ၾူၼ်လူင်လူမ်းလႅင်ႉၽတ်ႉပဝ်ႇႁၢဝ်ႈႁႅင်း ၼႂ်းဝၢင်း ဝတ်ႉၵျွင်းလူင်ၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၶူဝ်းၶွင်သႃႇသၼႃႇလူႉၵွႆတင်းၼမ်၊ ၸဝ်ႈၽူႈၵူၼ်းလီမီးၸေႇတၼႃႇ ႁူမ်ႈလူႇႁွမ်းတၢၼ်းလႆႈ တႃႇမႄးၵုမ်းလုမ်းလႃး။
မိူဝ်ႈဝၼ်းတီႈ 11/5/2020 ဝၢႆးဝၼ်းယၢမ်း 14:30-14:37 မူင်းၼၼ်ႉ ၾူၼ်လူင်လူမ်းလူင် ပႃးတင်း မၢၵ်ႇႁဵပ်း ၽတ်ႉပဝ်ႇႁၢဝ်ႈႁႅင်း ၼႂ်းဢိူင်ႇၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ ႁဵတ်းႁႂ်ႈဝတ်ႉၵျွင်းလူင်ၼႃးဢၢႆႈၶၢၼ်ႉ၊ ၸလွပ်ႈၼၢႆးသိလ် (သႃလႃး)၊ သိုင်ႇႁွင်ႈမိုဝ်ႉၵႅင်၊ ထၢင်ၽၢႆႈ ၸိူဝ်းၼႆႉ လင်ၶႃးမုင်းၵွၵ်းပိဝ် ၵႂႃႇတင်းၼမ်။ လိူဝ်သေၼၼ်ႉ ႁူဝ်ႉဢုတ်ႇဝၢင်းၵျွင်းၵေႃႈ ထုၵ်ႇလူမ်းၽတ်ႉပဝ်ႇၵူၼ်ႇပင်းၵႂႃႇ 11 ႁွင်ႈ-ၼႆယဝ်ႉ။
ၵဵဝ်ႇၵပ်းလွင်ႈၼႆႉ ၸဝ်ႈၶူးဢႃႇၼၼ်ႇတ (မိူင်းသႅင်) ၵႅမ်ၽူႈၵွၼ်းဝတ်ႉ ဝတ်ႉၵျွင်းလူင်ၼႃးဢၢႆႈၶၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ- “လိူဝ်သေတီႈဝတ်ႉၵျွင်းလူင်ယဝ်ႉ ႁိူၼ်းၵူၼ်းဝၢၼ်ႈၵေႃႈၺႃး ဢိတ်းဢိတ်း။ ဢၼ်တုမ်ႉတိူဝ်ႉႁိူၼ်းမီးယူႇ ဝၢၼ်ႈပၢင်ႇႁႆႈ ဢိူင်ႇၼႃးဢၢႆႈၶၢၼ်ႉ တုမ်ႉတိူဝ်ႉလူႉၵွႆ 7 လင်၊ တီႈၼၼ်ႈတိူဝ်ႉႁိူၼ်း 2 လင်၊ တိူဝ်ႉပႃးသိုင်ႇၾႆးၸိူဝ်းၼႆႉ”-ဝႃႈၼႆ။
ၸိူင်ႉႁိုဝ်ၵေႃႈယဝ်ႉ ၽေးၾူၼ်လူင်လူမ်းလႅင်ႉၽတ်ႉပဝ်ႇႁႅင်း မၢၵ်ႇႁဵပ်းတူၵ်းပွၵ်ႈၼႆႉ ၵျွင်းသွမ်းမႂ်ႇ ဢၼ်တိုၵ်ႉသၢင်ႈပႆႇယဝ်ႉတူဝ်ႈလီၼၼ်ႉၵေႃႈ လႆႈထုၵ်ႇလူမ်းလႅင်ႉ ၽတ်ႉၵိူင်းၵႂႃႇဢိတ်းၼိုင်ႈ၊ ၵူၺ်းၵႃႈ ဝတ်ႉၵျွင်းလူင် လႄႈ သိမ်ႇတႄႉ ဢမ်ႇမီးလွင်ႈတုမ်ႉတိူဝ်ႉလူႉၵွႆသင် ၼႆယဝ်ႉ။
