သိုၵ်းလူင်ပွင်ၸိုင်ႈမၢၼ်ႈ ယိုဝ်းၵွင်ႈသႂ်ႇႁိူၼ်းၵူၼ်းဝၢၼ်ႈ တီႈသႅၼ်ဝီ 2 လင် ယၢမ်းၵၢင်ၶိုၼ်းလိုၵ်း မၢၵ်ႇၵွင်ႈတိူဝ်ႉ ႁိူၼ်းၵူၼ်းဝၢၼ်ႈ ဢမ်ႇယွမ်း 30 ၵမ်း။
ဝၼ်းတီႈ 6/6/2020 ယၢမ်းၵၢင်ၶိုၼ်း 11 မူင်း၊ သိုၵ်းလူင်ပွင်ၸိုင်ႈမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈ တီႈၶူဝ်တၢင်းၶဝ်ႈဢွၵ်ႇ ဝဵင်းသႅၼ်ဝီ ၼိူဝ်သဵၼ်ႈတၢင်းလူင် လႃႈသဵဝ်ႈ – သႅၼ်ဝီၼၼ်ႉ လၢၵ်ႈၵွင်ႈယိုဝ်းသႂ်ႇႁိူၼ်းၵူၼ်းဝၢၼ်ႈ 2 လင် တီႈဝၢၼ်ႈႁူဝ်တႃႈ ဢိူင်ႇၵွင်းႁေႃ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ပဵၼ်သိုၵ်းမၢၼ်ႈ ဢၼ်ပႂႉႇတီႈႁူဝ်ၶူဝ် တၢင်းၶဝ်ႈဢွၵ်ႇဝဵင်းသႅၼ်ဝီၼၼ်ႉၵမ်းလဵဝ်ၶႃႈယဝ်ႉ။ ၶဝ်တင်ႈၸႂ် ယိုဝ်းသႂ်ႇၼႂ်းဝၢၼ်ႈ ၵမ်းလဵဝ်ၶႃႈဢေႃႈ။ ၶဝ်ဝႃႈႁႄႉရူတ်ႉၶိူင်ႈဢမ်ႇၵိုတ်းသေ ယိုဝ်းၼႆဝႃႇ။ ဝၢႆးၶဝ်ယိုဝ်းယဝ်ႉၼၼ်ႉ ရူတ်ႉၵႃး/ ရူတ်ႉၶိူင်ႈ ၸိူဝ်းၼႆႉ သမ်ႉၵႂႃႇမႃးလႆႈယူႇ မိူၼ်ဝႃႈၶဝ်ၶႂ်ႈယိုဝ်းၵေႃႈယိုဝ်းႁဵတ်းၼႆ။ မိူဝ်ႈၽွင်းၼၼ်ႉ သင်ဝႃႈ ၵူၼ်းဝၢၼ်ႈႁဝ်း ဢွၵ်ႇမႃးတၢင်းၼွၵ်ႈႁိူၼ်းတႄႉ ၺႃးယိုဝ်းတၢႆၼၼ်ႉၶႃႈယဝ်ႉ။ ၵူၼ်းႁိူၼ်းၼၼ်ႉ ဢွၼ်ၵၼ်တူၵ်းၸႂ်သေ ဢမ်ႇလႆႈလပ်းလႆႈၼွၼ်းၶႃႈယဝ်ႉ” ဝႃႈၼႆ။
ႁိူၼ်းၵူၼ်းဝၢၼ်ႈ 2 လင် ဢၼ်ထုၵ်ႇသိုၵ်းလူင်ပွင်ၸိုင်ႈမၢၼ်ႈ ယိုဝ်းသႂ်ႇၼၼ်ႉ တႃႇလင်ၼိုင်ႈ တိူဝ်ႉၺႃးၸွမ်းၽႃႁိူၼ်း၊ ထႅင်ႈလင်ၼိုင်ႈသမ်ႉ တိူဝ်ႉၺႃးၸွမ်းၶိုဝ်ႇ ၸွမ်းၸွမ်ႁိူၼ်း လင်ၶႃးမုင်းႁိူၼ်း ၸိူဝ်းၼႆႉ၊ တင်း 2 လင် မၢၵ်ႇၵွင်ႈတိူဝ်ႉ ဢမ်ႇယွမ်း 30 ၵမ်း/ႁွႆး ၼႆယဝ်ႉ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇတပ်ႉသိုၵ်းလူင်ပွင်ၸိုင်မၢၼ်ႈ မႃးယွမ်းၼွမ်းၸူး တီႈႁိူၼ်းၵူၼ်းဝၢၼ်ႈၶိုၼ်းယူႇ ဝႃႈၼႆ။
