ၸဝ်ႈသူၼ်ၶဝ်ႈၵၢပ်ႇမုင်ႈမွင်း လႆႈၶၢႆၶဝ်ႈၵၢပ်ႇတေႃႇမိူင်းၶႄႇ

တွၼ်ႈတႃႇ ၸဝ်ႈသူၼ်ၶဝ်ႈၵၢပ်ႇ(ၶဝ်ႈၾႃႉ) ပေႃးတေၸၢင်ႈတေႃႉသူင်ႇၶၢႆၸူး တၢင်းမိူင်းၶႄႇလႆႈၼၼ်ႉ ယူႇတီႈၽူႈၵွၼ်း ၸႄႈတွၼ်ႈမူႇၸေႊ တႅမ်ႈလိၵ်ႈသူင်ႇၸူး တၢင်းၸဝ်ႈၼႃႈတီႈၶႄႇဝႆႉထႅင်ႈယဝ်ႉ ဝႃႈၼႆ။

ဝၼ်းတီႈ 4/5/2020 ၼႆႉ ယူႇတီႈၶွမ်ႊမတီႊၸႄႈတွၼ်ႈမူႇၸေႊ လႆႈႁဵတ်းပၢင်ၵုမ်ဢုပ်ႇဢူဝ်းၵၼ် ထႅင်ႈသေ တႅမ်ႈလိၵ်ႈသူင်ႇၸူး တၢင်းလူင်ပွင်ၸိုင်ႈမိူင်းၶႄႇ၊ တုၵ်းယွၼ်းႁႂ်ႈပိုတ်ႇၽၵ်းတူပၼ် ၸဝ်ႈသူၼ်ၶဝ်ႈၵၢပ်ႇ ႁႂ်ႈလႆႈတေႃႉသူင်ႇၶၢႆၸူး တၢင်းမိူင်းၶႄႇၶိုၼ်း။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ ယူႇတီႈတၢင်းၸဝ်ႈၼႃႈတီႈၶႄႇ လႆႈဢိုတ်းၽၵ်းတူမိူင်း ဢမ်ႇပၼ် ၵူၼ်းၶဝ်ႈဢွၵ်ႇၵႂႃႇမႃး။ ယွၼ်ႉၼၼ် တုမ်ႉတိူဝ်ႉၵၢၼ်ပၢႆးမၢၵ်ႈမီး ၵူၼ်းၼႂ်းပိုၼ်ႉတီႈ လႅၼ်လိၼ်တႆး – ၶႄႇ တင်းၼမ်လၢႆ ဝႃႈၼႆ။

ၸၢႆးၵျေႃႇတဵင်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမူႇၸေႊ လၢတ်ႈတီႈ ၽူႈတွႆႇႁွၵ်ႈဝႃႈ- “ မိူဝ်ႈပူၼ်ႉမႃး ဝူင်ႈပူၼ်ႉ ဝၼ်းပုတ်ႉ (29/4/2020)ၼၼ်ႉ ပၢင်ၵုမ်ၶွမ်ႊမတီႊ ၸႄႈတွၼ်ႈ လႆႈဢုပ်ႇၵၼ်ယဝ်ႉ သေ ဢွၵ်ႇလိၵ်ႈသူင်ႇၸူး လူင်ပွင်ၸိုင်ႈၶႄႇ ႁႂ်ႈပိုတ်ႇပၼ် ၵၢၼ်ၵႃႉၶၢႆ ၸွမ်းလႅၼ်လိၼ်၊ ပၼ်ၵူၼ်းၶဝ်ႈဢွၵ်ႇ ၵႂႃႇမႃး၊ ၵွပ်ႈပိူဝ်ႈဝႃႈ ၶူဝ်းသူၼ်ၼႆႉ မၼ်းဢမ်ႇဝႆႉလႆႈႁိုင်ယဝ်ႉ လႄႈ ႁႂ်ႈၵူၼ်းမိူင်းၸဝ်ႈသူၼ် လႆႈတေႃႉၶဝ်ႈၾႃႉသူင်ႇၸူးၶၢႆတၢင်းမိူင်းၶႄႇ”- ဝႃႈၼႆ။

