လူင်ပွင်ၸိုင်ႈ မိူင်းႁူမ်ႈတုမ် ပိုၼ်ၽၢဝ်ႇ ယိုတ်ႈၶၢဝ်းယၢမ်းထႅင်ႈ တေႃႇထိုင်ၵၢင်လိူၼ်ၵျုၼ်ႊ၊ တႃႇၵုမ်းၵမ်တၢင်းပဵၼ် ၶူဝ်ႊဝိတ်ႉ – 19 တေဢမ်ႇၽႄႈလၢမ်းၼမ်ၼၼ်ႉ ဝႃႈၼႆ။
ဝၼ်းတီႈ 28/5/2020 ယူႇတီႈငဝ်ႈငုၼ်းၶွမ်ႊမတီႊၸၼ်ႉၸိူဝ်ႉၸၢတ်ႈ တႃႇၵုမ်းၵမ်ႁႄႉၵင်ႈလႄႈ ယူတ်းယႃ တၢင်းပဵၼ် ၶူဝ်ႊဝိတ်ႉ – 19 ပိုၼ်ၽၢဝ်ႇဢွၵ်ႇမႃးဝႃႈ တွၼ်ႈတႃႇတေၵုမ်းၵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၼင်ႇႁိုဝ်ပေႃး တေဢမ်ႇၽႄႈလၢမ်းၼႂ်းမိူင်းႁူမ်ႈတုမ် ႁၢဝ်ႈႁႅင်းၼၼ်ႉ ယိုတ်ႈၶၢဝ်းယၢမ်းၵႂႃႇထႅင်ႈ တေႃႇထိုင်ဝၼ်းတီႈ 15/6/2020 ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ မိူဝ်ႈတႄႇမၼ်း ပိုၼ်ၽၢဝ်ႇ ႁၢမ်ႈႁႄႉၵုမ်းၵမ်တၢင်းပဵၼ်ၶူဝ်ႊဝိတ်ႉ – 19 ၼႆႉ တေႃႇထိုင် ဝၼ်းတီႈ 31/5/2020 ။ ၵူၺ်းၵႃႈ ၶိုၼ်းယိုတ်ႈၶၢဝ်းယၢမ်းထႅင်ႈ တေႃႇထိုင် ၵၢင်လိူၼ်ၵျုၼ်ႊ ဝၼ်းတီႈ 15 လွင်ႈၶေႃႈၸီႉသင်ႇ၊ ၶေႃႈပူင်၊ ၶေႃႈႁၢမ်ႈ ဢၼ်လႆႈပိုၼ်ၽၢဝ်ႇဝႆႉၸိူဝ်းၼၼ်ႉ ဢမ်ႇမီးလွင်ႈလႅၵ်ႈလၢႆႈ၊ ဢမ်ႇလူတ်းယွမ်းသင် ႁဵတ်းသၢင်ႈၵႂႃႇမိူၼ်ပၵ်းၵဝ်ႇ ပိူင်ၵဝ်ႇၵူၺ်း ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ “ ၵၢၼ်ပိုၼ်ၽၢဝ်ႇ ယိုတ်ႈၶၢဝ်းယၢမ်းၼႆႉ မၼ်းဢိင်ၼိူဝ်ငဝ်းလၢႆးတၢင်းပဵၼ်၊ ပေႃးဝႃႈ ပဵၼ်မႃးႁၢဝ်ႈႁႅင်းတႄႉၵေႃႈ ထုၵ်ႇလီႁၢမ်ႈယူႇ ၼင်ႇႁိုဝ်တၢင်းပဵၼ်ၼႆႉ တေဢမ်ႇၽႄႈလၢမ်း ၸွတ်ႇၵႂႃႇၵူႈတီႈလႄႈ ႁဵတ်းႁႂ်ႈၵူၼ်းၸပ်းၼမ်။ ၵူၺ်းၵႃႈ ပိုၼ်ၽၢဝ်ႇ ယိုတ်ႈၶၢဝ်းယၢမ်းယဝ်ႉ ပိူင်လူင်မၼ်းလူဝ်ႇႁႂ်ႈလူင်ပွင်ၸိုင်ႈ လူင်းထိုင်ၵူၼ်းမိူင်း ပၼ်တၢင်းႁူႉၵူၼ်းမိူင်းလႄႈ ၸွႆႈထႅမ်ၵူၼ်းမိူင်း ဢၼ်ၼႆႉ လမ်ႇလွင်ႈတီႈသုတ်း” ဝႃႈၼႆ။
