RCSS ဢွၵ်ႇၶေႃႈပိုၼ်ၽၢဝ်ႇ ဝၼ်းသၢၼ်ၶတ်းယႃႈမဝ်းၵမ်လႄႈ ၵၢၼ်ၵႃႉၶၢႆၼွၵ်ႈမၢႆမီႈၵူႈမိူင်းမိူင်း ဢၼ်လႆႈႁဵတ်း သၢင်ႈၵၢၼ်ငၢၼ်း တူင်ႉၼိုင်မႃး ၼႂ်းပီ 2019-2020 ။
မိူဝ်ႈၼႆႉ ဝၼ်းတီႈ 26/06/2020 ပဵၼ်ဝၼ်းသၢၼ်ၶတ်း ၽဵဝ်ႈမူၺ်ႉယႃႈမဝ်းၵမ် လုမ်ႈၾႃႉ။ ယူႇတီႈ ၶွင်ႇသီႇဢဝ်ၶိုၼ်း ၸိုင်းတႆး/တပ်ႉသိုၵ်းၸိုင်ႈတႆး (RCSS/SSA) ဢွၵ်ႇၶေႃႈပိုၼ်ၽၢဝ်ႇ ၸွမ်းၼင်ႇၶွင်ႇသီႇဢဝ်ၶိုၼ်းၸိုင်ႈတႆး တမ်းဝၢင်းပေႃႇလသီႇ ၽဵဝ်ႈမူၺ်ႉယႃႈမဝ်းၵမ်မႃး တင်ႈတႄႇမိူဝ်ႈၵေႃႇတင်ႈ ၶွင်ႇသီႇဢဝ်ၶိုၼ်းၸိုင်ႈတႆးသေ ႁဵတ်းသၢင်ႈၼႃႈၵၢၼ်တႃႇငၢၼ်းမႃး တေႃႇထိုင်ဝၼ်းမိူဝ်ႈၼႆႉ ၼႆယဝ်ႉ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၼႂ်းပီ 2019 – 2020 ၼႆႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး RCSS လႆႈႁဵတ်းသၢင်ႈၵၢၼ်ငၢၼ်း ၽဵဝ်ႈမူၺ်ႉယႃႈမဝ်းၵမ်၊ ၵၢၼ်မူၼ်ႉမႄးတၢင်းယၢမ်ႈ ၵူၼ်းတိတ်းၸပ်းယႃႈမဝ်းၵမ်လႄႈ ၵၢၼ်ပၼ်ပိုၼ်ႉႁူႉ ၵႅတ်ႇၶႄၽေးယႃႈမဝ်းၵမ် ၸိူဝ်းၼႆႉ” ဝႃႈၼႆ။
ယႃႈမဝ်းၵမ် ဢၼ်တီႉၺွပ်းလႆႈ ၼႂ်းပီ 2019 – 2020 ၼႆႉ ယႃႈလမ် 47.117 ၵီႊလူဝ်ႊ၊ ယႃႈၾိၼ်ႇၽိူၵ်ႇ 30.13 ၵီႊလူဝ်ႊ၊ ယႃႈမ 682,461 မဵတ်ႉလႄႈ တီႉၺွပ်းလႆႈၵူၼ်းၵႃႉၶၢႆတေႃႉသူင်ႇယႃႈမဝ်းၵမ် 293 ၵေႃႉ။
လိူဝ်သေၼၼ်ႉ လႆႈမူၼ်ႉမႄးတၢင်းယၢမ်ႈ ပူၵ်းပွင်ပၼ် ၵူၼ်းတိတ်းၸပ်းယႃႈမဝ်းၵမ် ၸဵမ်ၵူၼ်းၸၢႆး ၼၢင်းယိင်း တင်းမူတ်း 1,929 ၵေႃႉ၊ ဢိၵ်ႇ လႆႈပၼ်ပိုၼ်ႉႁူႉၵႅတ်ႇၶႄၽေးယႃႈမဝ်းၵမ် တီႈၵူၼ်းမိူင်းလႄႈ ၵေႃႉသိုၵ်း ၸွမ်းၼႂ်းပိုၼ်ႉတီႈ RCSS မီး 469 ပွၵ်ႈ၊ ၽူႈၶဝ်ႈႁူမ်ႈၸၢႆးယိင်း တင်းမူတ်း 256,363 ၵေႃႉ ၼႆယဝ်ႉ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၼ်းမိူဝ်ႈၼႆႉ ႁဝ်းၶႃႈမီးပၢင်ၵႅဝ်ႈ ဝၼ်းၽဵဝ်ႈယႃႈမဝ်းၵမ် တီႈငဝ်ႈၸိုင်ႈလွႆတႆးလႅင်း။ ယႃႈတႄႉ တေၽဝ်ၼႂ်းမိူင်းၵူၺ်း၊ တီႉလႆႈတီႈလႂ် တေၽဝ်တီႈၼၼ်ႉၵူၺ်း” ဝႃႈၼႆ။
လိူဝ်ၼၼ်ႉ ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ- ၸွမ်းၼင်ႇ မီးၶေႃႈလႆႈၸႂ်တင်းလူင်ပွင်ၸိုင်ႈဝႃႈ တေႁူမ်ႈၵၼ် ၽဵဝ်ႈမူၺ်ႉယႃႈမဝ်းၵမ်ၼႆသေ ပိူဝ်ႈတႃႇႁူမ်ႈမိုဝ်းႁဵတ်းသၢင်ႈၸွမ်းၵၼ်လႆႈၼၼ်ႉ RCSS ၶတ်းၸႂ်ႁဵတ်းသၢင်ႈမႃး ၼင်ႇပွင်ပဵၼ်လႆႈ၊ ယိူင်းဢၢၼ်းတႃႇသွင်ၾၢႆႇႁူမ်ႈၵၼ် ႁဵတ်းသၢင်ႈၵၢၼ်ငၢၼ်းၼႆသေ ယႃႈမဝ်းၵမ်၊ ၵူၼ်းတေႃႉသူင်ႇ ယႃႈလႄႈ ၶူဝ်းၶွင်ၵဵဝ်ႇၶွင်ႈယႃႈ ဢၼ်မုၵ်ႉၸုမ်း တီႉၺွပ်းလႆႈမႃးၸိူဝ်းၼၼ်ႉ လႆႈမွပ်ႈပၼ်တီႈလူင်ပွင်ၸိုင်ႈလႄႈ တပ်ႉမတေႃႇၵႂႃႇ ဝႃႈၼႆ။
ၶူဝ်းၶွင်ၸိူဝ်းလႆႈမွပ်ႈပၼ်ၼၼ်ႉ ယႃႈမႃႉ 78,149 မဵတ်ႉ၊ ယႃႈၾိၼ်ႇၽိူၵ်ႇ 10.61 ၵီႊလူဝ်ႊ၊ ၵူၼ်းတေႃႉသူင်ႇယႃႈမဝ်းၵမ် 9 ၵေႃႉလႄႈ ရူတ်ႉၵႃး(ၵဵင်) 1 လမ်း၊ ရူတ်ႉၶိူင်ႈ 1 လမ်း၊ ၾူၼ်း 1 လုၵ်ႈလႄႈ ငိုၼ်း 170,000 ပျႃး ၼႆယဝ်ႉ။
