ၵုၼ်ၼေႃႇႁိၼ်တႂ်ႈၼမ်ႉပၢင်ႇလၢႆႇၽူး တီႈမိူင်းရၶႅင်ႇလႄႈ ၵူၼ်းမိူင်းမႆႈၸႂ်ၵူဝ်ပဵၼ် သိုဝ်ႊၼႃႊမိ

ပူၼ်ႉမႃး 2-3 ဝၼ်းၼႆႉ ၵုၼ်ၼေႃႇႁိၼ်တႂ်ႈၼမ်ႉပၢင်လၢႆႇ (မၢၼ်ႈႁွင်ႉတၢၼ်ႊတႃႊၵျွၵ်ႉတၢၼ်း/ ထႆးႁွင်ႉပၵႃႊရင်ႊ) ၽူး တီႈၵုၼ်မၢၼ်ႇဢွင်ႇ ၸေႈမိူင်းရၶႅင်ႇ၊ ပဵၼ်လွင်ႈပႅၵ်ႇလၢၵ်ႇဢၼ်ၼိုင်ႈလႄႈ ၵူၼ်းမိူင်းၵူဝ်ပဵၼ် ၼိမိၵ်ႈ ၽႅၼ်ႇလိၼ်ဝႆ ၸၼ်ႉသိုဝ်ႊၼႃႊမိ။

ၵဵဝ်ႇၵပ်းလွင်ႈၼႆႉ ၻွၵ်ႊၻိူဝ်ႊမဵဝ်းတၢၼ်ႉ ၵႅမ်ႁူဝ်ပဝ်ႈၶွမ်ႊမတီႊၽႅၼ်ႇလိၼ်ဝႆ မိူင်းမၢၼ်ႈလၢတ်ႈဝႃႈ  –  “လႅပ်ႈပဵၼ်ၽႅၼ်ႇႁိၼ်တႂ်ႈၼမ်ႉတုမ်ႉဢီးၵၼ်သေ ႁဵတ်းႁႂ်ႈၵုၼ်ၼေႃႇႁိၼ်ၼႆႉသုတ်ႉၶၢႆႉၽူးၶိုၼ်ႈမႃးၵူၺ်း။ ဢမ်ႇထိုင်တီႈလႆႈမႆႈၸႂ်တႃႇပဵၼ် သိုဝ်ႊၼႃႊမိ။ၵွပ်ႈဝႃႈ (သိုဝ်ႊၼႃႊမိ )ၽႅၼ်ႇလိၼ်တႂ်ႈၼမ်ႉပၢင်ႇလၢႆႇသၼ်ႇဝႆႁၢဝ်ႈႁႅင်းပွတ်းမိူင်းရၶႅင်ႇၼႆႉ ပဵၼ်ၵႂႃႇမိူဝ်ႈပူၼ်ႉမႃး 260  ပီၼႆႉၵူၺ်း။ ၸိူင်ႉၼႆၼႆႉ ပေႃးသၼ်ႇပွၵ်ႈၼိုင်ႈယဝ်ႉ လႆႈပႂ်ႉထႅင်ႈမွၵ်ႈ 500 ပီမိူင်းၸင်ႇတေပဵၼ်ႁၢဝ်ႈႁႅင်း။ ”- ဝႃႈၼႆ။

ပွတ်းမိူင်းရၶႅင်ႇၼႆႉ ယၢမ်ႈပဵၼ်ၽႅၼ်ႇလိၼ်ဝႆ သိုဝ်ႊၼႃႊမိ ၸဵမ်မိူဝ်ႈပီ 1762 ပုၼ်ႉ။ ၽွင်းၼၼ်ႉ ႁႅင်းသၼ်ႇဝႆမီး 8 ရိတ်ႉတိူဝ်ႊ ။

ၵူၼ်းမိူင်းၸိတ်ႉတူၺ်ႇ မိူင်းရၶႅင်ႇတႄႉလၢတ်ႈဝႃႈ – “တီႈၵုၼ်မၢၼ်ႇဢွင်ႇၼၼ်ႉ ၵုၼ်ၼေႃႇႁိၼ်ၼႆႉမီးၸဵမ်လႂ်ယူႇ။ ၵူၺ်းၵႃႈ ၼႂ်းဝူင်ႈဝၢင်ႈၼႆႉ ၼမ်ႉပၢင်ႇလၢႆႇႁႅင်ႈယွမ်းလူင်းႁႅင်းၼႃႇလႄႈ ၵုၼ်ၼေႃႇႁိၼ်ဢၼ်မီးပိူၵ်ႇႁွႆၼႆႉၽူးၶိုၼ်ႈမႃးသေ ၵူၼ်းမႃးထၢႆႇႁင်ႈတၢင်ႇၾဵတ်ႉသ်ပုၵ်ႉလႄႈ ပိူၼ်ႈဢွၼ်ၵၼ်သူၼ်ၸႂ် ၵၼ်မႃးၵူၺ်း ” – ဝႃႈၼႆ။

ၵုၼ်ၼေႃႇႁိၼ်တႂ်ႈၼမ်ႉပၢင်လၢႆႇ (တၢၼ်ႊတႃႊၵျွၵ်ႉတၢၼ်း)ၼႆႉပဵၼ်ၼေႃႇႁိၼ် ဢၼ်ဢွၵ်ႇတႂ်ႈပိုၼ်ႉၼမ်ႉပၢင်ႇလၢႆႇ တီႈဢမ်ႇမီးၵူမ်ႇလိၼ်၊ တီႈဢၼ်မီးႁႅင်းလူမ်းမႆႈ 21 ထိုင် 29 ၾႃႊရိၼ်ႊႁၢႆႉ၊ ၵုၼ်ၼေႃႇႁိၼ်ၼႆႉမီးသီ ၶၢဝ်၊ သီၶွင်ႇ၊ သီလိူင်၊ သီၶွၼ်ႇ၊ သီၶဵဝ်ၸိူဝ်းၼႆႉ။ ၵုၼ်ၼေႃႇႁိၼ်ၼႆႉပဵၼ်တီႈယူႇၵုင်ႈႁွႆပူပႃ၊ ယိင်ႈမီးၵုၼ်ႁိၼ်ၼမ် ယိင်ႈပဵၼ်ၾၢင်ႁၢင်ႈပၢင်ႇလၢႆႇမူတ်းသႂ်။ တီႈဢၼ်မီး ၵုၼ်ႁိၼ်တၢၼ်ႊတႃႊၵျွၵ်ႉတၢၼ်း ( ပၵႃႊရင်ႊ) ၼမ်ၼႆႉပဵၼ်တီႈဢၼ်ၸၼ်ၸႂ်ၽူႈဢႅဝ်ႇယဵမ်ႈတွင်ႈတဵဝ်းတီႈၼိုင်ႈ။

ၶေႃႈမုလ်း- MMTimes, News Eleven