ပႃႇတီႇၵၢၼ်မိူင်းၸိူဝ်းတေတင်ႈပႃႇတီႇမႂ်ႇ ဢမ်ႇၼၼ် ဢၼ်တေႁူမ်ႈၵၼ်ပဵၼ်ပႃႇတီႇလဵဝ်သေ ၶဝ်ႈပၢင်လိူၵ်ႈတင်ႈ ၼႂ်း 2020 ၼႆႉၼၼ်ႉ ႁႂ်ႈတၢင်ႇယိုၼ်ႈဝႂ် ႁႂ်ႈယဝ်ႉၼႂ်းဝၼ်းတီႈ 30 လိူၼ်တီႊသႅမ်ႊပိူဝ်ႊ 2019 ၼႆႉ ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ဢူးမိၼ်ႉၼၢႆႇ ၽူႈၶၢၼ်ပၢၵ်ႇ ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် လၢတ်ႈတီႈၶၢဝ်ႇ 7Day လၢတ်ႈဝႃႈ “ ပေႃးထိုင်မႃး ပီ 2020 ၼႆၸိုင် တေမီးပၢင်လိူၵ်ႈတင်ႈ မိူင်းႁူမ်ႈတုမ်ယဝ်ႉလႄႈ ယွၼ်ႉၼၼ် ၸင်ႇလႆႈႁၢင်ႈႁႅၼ်းဝႆႉထႃႈ။ ၵွပ်ႈၼၼ် ဢၼ် တေၵေႃႇတင်ႈပႃႇတီႇမႂ်ႇလႄႈသင်၊ ဢၼ်တေတၢင်ႇမၢႆၾၢင် လႄႈ ႁူမ်ႈႁွမ်းပႃႇတီႇပဵၼ်ဢၼ်လဵဝ်ၵၼ်ၼၼ်ႉလႄႈသင် ၼင်ႇႁိုဝ် တေတၼ်းၶိုတ်းလႆႈ ၽွင်းပၢင်လိူၵ်ႈတင်ႈၼၼ်ႉ ၸင်ႇလႆႈဢွၵ်ႇၶေႃႈပိုၼ်ၽၢဝ်ႇဝႆႉ” ဝႃႈၼႆ။

မိူဝ်ႈပီ 2015 ၼၼ်ႉ ယူႇတီႈၶွမ်ႊမသျိၼ်ႊ လႆႈပိုၼ်ၽၢဝ်ႇဝႆႉယူႇသေတႃႉ ၶၢဝ်းယၢမ်းဢမ်ႇၵုမ်ႇထူၼ်ႈၵၼ် ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ဢၼ်တေတင်ႈပႃႇတီႇၼၼ်ႉ ၸွမ်းၼင်ႇၶွမ်ႊမသျိၼ်ႊမၵ်းမၼ်ႈၶၢဝ်းယၢမ်း ၼၼ်ႉ ႁႂ်ႈဢွၼ်ၵၼ်မႃးတၢင်ႇၽိုၼ်ဝႂ်ၵၼ် ၼင်ႇႁိုဝ် တေမီးၶၢဝ်းယၢမ်းတဵမ်ထူၼ်ႈ ပေႃးတေလႆႈလူင်းသူၼ်းတုမ်ႁႃသဵင် တႃႇပၢင်လိူၵ်ႈတင်ႈၵႂႃႇၼၼ်ႉ”ဝႃႈၼႆ။

ပၢင်လိူၵ်ႈတင်ႈ ပီ 2020 တေမႃးၼႆႉ ပႃႇတီႇၵၢၼ်မိူင်း ဢၼ်တေၶဝ်ႈၶႅင်ႇၵၼ် တင်းမူတ်းတေမီး 100 ပၢႆ။ မိူဝ်ႈ ပီ 2015 ၼၼ်ႉ ပႃႇတီႇၵၢၼ်မိူင်း ဢၼ်ၶဝ်ႈၶႅင်ႇၵၼ် ၼႂ်းပၢင်လိူၵ်ႈတင်ႈ မိူင်းႁူမ်ႈတုမ်ၼၼ်ႉ တင်းမူတ်းမီး 91 ပႃႇတီႇ ဝႃႈၼႆ။