ၼႂ်းၶၢဝ်းတၢင်း 7 ဝၼ်းၼႆႉ လူင်ပွင်ၸိုင်ႈတီႉၺွပ်းလႆႈယႃႈမဝ်းၵမ်သေ ပိုတ်ႇလိူင်ႈဝႆႉ တင်းမူတ်းတေမီးမွၵ်ႈ 300 လိူင်ႈ ယဝ်ႉ ဝႃႈ ၼႆ။
ယူႇတီႈလုမ်းလူင်ပွင်ၸိုင်ႈ ပိုၼ်ၽၢဝ်ႇဢွၵ်ႇဝႆႉဝႃႈ “ၸွမ်းၼင်ႇၾၢႆႇၵဵဝ်ႇၶွင်ႈၸႅင်ႈၶၢဝ်ႇမႃးၸူး လုမ်းလူင်ပွင်ၸိုင်ႈ လႆႈႁူႉဝႃႈ ယူႇတီႈပလိၵ်ႈလႄႈ တင်းတပ်ႉမတေႃႇ လႆႈၵူတ်ႇထတ်းတီႉ ယႃႈမဝ်းၵမ် တႄႇဢဝ် ဝၼ်း တီႈ 7 ထိုင် 13 လိူၼ်ၵျူႊလၢႆႊ ၼႆႉ ပိုတ်ႇလိူင်ႈဝႆႉတင်းမူတ်းမီးၵႂႃႇ 299 လိူင်ႈ” ဝႃႈၼႆ။
ယႃႈမဝ်းၵမ် ဢၼ်တီႉလႆႈၸိူဝ်းၼၼ်ႉ တီႉလႆႈၸွမ်းလႅၼ်လိၼ်၊ ၸွမ်းၼႂ်းရူတ်ႉ ၵႃး၊ ရူတ်ႉၶိူင်ႈလႄႈ ၼႂ်းပိုၼ်ႉတီႈ ၸဵမ် ၸိူဝ်းၼႆႉ ဝႃႈၼႆ။
ၵမ်ႈၼမ် ဢၼ်တီႉလႆႈသေ ပိုတ်ႇလိူင်ႈဝႆႉၼႆႉသမ်ႉ ပဵၼ်ဢၼ်တီႉလႆႈတၢင်း တႃႈၵုင်ႈ၊ မၼ်းတလေး၊ တိူင်းဢေႊရႃႊဝႃႊ တီႊ၊ တိူင်းတၼၢဝ်းသီ၊ မိူင်း ၶၢင်၊ ယၢင်းလႅင်၊ မွၼ်း၊ ရၶႅင်ႇလႄႈ မိူင်းတႆး ၸဵမ်ၸိူဝ်းၼႆႉ။
တီႉလႆႈတီႈၵူၼ်းၵႃႉၶၢႆ 419 ၵေႃႉ၊ ယႃႈမႃႉ မွၵ်ႈ 9 လၢၼ်ႉမဵတ်ႉ၊ ယႃႈမႃႉဢၼ်ပဵၼ်ၽွင် ၼမ်ႉၼၵ်း မွၵ်ႈ 2 သႅၼ် ၵရမ်ႇ၊ ယႃႈၾိၼ်ႇၽိူၵ်ႇၼမ်ႉၼၵ်းမွၵ်ႈ 4 မိုၼ်ႇၵရမ်ႇလႄႈ ယႃႈဢႆႊသ် မွၵ်ႈ 5 သႅၼ်ၵရမ်ႇပၢႆ၊ ယဝ်ႉၵေႃႈ ယႃႈၾိၼ်ႇလမ်၊ ၶႃးၶူး၊ ၵႅတ်ႉတမိၼ်းလႄႈ ၵႃးၽေးဢိၼ်း ၸိူဝ်းၼႆႉ။
လိူဝ်ၼၼ်ႉဢမ်ႇၵႃးတီႉ လႆႈပႃးထႅင်ႈၶိူင်ႈတူမ်ႈႁုင်ယႃႈမဝ်းၵမ်၊ မၢၵ်ႇၵွင်ႈၵူႈသႅၼ်း၊ မႅၵ်ႉၵွင်ႈလႄႈ မၢၵ်ႇမႅင်း ၸဵမ်ၸိူဝ်းၼႆႉ ၼႂ်းၶေႃႈပိုၼ်ၽၢဝ်ႇၼၼ်ႉ တႅမ်ႈဝႆႉၼင်ႇၼႆ။
မိူဝ်ႈဝၼ်းတီႈ 26 လိူၼ်ၵျုၼ်ႊပူၼ်ႉမႃးၵေႃႈလူင်ပွင်ၸိုင်ႈဢိၵ်ႇလၢႆမူႇလၢႆၸုမ်း လႆႈၽဝ်ယႃႈမဝ်းၵမ် လၢႆလၢႆၸႄႈဝဵင်း။ ယႃႈမဝ်းၵမ်ဢၼ်လႆႈၽဝ်ၵႂႃႇၵႃႈၶၼ် ႁူဝ်လၢၼ်ႉလၢၼ်ႉ ငိုၼ်း (US) တေႃႊလႃႊ။
