ဝၼ်းတီႈ 1/10/2019 ၼႆႉမႃး ၼႂ်းမိူင်းႁူမ်ႈတုမ်မျၢၼ်ႇမႃႇ ပိုၼ်ၽၢဝ်ႇတိုၵ်းသူၼ်းထိုင် ႁႂ်ႈၵူၼ်းမိူင်း ဢွၼ်ၵၼ်ၸႂ်ႉတိုဝ်းတူဝ် လိၵ်ႈယူႊၼီႊၶူတ်ႉ ဢၼ်မီးလၵ်းၸဵင်ၼႂ်းလုမ်ႈၾႃႉ ၼႂ်းၾူၼ်း၊ ၶွမ်ႊၽိဝ်ႊတိူဝ်ႊ လႄႈ ၵၢၼ်သိုဝ်ႇသၢၼ်။

ၸၢႆးတွင်ႉၾႃႉ ၽူႈၶူင်သၢင်ႈ Application လႄႈ ၾၢႆႇ IT လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ပိူၼ်ႈႁႂ်ႈလႅၵ်ႈလၢႆႈၼႆႉ ပဵၼ် ဢၼ် လီၶႃႈ။ တီႈတႄႉမၼ်း ၼႂ်းတႆးႁဝ်းၶႃႈတႄႇတိုၵ်းသူၼ်းၵၼ်ၸႂ်ႉတိုဝ်းၾွၼ်ႉယူႊၼီႊၶူတ်ႉၼႆႉ ၸဵမ်မိူဝ်ႈ ပီ 2013။ ၵမ်းၼႆႉ ပိူၼ်ႈမႃး ပိုၼ်ၽၢဝ်ႇ ႁႂ်ႈၸႂ်ႉပတ်းပိုၼ်ႉၼႂ်းလိူၼ်ဢွၵ်ႊထိူဝ်ႊပိူဝ်ႊၼႆႉၵႂႃႇ လွင်ႈၼႆႉပဵၼ်လွင်ႈလီယွၼ်ႉ မၼ်းပဵၼ်ၾွၼ်ႉ ဢၼ်ဢမ်ႇတုမ်ႉ တိူဝ်ႉၸၢဝ်းၶိူဝ်းလႂ်” ဝႃႈၼႆ။

ၵဵဝ်ႇလူၺ်ႈၵၢၼ်ၸႂ်ႉပိူင်လၵ်းၸဵင် ယူႊၼီႊၶူတ်ႉၼႆႉ ယူႇတီႈၽူႈၵိူဝ်းၵုမ် လူင်ပွင်ၸိုင်ႈမိူင်းႁူမ်ႈတုမ်ၵေႃႈ ယင်းတိုၵ်းသူၼ်း ပၼ်ႁႅင်းႁႂ်ႈၵူၼ်းမိူင်း ဢွၼ်ၵၼ်ၸႂ်ႉတိုဝ်းပိူင်လၵ်းၸဵင် ယူႊၼီႊၶူတ်ႉၼႆႉၵႂႃႇ ယွၼ်ႉဝႃႈမၼ်းမီးၽွၼ်းလီတေႃႇၸိူဝ်ႉ ၸၢတ်ႈမၢၼ်ႈ။

ၸၢႆးတွင်ႉၾႃႉ လၢတ်ႈဝႃႈ“မၢၼ်ႈၶဝ်ၼႆႉ ပေႃႈဝႃႈၶဝ်လႅၵ်ႈလၢႆႈယူႊၼီႊၶူတ်ႉမႃးယဝ်ႉၵေႃႈ တွၼ်ႈတႃႇ Speech to Text ၶဝ်, Text to Speech ၶဝ် ၼႂ်း Machine Learning ၶဝ်ၸိူဝ်းၼႆႉ မၼ်းတေႁူႉၸၵ်းလိၵ်ႈမၢၼ်ႈမႃးလွႆးလွႆး။ ၵွပ်ႈၼႆႉ ပေႃးတႆးႁဝ်း ၸႂ်ႉယူႊၼီႊၶူတ်ႉမႃး ထႅင်ႈဢိတ်းၼိုင်ႈၵေႃႈ ၶိူင်ႈၸၢၵ်ႈ ၸိူဝ်းၼႆႉ တေႁူႉၸၵ်းမႃး ၼႆႉပဵၼ်လိၵ်ႈတႆးၼႆၶႃႈဢေႃႈ” ဝႃႈၼႆ။