ၸၢႆးဝၼ်းလႅင်းၶမ်း သိုပ်ႇလၢတ်ႈဝႃႈ “လွင်ႈၼႆႉသင်ဝႃႈ ၵူၼ်းဝၢၼ်ႈႁဝ်း ဢမ်ႇႁၢႆးငၢၼ်းလၢတ်ႈၼႄတႄႉ ၸဵမ်ၽူႈၵွၼ်းဝၢၼ်ႈ/ဢိူင်ႇလႄႈ ၽူႈတႅၼ်းႁဝ်းၶႃႈ ၸိူဝ်းၼႆႉ ဢမ်ႇလႆႈႁူႉသေၵေႃႉ။ ၵဵဝ်ႇလူၺ်ႈလွင်ႈၼႆႉ ယူႇတီႈၽူႈမီးပုၼ်ႈၽွၼ်းၶဝ် မႃးယွမ်းၼွမ်းၶိုၼ်းတီႈႁိူၼ်းၵူၼ်းဝၢၼ်ႈ ဢၼ်ထုၵ်ႇယိုဝ်းသႂ်ႇၼၼ်ႉယူႇ၊ ၶဝ်လၢတ်ႈဝႃႈ ယႃႇပေတၢင်ႇၼႂ်းၶၢဝ်ႇ ယႃႇပေလၢတ်ႈၼႄၽႂ်ၼႆဝႃႇ။ လွင်ႈၼႆႉ မၼ်းဢမ်ႇထုၵ်ႇမႅၼ်ႈလႃးလႃး မိူဝ်ႈၽုၵ်ႈ မိူဝ်ႈႁိုဝ်းမႃး ၶဝ်ၶႂ်ႈယိုဝ်းထႅင်ႈ မႃးပေႉၵိၼ်ထႅင်ႈၵေႃႈ ပဵၼ်လႆႈ၊ ႁဝ်းၶႃႈမႆႈၸႂ်ၸွမ်းၵူၼ်းဝၢၼ်ႈႁဝ်းၶႃႈဢေႃႈ၊ ပေႃးတၢင်းၼႃႈမႃး ၵူဝ်ၶဝ်ၶႂ်ႈႁဵတ်းတေႃႇၵူၼ်းဝၢၼ်ႈၸိူင်ႉႁိုဝ်ၵေႃႈႁဵတ်း ၵမ်ႉၸႂ်ၶဝ်ၶႃႈဢေႃႈ” ဝႃႈၼႆ။
တီႈၶူဝ်တၢင်းၶဝ်ႈဢွၵ်ႇ ၸႄႈဝဵင်းသႅၼ်ဝီၼႆႉ ပဵၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ပႃႈတႂ်ႈၸၵၶ 16 သႅၼ်ဝီ ပၵ်းယူႇဝႆႉ ဝႃႈၼႆ။
“ၵဵဝ်ႇၵပ်းလွင်ႈၼႆႉ ႁဝ်းၶႃႈ ယူႇတီႈၽူႈတႅၼ်းၵေႃႈ လႆႈတိူင်ႇလၢတ်ႈတီႈၽူႈမီးပုၼ်ႈၽွၼ်း ၽူႈၵဵဝ်ႇၶွင်ႈ ၽူႈထုၵ်ႇလီႁူႉ ၸိူဝ်းၼႆႉ ဝႆႉမူတ်းယဝ်ႉ။ သိုၵ်းမၢၼ်ႈၶဝ်တႄႉ မႃးယွမ်းတွင်းပၢၼ်ႇ ယွမ်းၼွမ်းယူႇ။ ၵူၺ်းၵႃႈ ယိုဝ်းယဝ်ႉသေ မႃးယွၼ်းတွင်းပၢၼ်ႇ ယွမ်းၼွမ်းယူႇတိၵ်းတိၵ်းတႄႉ မၼ်းဢမ်ႇယဝ်ႉၶႃႈ။ ၸိူဝ်းၵူၼ်းပူၼ်ႉပႅၼ်ယိုဝ်းၼၼ်ႉ ထုၵ်ႇဢဝ်တၢမ်ႇ၊ ဢပႅတ်ႈ၊ တူၵ်းၶွၵ်ႈ ၸိူင်ႉႁိုဝ် ဢၼ်ဝႃႈၼၼ်ႉ မၼ်းလူဝ်ႇမီးၶႃႈဢေႃႈ” ၸၢႆးဝၼ်းလႅင်းၶမ်း သပ်းလႅင်းလၢတ်ႈၼႄၼင်ႇၼႆ။
တီႈၶူဝ်ၼႆႉၵူၺ်းၼင်ႇၵဝ်ႇ မိူဝ်ႈဝၼ်းတီႈ 18/11/2019 ယၢမ်းႁူဝ်ၶမ်ႈ မွၵ်ႈ 6 မူင်းပၢႆၼၼ်ႉၵေႃႈ ၸၢႆးသူၺ်ႇဢေး ဢႃယုမွၵ်ႈ 40 ပၢႆ ၺႃးသိုၵ်းလူင်ပွင်ၸိုင်ႈမၢၼ်ႈ ဢၼ်ဢဝ်ႁူမ်ႇလူမ်ႈတီႈၶူဝ်လူင်ၼႆႉ ႁွင်ႉၵိုတ်းသေ ၵူတ်ႇထတ်းၸႅတ်ႈထၢမ် ပေႃႉထုပ်ႉမၼ်းၸၢႆး ထိုင်တီႈ ပေႃးလႆႈမၢတ်ႇၸဵပ်းႁၢဝ်ႈႁႅင်း ႁၢမ်သူင်ႇယူတ်းယႃတူဝ်တီႈႁူင်းယႃသႅၼ်ဝီ။
