ပၢင်ၵုမ်သၽႃးမိူင်းႁူမ်ႈတုမ် ဢၼ်ၸတ်းႁဵတ်းတီႈၼေႇပျီႇတေႃႇ ၼၼ်ႉ တူဝ်တႅၼ်းသိုၵ်းမၢၼ်ႈ တုၵ်းယွၼ်း ၵႃႈၸႂ်ႉၸၢႆႇၵူႈလွင်ႈလွင်ႈ ၼႂ်းသိုၵ်း 190,000 လၢၼ်ႉၵျၢတ်ႉ။
ဝၼ်းတီႈ 27/5/2020 ၼၼ်ႉ ၸွမ်သိုၵ်းၸဵင်ႇဝိၼ်း ၽွင်းလူင်ၾၢႆႇၵႅတ်ႇၶႄ ယိုၼ်ႈယွၼ်း ၼႂ်းပၢင်ၵုမ် သၽႃးမိူင်းႁူမ်ႈတုမ် ဝႃႈ – “ၽွင်းၶၢဝ်းၶူဝ်ႊဝိတ်ႉ 19 ၼႆႉ ၵူၼ်းမိူင်းဢမ်ႇလႆႈဢွၵ်ႇၼွၵ်ႈႁိူၼ်း။ ၵူၺ်းၵႃႈ ၵူၼ်းသိုၵ်းတႄႉ လႆႈၸုၼ်ႉသၢႆၸႂ် ၶဝ်ႈထိူၼ်ႇၶဝ်ႈပႃႇ သူႈတိုၵ်းၽူႈၶဵၼ်၊ တႃႇႁႂ်ႈဢႃႇၼႃႇဝၢၼ်ႈမိူင်း မၼ်ႈၵိုမ်းယိုၼ်းယၢဝ်းလႄႈ ႁႂ်ႈလႆႈၽိူမ်ႉပၼ်ၵႃႈၸႂ်ႉၸၢႆႇလၢႆး ဝၼ်းၵူၼ်းသိုၵ်း ၸိူဝ်းလႆႈဢွၵ်ႇၼႃႈသိုၵ်း” – ဝႃႈၼႆ။
ၵႃႈၸႂ်ႉၸၢႆႇ Budget ပီ 2020-21 ၼႆႉ သိုၵ်းမၢၼ်ႈ ယိုၼ်ႈယွၼ်းၵႃႈၸႂ်ႉၸၢႆႇ ၼႂ်းသၽႃး တင်းမူတ်း 190,000 လၢၼ်ႉၵျၢတ်ႉ။ ၼႂ်းၼၼ်ႉတႃႇၸႂ်ႉၸၢႆႇတၢင်ႇၸိူဝ်ႉတၢင်ႇပိူင်ၼႂ်းတပ်ႉသိုၵ်း သႂ်ႇဝႆႉ 60,000 လၢၼ်ႉၵျၢတ်ႉ။ တႃႇၸႂ်ႉၸၢႆႇၵူၼ်း သိုၵ်းၵမ်းသိုဝ်ႈသမ်ႉ 20,000 လၢၼ်ႉၵျၢတ်ႉ။ ဢၼ်ၾၢႆႇသိုၵ်းယိုၼ်ႈယွၼ်း ႁႂ်ႈၽိူမ်ႉပၼ် ၵႃႈႁႅင်းၵူၼ်းသိုၵ်း ၸိူဝ်းဢွၵ်ႇၼႃႈသိုၵ်း လုၵ်ႉတီႈၼိုင်ႈ ၼိုင်ႈဝၼ်း 3,000 ၵျၢတ်ႉ ၼၼ်ႉ ႁႂ်ႈ ၶိုၼ်ႈပဵၼ် ၼိုင်ႈဝၼ်း 4800 ၵျၢတ်ႉ။
လိူဝ်ၼၼ်ႉတႃႇတေႃႉသူင်ႇၶူဝ်းသိုၵ်း ဢၼ်ဢွၵ်ႇၼႃႈသိုၵ်းတၢင်းမိူင်းရၶႅင်ႇ ဢၼ်ၶိုၼ်ႈမႃးတၢင်းမိူင်းတႆး သမ်ႉ 1,200 လၢၼ်ႉ။ တႃႇလုမ်းလႃးႁိူၼ်းယေးတီႈယူႇၵူၼ်းသိုၵ်း 1,800 လၢၼ်ႉ- ဝႃႈၼႆ။