တေႃႇဢွင်ႇသၢၼ်းသူႉၵျီႇ ၽူႈၵိူဝ်းၵုမ် ၸွမ်ၸိုင်ႈမိူင်းႁူမ်ႈတုမ် တိုၵ်းသူၼ်းလၢတ်ႈဝႃႈ “ တွၼ်ႈတႃႇဝၢၼ်ႈမိူင်းႁဝ်း ပေႃးတေ ၶိုၼ်ႈယႂ်ႇမႂ်ႇသုင်မုၼ်းလႅင်းၼၼ်ႉ လွင်ႈၼႆႉ ပဵၼ်ၵၢၼ်ငၢၼ်းလမ်ႇလွင်ႈဢၼ်ၼိုင်ႈ၊ ၵွပ်ႈၼႆ ၼႂ်းၶွမ်ႊၽိဝ်ႊတိူဝ်ႊ၊ ၼႂ်း ၾူၼ်း ႁႂ်ႈပေႃးၸၢင်ႈၸႂ်ႉၵႂႃႇ လိၵ်ႈမၢၼ်ႈ၊ ႁႂ်ႈၶဝ်ႈၸွမ်းပိူင်လုမ်ႈၾႃႉၵႂႃႇၼၼ်ႉ တႄႇဢဝ်ဝၼ်း တီႈ 1 လိူၼ်ဢွၵ်ႊထိူဝ်ႊပိူဝ်ႊ ၼႆႉၵႂႃႇ ႁႂ်ႈၽွမ်ႉႁူမ်ႈဢွၼ်ၵၼ်ၸႂ်ႉတိုဝ်းၵႂႃႇ” ဝႃႈၼႆ။

ၸၢႆးတွင်ႉၾႃႉ လၢတ်ႈဝႃႈ “ မိူဝ်ႈဢွၼ်တၢင်း တႄႉၵေႃႈဝႃႈ တၢင်းတႆးၸႂ်ႉလၢႆလၢႆ မၢၼ်ႈဢမ်ႇၸႂ်ႉၼႆႉ မၼ်းတေမီးပၼ်ႁႃ၊ တေႃႈလဵဝ်ၼႆႉ မၢၼ်ႈၵေႃႈၸႂ်ႉယူႊၼီႊၶူတ်ႉ၊ တႆး ၵေႃႈၸႂ်ႉယူႊၼီႊၶူတ်ႉ မၼ်းတေသၢင်ႇထုၵ်ႇ တေဢမ်ႇမီးပၼ်ႁႃ။ ၼိူဝ် ၾဵတ်ႉပုၵ်ႉ လႄႈ ၼႂ်း Messenger ၼၼ်ႉ တွၼ်ႈ တႃႇၼႂ်းမိူင်းမၢၼ်ႈတႄႉ ႁဝ်းၸႂ်ႉယူႊၼီႊၶူတ်ႉ ၸိူဝ်းဢၼ်ၸႂ်ႉၸေႃႇၵျီႇ ၸိူဝ်းၼၼ်ႉ မၼ်းတေ Converter ပဵၼ်ယူႊၼီႊၶူတ်ႉပၼ်ၵႂႃႇ” ဝႃႈၼႆ။

