ၾၢႆႇတပ်ႉသိုၵ်း ယိုၼ်ယၼ်ဢမ်ႇၸၢင်ႈပၼ်ၶိုၼ်း လိၼ်ၵူၼ်းမိူင်းတၢင်ႉယၢၼ်း

ၸွမ်ႁၢၼ်မျိၼ်ႉၼွႆႇ ၵႅမ်ၽွင်းလူင်ၾၢႆႇၵႅတ်ႇၶႄ ၽွင်းတႅၼ်းၵူၼ်းမိူင်း လၢတ်ႈတီႈ ပၢင်ၵုမ်သၽႃး ဝၼ်းတီႈ 15 ၼၼ်ႉဝႃႈ တီႈလိၼ်ပီႈၼွင်ႉ ၵူၼ်းမိူင်းတၢင်ႉယၢၼ်းၼၼ်ႉ ဢမ်ႇမီးၽႅၼ်တေပၼ်ၶိုၼ်း ယွၼ်ႉၾၢႆႇၵူၼ်းမိူင်းဢမ်ႇမီးလၵ်းထၢၼ်ဝႃႈၼႆ။

 ၸၢႆးမွင်ႇပုၼ်ႉ ၽွင်းတႅၼ်းသၽႃးၵူၼ်းမိူင်း ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်တပ်ႉသိုၵ်းယိုတ်းဢဝ်ၵႂႃႇ တီႈလိၼ်ၵူၼ်းမိူင်းတၢင်ႉယၢၼ်း ၸဵမ်မိူဝ်ႈပူၼ်ႉမႃးမွၵ်ႈ 20 ပီၼၼ်ႉ  ၾၢႆႇၵေႃႇမတီႇ ၵူတ်ႇထတ်းၼႃႈလိၼ် တႅပ်းတတ်းမိူဝ်ႈပီ 2018 ဝႃႈ ၾၢႆႇတူၵ်းတၢင်း ၼၼ်ႉဢမ်ႇပႃးၼႂ်းဢၼ်ယိုတ်းၼႆသေ ႁႂ်ႈၵူၼ်းမိူင်း ၽုၵ်ႇသွမ်ႈၶိုၼ်း။ ၵူၺ်းၵႃႈတပ်ႉသိုၵ်းဢမ်ႇယွမ်းပၼ်ၽုၵ်ႇ၊ တေႃႇထိုင် ပီၼႆႉၵေႃႈ ဢမ်ႇၸၢင်ႈၽုၵ်ႇလႄႈ ၸင်ႇလႆႈထၢမ်ၼႂ်းသၽႃးထႅင်ႈၵမ်းၼိုင်ႈၶႃႈဢေႃႈ” – ဝႃႈၼႆ။

တီႈလိၼ်ၵူၼ်းမိူင်း ဢၼ်ၺႃးတပ်ႉသိုၵ်းယိုတ်းဝႆႉ မွၵ်ႈ 3000 ဢေႊၶိူဝ်ႊၼႆႉပဵၼ်တီႈလိၼ် ဝၢၼ်ႈမၢၵ်ႇၶၢမ် ၊ ဝၢၼ်ႈလွႆလူမ်ႇ ၊ မႄႈၼႃးသွမ် ၸိူဝ်းၼႆႉ  ဢၼ်မီးၼႂ်းဢိူင်ႇမၢၼ်ႈၵၢတ်ႈ ၸေႈဝဵင်းတၢင်ႉယၢၼ်း  ။ မီးၾၢႆႇႁွင်ႇဝဵင်းတၢင်ႉယၢၼ်းမွၵ်ႈ 7 လၵ်း။

ပဵၼ်တီႈလိၼ်ၵူၼ်းဝၢၼ်ႈဢၼ်ၽုၵ်ႇသွမ်ႈလဵင်ႉတွင်ႉမႃး ၸဵမ်ပၢၼ်ပူႇမွၼ်ႇၼၢႆးယႃႈ။

တပ်ႉသိုၵ်းလူင်ပွင်ၸိုင်ႈ ယိုတ်းဢဝ်တႃႇႁဵတ်း တီႈၾိုၵ်းၵၢၼ်သိုၵ်း (တိုင်းဗဟို ၈ တပ်မတော်လေ့ကျင့်ရေးကျောင်း  ) ဝႃႈၼႆ။