ၼႂ်းၵႃႈၸႂ်ႉၸၢႆႇၵူၼ်းသိုၵ်းသွင်မိုၼ်ႇလၢၼ်ႉၵျၢတ်ႉၼၼ်ႉ သၽႃးမိူင်းႁူမ်ႈတုမ် တတ်းဢွၵ်ႇ ၼိုင်ႈ မိုၼ်ႇလၢၼ်ႉၵျၢတ်ႉ၊ လွင်ႈၼႆႉ ဢမ်ႇမီးသဵင်သၢၼ်ၶတ်းလႄႈ တူၵ်းလူင်းၵႂႃႇယဝ်ႉဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈပၵ်းတႃၵၢၼ်မိူင်း ၼႂ်းၸၢဝ်းၶိူဝ်းမၢၼ်ႈ ယင်းလၢတ်ႈဝႃႈ – “ဢၼ်တပ်ႉသိုၵ်းမၢၼ်ႈ ယွၼ်းၵႃႈၸႂ်ႉၸၢႆႇတႃႇတေႃႇသူင်ႇၶူဝ်းသိုၵ်းဝႃႇ တႃႇၽိူမ်ႉပၼ်ၵႃႈႁႅင်းၵူၼ်းဢွၵ်ႇၼႃႈသိုၵ်းဝႃႇၸိူဝ်းၼႆႉ မၼ်းပဵၼ် ၵၢၼ် ႁဵတ်းသိုၵ်းၼႂ်းမိူင်း ဢၼ်ဢွၵ်ႇတိုၵ်း တၢင်းမိူင်းရၶႅင်ႇ၊ မိူင်းၶျၢင်း၊ မိူင်းတႆး ၸိူဝ်းၼႆႉ ၵေႃႈ ပဵၼ်ၸၢဝ်းၶိူဝ်းၼႂ်းမိူင်းၵူၺ်း။ လွင်ႈၼႆႉ ၸၢင်ႈႁဵတ်းႁႂ်ႈ ၾႆးသိုၵ်းၼႂ်းမိူင်းမုၵ်ႉယႂ်ႇမႃးထႅင်ႈ။ လီၵိုတ်း ၵၢၼ်ၽိူမ်ႉထႅမ်ႁႅင်းသိုၵ်း တိုၵ်းတေႃးၵၼ်သေ ယဝ်ႉ လီသၢၼ်မိုဝ်းၵၼ် ၵႂၢတ်ႇလၢင်ႉ တၢင်းပဵၼ်ၶူဝ်ႊဝိတ်ႉ 19 ၵႂႃႇ တေမီးၽွၼ်းလီလိူဝ် “- ဝႃႈၼႆ။
ပီ Budget 2020-21 ၼႆႉ တႃႇၸႂ်ႉၸၢႆႇငိုၼ်းတွင်း ၵူႈႁွင်ႈၵၢၼ် လူင်ပွင်ၸိုင်ႈတင်းမူတ်း လႆႈ 3 မိုၼ်ႇ လၢၼ်ႉပျႃး။ ၼႂ်းၼၼ်ႉ ႁွင်ႈၵၢၼ်ၽွင်းလူင် ၸၢဝ်းၶိူဝ်း လႆႈဢႄႇလိူဝ်သေပိူၼ်ႈ ။ မိူဝ်ႈၶၢဝ်းတၢင်း တေႃႇ ဢွင်ႇသၢၼ်းသူႉၵျီႇ ၵႂႃႇၶိုၼ်ႈလုမ်းတြႃးတီႈ မိူင်းဝၼ်းတူၵ်းၼၼ်ႉ ၾၢႆႇတေႃႇဢွင်ႇသၢၼ်းသူႉၵျီႇ ယိုၼ်ႈယွၼ်းငိုၼ်း 680 လၢၼ်ႉၵျၢတ်ႉ၊ ဢၼ်ၼၼ်ႉၵေႃႈ တူဝ်တႅၼ်းၾၢႆႇသိုၵ်းလုၵ်ႉထၢမ် ၼႂ်းသၽႃး ဝႃႈ ၸွင်ႇၸႂ်ႉငိုၼ်းၸိုင်ႈမိူင်း မႅၼ်ႈလွၵ်းမႅၼ်ႈလၢႆးမၼ်း ႁိုဝ် ဝႃႈၼႆ။
ဢိင်ၶၢဝ်ႇ -သၽႃးႁူမ်ႈတုမ်