းႁႂ်ႈၵူၼ်းမိူင်းၵမ်ႈၼမ် ထတ်းသၢင်လၢတ်ႈထိုင်ၵၼ်ဝႆႉယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