ၵဵဝ်ႇၵပ်းတီႈလိၼ်တၢင်ႉယၢၼ်းၼႆႉ ၸွမ်ႁၢၼ်မျိၼ်ႉၼွႆႇ တွပ်ႇလၢတ်ႈၼႂ်းသၽႃးဝႃႈ – “ဢမ်ႇမီးလိၼ်လိူဝ်တႃႇပၼ်ၶိုၼ်းၵူၼ်းဝၢၼ်ႈ၊ လိူဝ်ၼၼ်ႉ ၵူၼ်းဝၢၼ်ႈၵေႃႈဢမ်ႇမီးဝႂ်တီႈလိၼ်ဢၼ်တေၼေလၵ်းထၢၼ်သၢၵ်ႈသေႇလႆႈ လႄႈ ဢမ်ႇမီးၽႅၼ်ၵၢၼ်တႃႇပၼ်ၶိုၼ်း”- ဝႃႈၼႆ။

ၸၢႆးမွင်ႇပုၼ်ႉလၢတ်ႈဝႃႈ  ၵူၼ်းဝၢၼ်ႈ လႆႈၵႂႃႇႁႃၽုၵ်ႇသွမ်ႈတီႈမႂ်ႇ သမ်ႉၵႆဝၢၼ်ႈလႄႈ ယၢပ်ႇၽိုတ်ႇၵူႈလွင်ႈလွင်ႈ။ ၵွပ်ႈၼႆ ၸင်ႇလႆႈယွၼ်းၶိုၼ်းတီႈၽုၵ်ႇၵိၼ်ၶိုၼ်း ဝႃႈၼႆ။

“ပဵၼ်သူၼ်ၼဵင်ႈသူၼ်ၶဝ်ႈၵၢၵ်ႇၵူၼ်းဝၢၼ်ႈၶႃႈဢေႃႈ ။ ယၢမ်းလဵဝ် ၵူၼ်းဝၢၼ်ႈလႆႈၵႂႃႇႁႃႁဵတ်းသူၼ် သမ်ႉၵႆဝၢၼ်ႈ။ တႃႇၵႂႃႇမႃးငၢႆႈၼၼ်ႉပိူင်လူင်  ၵူၼ်းဝၢၼ်ႈၶႆႈယွၼ်းၶိုၼ်း တီႈလိၼ်သဵၼ်ႈတၢင်း ဢၼ်ၵႂႃႇမႃးႁႃၵၼ်ဝၢၼ်ႈတေႃႇဝၢၼ်ႈ ။ ၼၼ်ႉၵူၺ်းၵေႃႈၶဝ်ဢမ်ႇပၼ်ၶိုၼ်းလႆႈ  ။ ပဵၼ်ႁိုဝ်ၵေႃႈယဝ်ႉ ယူႇတီႈႁဝ်းၶႃႈတႄ တေမိူဝ်းဢုပ်ႇၵၼ်တင်းၵူၼ်းဝၢၼ်ႈသေ တေၶိုၼ်းမႃးတုၵ်းယွၼ်းထႅင်ႈ ၶႃႈဢေႃႈ ”- မၼ်းၸၢႆးလၢတ်ႈၼင်ႇၼႆ။

မိူဝ်ႈလိူၼ်ၵျုၼ်ႊပူၼ်ႉမႃး ၾၢႆႇၵႅတ်ႇၶႄ ႁဵတ်းပၢင်သပ်းၸႅင်ႈၶၢဝ်ႇ တီႈၼေႇပျီႇတေႃႇ ၼၼ်ႉလၢတ်ႈဝႃႈ ၾၢႆႇ တပ်ႉသိုၵ်းယိုတ်းတီႈလိၼ်ၼႆႉ ႁဵတ်းၸွမ်းၼင်ႇပၵ်းပိူင်မၢႆမီႈလွၼ်ႉလွၼ်ႉ။ မီးၸဝ်ႈသူၼ်ၸဝ်ႈၼႃးၵူၺ်း ပူၼ်ႉပႅၼ်မၢႆမီႈ ဝႃႈၼႆ။

လိူဝ်ၼၼ်ႉလၢတ်ႈပႃးဝႃႈ  တေႃႇထိုင်လိူၼ်မေႊ 2020 ၼႆႉ တပ်ႉသိုၵ်းလႆႈပၼ်တီႈလိၼ်ၵူၼ်းမိူင်းၶိုၼ်း 280000 ဢေႊၶိူဝ်ႊပၢႆယဝ်ႉဝႃႈၼႆ။

ၵူၺ်းၵႃႈ ၼႂ်းမိူင်းႁူမ်ႈတုမ်ၼႆႉ ဢၼ်တပ်ႉသိုၵ်းယိုတ်းဝႆႉတီႈလိၼ် မီးၵႃႈႁိုဝ်ၼႆ ၾၢႆႇတပ်ႉသိုၵ်းဢမ်ႇပိုၼ်ၽၢဝ်ႇပဵၼ်တၢင်းၵၢၼ်တႅတ်ႈတေႃးသေပွၵ်ႈ။