ၵူၺ်းၵႃႈ ၼႂ်းၸိုင်ႈတႆးတႄႉ ၸွမ်းၼင်ႇပၢင်ၵုမ် ၸုမ်းလူင်ပွင်ၸိုင်ႈမိူင်းတႆး ဝၼ်းတီႈ 26 လိူၼ်မေႊၼၼ်ႉ တူၵ်းလူင်းလႆႈၸႂ်ၵၼ်ဝႃႈ ႁၢၼ်ႉတၢင်းၵိၼ်လႄႈ ႁၢၼ်ႉၶၢႆၶူဝ်း တေပၼ်ပိုတ်ႇၶိုၼ်းၼႂ်းဝၼ်းတီႈ 1/6/2020 လူၺ်ႈတေလႆႈၸွမ်းမၢႆမီႈဢၼ်တမ်းဝၢင်းဝႆႉပၼ် ဝႃႈၼႆ။
ၸၢႆးႁေႃသႅင်သိုပ်ႇလၢတ်ႈဝႃႈ “ သင်ဝႃႈ ဢမ်ႇမီးဢီႈသင်ႁပ်ႉႁွင်းပၼ်ၵူၼ်းမိူင်း ပုၼ်ႈတႃႇၵူၼ်းမိူင်း ၸိူဝ်းထူပ်းတၢင်းယၢပ်ႇၽိုတ်ႇ မိူၼ်ၼင်ႇ ႁၢမ်ႈလွင်ႈၵႂႃႇမႃး၊ တီႈၵၢတ်ႇၸိူဝ်းၼႆႉ မၼ်းပေႃးတုမ်ႉတိူဝ်ႉၵၢၼ်ႁႃၵိၼ် လဵင်ႉတွင်ႉ ၵူၼ်းမိူင်းယဝ်ႉ။ ပေႃးမိူၼ်မိူင်းပိူၼ်ႈ တၢင်းမိူင်းထႆးတႄႉ လူင်ပွင်ၸိုင်ႈ ပိူၼ်ႈမီးၽႅၼ်ၵၢၼ်ႁပ်ႉႁွင်းပၼ် ၵူၼ်းမိူင်း ၼင်ႇႁိုဝ် ပေႃးတေဢမ်ႇမီးလွင်ႈတုမ်ႉတိူဝ်ႉ ၵၢၼ်ႁႃၵိၼ်လဵင်ႉတွင်းၵူၼ်းမိူင်းၶဝ်ၼၼ်ႉ ၶဝ်မီးၽႅၼ်ႁၢင်ႈႁႅၼ်း ပၼ်ၵူၼ်းမိူင်းဝႆႉ။ သင်ဝႃႈ ႁဝ်းၶႃႈ တိုၵ်ႉယိုတ်ႈၶၢဝ်းယၢမ်းထႅင်ႈသေ ႁၢမ်ႈၵူၼ်းၵႂႃႇတႂ်ႈမိူဝ်းၼိူဝ်ယူႇ သမ်ႉဢမ်ႇမီး ၽႅၼ်ၵၢၼ်ႁပ်ႉႁွင်းပၼ်ၵူၼ်းမိူင်းသင် ယူႇၵႂႃႇမိူၼ်ပၵ်းၵဝ်ႇပိူင်ၵဝ်ႇၶိုၼ်းတႄႉ ဢမ်ႇထုၵ်ႇလီႁဵတ်း” ဝႃႈၼႆ။
တေႃႈလဵဝ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ်ၼႆႉ မီးၵႂႃႇ 206 ၵေႃႉ၊ လူႉတၢႆ 6 ၵေႃႉ၊ ယူတ်းယႃ 74 ၵေႃႉလႄႈ ယႃၶႅၼ်း 126 ၵေႃႉ။ တွၼ်ႈတႃႇ ၼႂ်းမိူင်းတႆးသမ်ႉ တင်းမူတ်းမီးၵူၼ်းၸပ်းတၢင်းပဵၼ် 7 ၵေႃႉ။ တႃႇ 5 ၵေႃႉတႄႉ လႆႈၶႂၢင်ႉလူင်းႁူင်းယႃယဝ်ႉ ၵိုတ်းထႅင်ႈ 2 ၵေႃႉ တိုၵ်ႉယူတ်းယႃတူဝ်ဝႆႉယူႇ ဝႃႈၼႆ၊
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