ၼႂ်း Converter ၼၼ်ႉ မၼ်းတေလႅၵ်ႈလၢႆႈပၼ်လိၵ်ႈမၢၼ်ႈလၢႆလၢႆၵူၺ်း တႃႇလိၵ်ႈတႆးတႄႉ တေဢမ်ႇပႃး။ ၼင်ႇႁိုဝ် ပေႃးတေပႃးလိၵ်ႈတႆးမႃးၼၼ်ႉ လူဝ်ႇဢွၼ်ၵၼ်ၶၢႆႉၸူး ၸႂ်ႉယူႊၼီႊၶူတ်ႉၵွၼ်ႇ ၸင်ႇတေလႆႈ ဝႃႈၼႆ။

ၸၢႆးတွင်ႉၾႃႉ လၢတ်ႈဝႃႈ “ ၵဵဝ်ႇၵပ်းပၼ်ႁႃ ၼႂ်းၽဵတ်ႉပုၵ်ႉလႄႈ Messenger ၼၼ်ႉ တွၼ်ႈတႃႇတေသႂ်ႇပႃး Converter တႆးႁဝ်းၶႃႈၼႆႉ ဢွၼ်တၢင်းသုတ်းႁဝ်းၶႃႈလူဝ်ႇလႆႈမီး Script ႁဝ်းဢွၼ်တၢင်းၵွၼ်ႇ ၸင်ႇတေလႆႈ။ လိၵ်ႈတႆးတင်းလိၵ်ႈ မၢၼ်ႈၼႆႉ မၼ်းလူဝ်ႇလႆႈတႅမ်ႈ Script မၼ်းၼမ် တေလႆႈၸႂ်ႉၶၢဝ်းယၢမ်းမၼ်းဢိတ်းၼိုင်ႈ။ တေႃႈလဵဝ် ဢၼ်ၶႃႈႁဵတ်း ဝႆႉတႄႉ မၼ်းတေလႆႈၾၢႆႇတႆးလၢႆလၢႆၵူၺ်း” ဝႃႈၼႆ။

ၵူၼ်းၼုမ်ႇတႆး ၽူႈလဵပ်ႈႁဵၼ်း IT ၵေႃႈလၢတ်ႈဝႃႈ ထုၵ်ႇလီႁဵတ်းႁႂ်ႈတႆးၵူႈၵေႃႉ ႁူႉၸၵ်း ယူႊၼီႊၶူတ်ႉၵွၼ်ႇ။

“ပီႈၼွင်ႉတႆးႁဝ်း ၵမ်းပႃႈၼမ်တႄႉ ပႆႇႁူႉၸၵ်းဝႃႈ လိၵ်ႈတႆးၼႆႉ ဢၼ်လႂ်ပဵၼ် ၸေႃႇၵျီႇတႆး၊ ဢၼ်လႂ်ပဵၼ် ယူႊၼီႊၶူတ်ႉ တႆး။ ၵွပ်ႈၼႆ ပေႃးၼႂ်းတူင်ႇဝူင်း IT တႆးႁဝ်း ႁဵတ်းလႆႈ ပၢင်သပ်းၸႅင်ႈၶၢဝ်ႇ တီႈဢၼ်သပ်းလႅင်းၼႄပၼ်လႆႈ ၵဵဝ်ႇၵပ်းလူၺ်ႈ လွင်ႈယူႊၼီႊၶူတ်ႉလႄႈ ၸေႃႇၵျီႇတႆးၼႆၸိုင်၊ မၼ်းပဵၼ်ၸိူင်ႉႁိုဝ် ႁဵတ်းသင်လႄႈ သမ်ႉတေလႆႈမႃးၸႂ်ႉယူႊၼီႊၶူတ်ႉ လႂ်ၸိူဝ်းၼႆႉ။ ပေႃးမီးပၢင်ၸိူင်ႉၼႆ ယိင်ႈၶႅၼ်းတေၶႅမ်ႉၶႃႈ” ဝႃႈၼႆ။