လူင်ပွင်ၸိုင်ႈမိူင်းႁူမ်ႈတုမ် ပိုၼ်ၽၢဝ်ႇ ႁၢမ်ႈၸတ်းႁဵတ်း ပွႆးလၢမ်းၵူႈလွင်ႈလွင်ႈပႃးၸဵမ် ပွႆးသွၼ်းၼမ်ႉ(သၢင်းၵျၢၼ်ႇ) တေႃႇထိုင် လိူၼ်ၼႃႈ သဵင်ႈ။
မိူဝ်ႈၼႆႉ ဝၼ်းတီႈ 13/3/2020 ယူႇတီႈလုမ်းလူင်ပွင်ၸိုင်ႈမိူင်းႁူမ်ႈတုမ် ဢွၵ်ႇလိၵ်ႈပိုၼ်ၽၢဝ်ႇဝႃႈ ႁၢမ်ႈၸတ်းႁဵတ်း ပွႆးလၢမ်း ယွၼ်ႉဝႃႈ ၵူဝ်ၵူၼ်းမိူင်းၸပ်းတၢင်းပဵၼ်ၶူဝ်ႊရူဝ်ႊၼႃႊၵၼ် ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ တႄႇဢဝ် မိူဝ်ႈၼႆႉ ဝၼ်းတီႈ 13/3/2020 တေႃႇထိုင် ဝၼ်းတီႈ 30/4/2020 ႁၢမ်ႈ ၸတ်းႁဵတ်းပၢင်ပွႆးလၢမ်းလႄႈ ပႃးၸဵမ် ပွႆးသွၼ်းၼမ်ႉ ဢမ်ႇပၼ်ၶႂၢင်ႉၸတ်းႁဵတ်း။ ပွႆးလၢမ်းတၢင်ႇဢၼ်ၵေႃႈ ႁႂ်ႈၵိုတ်းယင်ႉ ၵၼ် ဢမ်ႇၼၼ် ၶၢႆႉလိူၼ်ႈၵႂႃႇ” ဝႃႈၼႆ။
လိူဝ်ၼၼ်ႉ ယူႇတီႈ WHO ၵေႃႈ ပိုၼ်ၽၢဝ်ႇဝႆႉဝႃႈ တၢင်းပဵၼ်ၶူဝ်ႊရူဝ်ႊၼႃႊ (ၶူဝ်ႊဝိတ်ႊ – 19) ၼႆႉယွၼ်ႉဝႃႈ လၢမ်းၽႄႈ ၸပ်းဝႆး တီႈၵူၼ်းၵိုၼ်းၶွၼ်ႈၼမ် ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊရူဝ်ႊၼႃႊ တၢင်းလုမ်ႈၾႃႉၼႆႉ မီးၵႂႃႇ 132,502 ၵေႃႉ၊ တၢႆ 4,967 ၵေႃႉ သိုဝ်ႇၶၢဝ်ႇ South China Morning Post ဢွၵ်ႇဝႆႉ။
