လူင်ပွင်ၸိုင်ႈ မိူင်းႁူမ်ႈတုမ် ဢွၵ်ႇမၢႆမီႈႁၢမ်ႈဢွၵ်ႇၼွၵ်ႈႁိူၼ်း ၶၢဝ်းယၢမ်းၵၢင်ၶမ်ႈ တင်ႈဢဝ်မိူဝ်ႈၼႆႉၵႂႃႇၶၢဝ်းတၢင်း 1 လိူၼ်။

မိူဝ်ႈၼႆႉ ဝၼ်းတီႈ 20/4/2020 ယူႇတီႈၶွမ်ႊမတီႊၵုမ်းၵမ်တၢင်းပဵၼ်ၶူဝ်ႊဝိတ်ႉ 19 လႄႈၶိုင်ၵၢၼ်ငဝ်းလၢႆး ၶိုၵ်ႉၶၵ်ႉ မိူင်းႁူမ်ႈတုမ် ဢွၵ်ႇလိၵ်ႈၸီႉသင်ႇ ႁၢမ်ႈဢွၵ်ႇၼွၵ်ႈႁိူၼ်းၶၢဝ်းယၢမ်းၵၢင်ၶမ်ႈၵၢင်ၶိုၼ်း။ ၼႂ်းမိူင်းတႆးပတ်းပိုၼ်ႉ (တႃႇ 48 ၸႄႈဝဵင်း) တင်ႈဢဝ်ဝၼ်းတီႈ 20/4/2020 တေႃႇထိုင် ဝၼ်းတီႈ 19/5/2020 တႃႇၶၢဝ်းတၢင်း 1 လိူၼ် ႁၢမ်ႈဢွၵ်ႇၼွၵ်ႈႁိူၼ်း တႄႇဢဝ်ယၢမ်းၵၢင်ၶိုၼ်း 10 မူင်း ထိုင် ၵၢင်ၼႂ် 4 မူင်း ဝႃႈၼႆ။

ၽွင်းလူင်ၾၢႆႇၾၼ်ႊတႃႊငိုၼ်းတွင်းလႄႈ ၶူင်းၵၢၼ်လူင်ပွင်ၸိုင်ႈမိူင်းတႆး ဢူးၸူဝ်းၺုၼ်ႉလုၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ၼင်ႇႁိုဝ် တၢင်းပဵၼ်တေဢမ်ႇလၢမ်းၽႄႈ ၸပ်းၵၼ်ၼမ်လိူဝ်ၼႆႉထႅင်ႈၼႆသေ ၸင်ႇလႆႈပိုၼ်ၽၢဝ်ႇ ႁၢမ်ႈဢွၵ်ႇၼွၵ်ႈ ႁိူၼ်း ယၢမ်းၵၢင်ၶိုၼ်းၵူၺ်းၶႃႈ။ ပေႃးၵုမ်းလႆႈတၢင်းပဵၼ်ယဝ်ႉတႄႉ တေမီးလွင်ႈလူတ်းယွၼ်ႇပၼ်ၶိုၼ်းယူႇ ”- ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၼႂ်းမိူင်းတႆးၼႆႉ မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်း မူတ်း 4 ၵေႃႉယဝ်ႉ။ ၵူၼ်းမိူင်းဢၼ်လႆႈထုၵ်ႇၵၵ်းၶင်ဝႆႉၼႂ်း ဢွင်ႈတီႈဢၼ်ႁဵတ်းဝႆႉပၼ်ၶဝ်ၼၼ်ႉသမ်ႉ မီးယူႇ ႁူဝ်ၵူၼ်း 4,008 ၵေႃႉ၊ ၵူၼ်းၸိူဝ်းလႆႈထုၵ်ႇႁၢမ်ႈတပ်ႉ ဢွၵ်ႇတၢင်းၼွၵ်ႈႁိူၼ်းယေးသမ်ႉ မီး 5,138 ၵေႃႉ။ ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇသိုပ်ႇၽႄႈလၢမ်းႁၢဝ်ႈႁႅင်းၼၼ်ႉ ၸင်ႇလႆႈဢွၵ်ႇၶေႃႈၸီႉသင်ႇၼႆႉမႃး ႁၢမ်ႈတပ်ႉ ၵူၼ်းမိူင်းဢွၵ်ႇတၢင်းၼွၵ်ႈ ယၢမ်းၵၢင်ၶမ်ႈ ၵၢင်ၶိုၼ်း” ဝႃႈၼႆ။