ၸဝ်ႈၶူးဢႃႇၼၼ်ႇတ သိုပ်ႇလၢတ်ႈထႅင်ႈဝႃႈ-“လၢႆလၢႆပီပူၼ်ႉမႃးၼႆႉ မိူဝ်ႈပီ 2012 ၼၼ်ႉၵေႃႈတီႈဝတ်ႉ ၸဝ်ႈၶဝ်ၺႃးပွၵ်ႈၼိုင်ႈ၊ မိူဝ်ႈၼၼ်ႉ မၼ်းဢမ်ႇပေႃးႁႅင်းပဵင်းၼႆႉ၊ ပဵၼ်လူမ်းယူဝ်းယူဝ်းၵူၺ်း။ မိူဝ်ႈၼၼ်ႉ ၸဝ်ႈၶဝ်ယူႇဝႆႉၵျွင်းမုင်းၶႃး ဢၼ်ဢဝ်ႁဵၵ်ႇၺၢပ်ႈဝႆႉၼၼ်ႉသေ လူမ်းပတ်ႉပိၼ်ႈၵႂႃႇ ၵေႃႈမီးမႃး။ ၸလွပ်ႈသႃလႃးၼႆႉတႄႉ ပဵၼ်သွင်ပွၵ်ႈပႃးပွၵ်ႈၼႆႉယဝ်ႉ”-ဝႃႈၼႆ။
ဝတ်ႉၵျွင်းလူင်ၼႃးဢၢႆႈၶၢၼ်ႉၼႆႉ မီးတၵ်ႉၵႃႇသတ်ႉထႃးႁူဝ်ၵျွင်း ဝၢၼ်ႈ ၼႃးဢၢႆႈၶၢၼ်ႉ ဝၢၼ်ႈလဵဝ်ၵူၺ်း။ ဝၢၼ်ႈၼႆႉ ယူႇၼႂ်းဢိူင်ႇၼႃးဢၢႆႈၶၢၼ်ႉ ၸႄႈဝဵင်းၵျွၵ်ႉမႄး ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ၊ မီးၾၢႆႇၸၢၼ်းဝဵင်းၵျွၵ်ႉမႄး ယၢၼ်ဝဵင်းမွၵ်ႈ 7 လၵ်းၶိုင်ႈ-ၼႆယဝ်ႉ။
ၵဵဝ်ႇၵပ်းလွင်ႈၼႆႉ ယူႇတီႈဝတ်ႉၵျွင်းလူင်ၼႃးဢၢႆႈၶၢၼ်ႉ ပိုၼ်ၽၢဝ်ႇၵၢဝ်ႇလၢတ်ႈဝႃႈ- သင်ဝႃႈပေႃႈမႄႈ ပီႈၼွင်ႉ တၵ်ႉၵႃႇသတ်ႉထႃးတင်းလၢႆ၊ ၸဝ်ႈၽူႈၵူၼ်းလီမီးၼမ်ႉၸႂ်၊ ၸဝ်ႈၸေႇတၼႃႇလီႁဝ်းၶဝ် ၶႂ်ႈႁူမ်ႈလူႇႁွမ်းတၢၼ်းငိုၼ်းတွင်း ပိူဝ်ႈတႃႇတေမႄးၵုမ်းလုမ်းလႃး ၵျွင်းသုင်းသွမ်းသင်ႇၶၸဝ်ႈ လႄႈ ၸလွပ်ႈၼၢႆးသိလ် ၸိူဝ်းဢၼ်လႆႈလူႉၵွႆၵႂႃႇၼၼ်ႉ ပေႃးၼႆၸိုင် ၵပ်းသိုပ်ႇလူႇတၢၼ်းမႃးလႆႈတီႈ ၸဝ်ႈၶူးဢႃႇၼၼ်ႇတ မၢႆၾူၼ်း 09 422 301 213 လႄႈ ၵေႃႇမတီႇၵျွင်း လုင်းသေႃး မၢႆၾူၼ်း 09 401 134 968 ၼႆႉလႆႈယူႇ- ၼႆယဝ်ႉ။