တႃႇၸဝ်ႈၶဝ်ႈၵၢပ်ႇတေၸၢင်ႈတေႃႉၶဝ်ႈၶၢႆမိူင်းၶႄႇၼၼ်ႉ  ၸဝ်ႈၼႃႈတီႈ တၢင်းၾၢႆႇတိတ်းတေႃႇ ၵၢၼ်ပၢႆးမၢၵ်ႈမီး တီႈ 105 လၵ်းၼၼ်ႉ ႁႂ်ႈငူပ်ႉငီႉပၼ် တၢင်းၾၢႆႇတိတ်းတေႃႇ ၵၢၼ်ပၢႆးမၢၵ်ႈမီးတၢင်းၾင်ႇမိူင်းၶႄႇ ႁႂ်ႈၵူၼ်းၵႃႉၶၢႆ ၸဝ်ႈသူၼ်  ၶဝ်ႈလႆႈတၢင်းၽၵ်းတူ မၢၼ်ႈဝဵင်း၊ တုၵ်းယွၼ်းထိုင်တီႈ လူင်ပွင်ၸိုင်ႈ မိူင်းၶႄႇ –  ဝႃႈၼႆ။

ၸိူင်ႉႁိုဝ်ၵေႃႈယဝ်ႉ တၢင်းၾင်ႇမိူင်းတႆး တႅမ်ႈလိၵ်ႈသူင်ႇၸူး တၢင်းၾၢႆႇလူင်ပွင်ၸိုင်ႈမိူင်းၶႄႇသေတႃႉ တေႃႇထိုင်မႃးဝၼ်းမိူဝ်ႈၼႆႉ ပႆႇတွပ်ႇလၢတ်ႈသင်မႃးၶိုၼ်း ဝႃႈတေပိုတ်ႇ ဢမ်ႇပိုတ်ႇ။ ၵဵဝ်ႇၵပ်းလွင်ႈၼႆႉ ထိုင်မႃး ဝၼ်းတီႈ 4/5/2020 ၼႆႉ ယူႇတီႈၶွမ်ႊမတီႊၸႄႈတွၼ်ႈမူႇၸေႊ ၸင်ႇလႆႈႁဵတ်းလိၵ်ႈ သူင်ႇၸူးတၢင်းမိူင်းၶႄႇထႅင်ႈၵမ်းၼိုင်ႈ-ၼႆယဝ်ႉ။

ၸၢႆးၵျေႃႇတဵင်း သိုပ်ႇလၢတ်ႈဝႃႈ- “တေႃႈထိုင်မိူဝ်ႈလဵဝ်ၼႆႉ တၢင်းၾင်ႇမိူင်းၶႄႇ ပႆႇတွပ်ႇသင်မႃး။ တၢင်းၾင်ႇမိူင်းၶႄႇတႄႉ ၶဝ်လၢတ်ႈဝႃႈ လွင်ႈတႅပ်းတတ်းၼႆႉ ဢမ်ႇၸႂ်ႈတီႈမိူင်းမၢဝ်းၼႆႉ။ တေပႂ်ႉထွမ်ႇ တၢင်းတီႈမိူင်းၶွၼ် တႅပ်းတတ်းပၼ်မႃးၵူၺ်း။ ၵွပ်ႈပိူဝ်ႈၸိူင်ႉၼႆလႄႈ ယူႇတီႈၶွမ်ႊမတီႊၸႄႈတွၼ်ႈ မူႇၸေႊၵေႃႈ ၸင်ႇႁဵတ်းလိၵ်ႈ သူင်ႇၸူးထႅင်ႈၵမ်းၼိုင်ႈၼႆႉၶႃႈယဝ်ႉ၊ တွၼ်ႈတႃႇႁႂ်ႈပိုတ်ႇပၼ် ၸဝ်ႈသူၼ်ႁဝ်း ပေႃးတေလႆႈတေႃႉၶဝ်ႈၾႃႉၶဝ်ႈၵႂႃႇၶၢႆတၢင်းမိူင်းၶႄႇ” ဝႃႈၼႆ။