ၵူၼ်းၼုမ်ႇလၢႆးၶႃႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လိၵ်ႈတႄႉ ပိူၼ်ႈသူင်ႇဝႆႉပတ်းပိုၼ်ႉယဝ်ႉၶႃႈယူဝ်ႉ။ တီႈဝဵင်းလၢႆး ၶႃႈ လႅပ်ႈသူင်ႇၽႅဝ်တီႈၽူႈၵွၼ်းၸႄႈဝဵင်းသေ ယူႇတီႈၽူႈၵွၼ်းၸႄႈဝဵင်းသမ်ႉ ၶိုၼ်းသူင်ႇပၼ်ၵူႈပွၵ်ႉဢိူင်ႇယဝ်ႉ ” ဝႃႈၼႆ။

လိူဝ်ၼၼ်ႉ မိူၼ်ၼင်ႇ ၽူႈမီးပုၼ်ႈၽွၼ်း၊ ၵူၼ်းဢမ်ႇယူႇလီ၊ ရူတ်ႉၵႃးတၢင်ႇၵုၼ်ႇ ၸိူဝ်းၼႆႉတႄႉ ၵႂႃႇမႃးလႆႈယူႇ။ ၼွၵ်ႈလိူဝ် ၼၼ်ႉတႄႉ တေဢမ်ႇဢွၵ်ႇၵႂႃႇမႃးလႆႈ ဝႃႈၼႆ။

ၸၢႆးဢွင်ႇ ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – မီးၶေႃႈပိုၼ်ၽၢဝ်ႇမႃးၸိူင်ႉၼႆ လွင်ႈႁူမ်ႇလူမ်ႈတႄႉ တေၶႅမ်ႉမႃး လိူဝ်ၵဝ်ႇယူႇ။ ၵူၺ်းၵႃႈ သင်ပိုၼ်ၽၢဝ်ႇဝႆႉလူင်ႈၼႃႈၽွင်ႈတႄႉ ယိင်ႈၶႅၼ်းတေၶႅမ်ႉၶႃႈဢေႃႈ ၵူၼ်းမိူင်းတေမီးၶၢဝ်း ယၢမ်းႁၢင်ႈႁႅၼ်းၽွင်ႈ။ ၼႆႉသမ်ႉၵိုင်ႉၵၢင်ႉပိုၼ်ၽၢဝ်ႇလႄႈ ႁူႉတေယၢပ်ႇၽိုတ်ႇၵၼ်ဢိတ်းဢွတ်းၶႃႈဢေႃႈ”- ဝႃႈၼႆ။

ၼႂ်းမိူင်းတႆးၼႆႉ တင်းမူတ်း မီး 55 ၸႄႈဝဵင်း။ ၼႃႈလိၼ်ၽွင်းငမ်း တူဝ်ၵဝ်ႇ ၵူဝ်းၵၢင်ႉ 2 ၸႄႈဝဵင်းလႄႈ ၼႃႈလိၼ်ၽွင်း ငမ်းတူဝ်ၵဝ်ႇဝႃႉ 5 ၸႄႈဝဵင်းတႄႉ ယွၼ်ႉလူင်ပွင်ၸိုင်ႈဢမ်ႇၶဝ်ႈထိုင်လႆႈ လႄႈ ၸင်ႇပိုၼ်ၽၢဝ်ႇ ၸီႉသင်ႇ ၶိူဝ်ႊၾိဝ်ႊထိုင် တႃႇ 48 ၸႄႈဝဵင်းၵူၺ်း ဝႃႈၼႆ။