လွင်ႈတေပိုတ်ႇပၼ် ဢမ်ႇပိုတ်ႇပၼ် ၽၵ်းတူ တီႈၼွင်ၾၢႆ – ၵွင်းၼွင် လႄႈ ၽၵ်းတူ မၢၼ်ႈဝဵင်းၼၼ်ႉ တေလႆႈပႂ်ႉထွမ်ႇတူၺ်း ၼႂ်းပၢင်ၵုမ် ဝၼ်းသုၵ်း ဝၼ်းတီႈ 8/5/2020 တေမႃးၼႆႉ၊ ယွၼ်ႉဝႃႈ ၸဝ်ႈၼႃႈတီႈ လူင်ပွင်ၸိုင်ႈ မိူင်းၶႄႇ တင်းမိူင်းမၢၼ်ႈ သွင်မိူင်းတေႁူပ်ႉဢုပ်ႇဢူဝ်းၵၼ်ၵႂႃႇ- ၸၢႆးၵျေႃႇတဵင်း လၢတ်ႈၼႄၼင်ႇၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်းသေ ၸဝ်ႈသူၼ်ၶဝ်ႈၵၢပ်ႇ တၢင်းပွတ်းထုင်ႉမၢဝ်း ႁူပ်ႉလွင်ႈယၢပ်ႇၽိုတ်ႇ ဢမ်ႇလႆႈတေႃႉသူင်ႇၶဝ်ႈၵၢပ်ႇၸူးတၢင်းမိူင်းၶႄႇ၊ မၢင်ၵေႃႉ ထိုင်တီႈဢဝ် ၶဝ်ႈၵၢပ်ႇ ထွၵ်ႇပႅတ်ႈၼႂ်းၼမ်ႉမၢဝ်းသေ ပွၵ်ႈၶိုၼ်းၵေႃႈမီး။ မၢင်ၵေႃႉ ဢဝ်မိူဝ်းၸႅၵ်ႇပီႈၼွင်ႉၸွမ်း ၼႂ်းဝဵင်းမူႇၸေႊၵေႃႈမီး၊ တႃႇတေတေႃႉၶဝ်ႈမိူင်းၶႄႇၼၼ်ႉ မၢင်ၵေႃႉ ၶၢမ်ႇၼွၼ်းၶိုၼ်း ၼွၼ်းဝၼ်းပႂ်ႉပဵၼ် 4-5 ဝၼ်းၵေႃႈမီး ၼႆယဝ်ႉ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ- “ မိူဝ်ႈဝႃး ဝၼ်းတီႈ 4 ၼႆႉ ထူဝ်ႈတၢင်ႇၶဝ်ႈၾႃႉ ပႂ်ႉၶဝ်ႈတီႈၼွင်ၾၢႆ-ၵွင်းၼွင်ၼၼ်ႉ တေမီးမွၵ်ႈ 200 လမ်းၼႆႉ ၵိုတ်းၶမ်ဝႆႉ။ ယဝ်ႉၵေႃႈ ထူဝ်ႈတၢင်ႇၶဝ်ႈၾႃႉ ၶဝ်ႈၵႂႃႇတၢင်းမိူင်းၶႄႇ မိူဝ်ႈဝႃးၼႆႉ တေမီးမွၵ်ႈ 10 လမ်း ထုၵ်ႇပလိၵ်ႈၶႄႇၶဝ် တီႉၺွပ်းဝႆႉ။ ပေႃးသွၼ်ႇတူၺ်းလွင်ႈၶႄႇၶဝ် တီႉၺွပ်းၵူၼ်းထူဝ်ႈတၢင်ႇ ၶဝ်ႈၾႃႉၼႆႉ ဢၼ်လုၵ်ႉတၢင်းမိူင်းႁဝ်းသေ ၶဝ်ႈၵႂႃႇမိူင်းၶႄႇၼၼ်ႉ တေမီးမွၵ်ႈ 50 လမ်းၼႆႉ” ဝႃႈၼႆ။

တေႃႈလဵဝ် ၼင်ႇႁိုဝ်ပေႃးတေၸၢင်ႈလႆႈတေႃႉသူင်ႇၶဝ်ႈၵၢပ်ႇ ၶၢႆၸူးတၢင်းၾင်ႇမိူင်းၶႄႇၼၼ်ႉ ယူႇတီႈၸဝ်ႈသူၼ်ၶဝ်ႈၵၢပ်ႇၶဝ် ဢွၼ်ၵၼ်ပႂ်ႉမုင်ႈမွင်းထွမ်ႇတူၺ်းတၢင်းလူင်ပွင်ၸိုင်ႈ ၾင်ႇမိူင်းတႆး တေၸွႆႈၶပ်းၶိုင်ပၼ်ယူႇ- ၸဝ်ႈသူၼ်ၶဝ်ႈၵၢပ်ႇ ၸေႊလၢၼ်ႉ ၵေႃႉၼိုင်ႈ လၢတ်ႈၼႄၼင်ႇၼႆ။