လူင်ပွင်ၸိုင်ႈမိူင်းၶႄႇ ဢၢင်ႈဝႃႈ မိူင်းႁူမ်ႈတုမ် မီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၼမ်ၼႃႇယဝ်ႉၼႆသေ ၶိုၼ်းသူင်ႇ ၵူၼ်းမိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ်မိူင်းၶႄႇၼၼ်ႉပွၵ်ႈၶိုၼ်း ႁိမ်းၸမ် 20000 ၵေႃႉ။
ဝၼ်းတီႈ 16/4/2020 မိူဝ်ႈၼႆႉ ယၢမ်းၵၢင်ၼႂ် 8 မူင်းတႄႇသူင်ႇၶဝ်ႈတၢင်းၽၵ်းတူလႅၼ်လိၼ် လွႆၸေႈ ၸႄႈတွၼ်ႈမၢၼ်ႈမေႃႈ ၸႄႈမိူင်းၶၢင်။
ဢူးၼေႇဝိၼ်း ၽွင်းတႅၼ်းၸႄႈမိူင်း မိူင်းမွၵ်ႇလၢတ်ႈဝႃႈ -“ မၼ်းၼမ်ၼႃႇ ဝၼ်းလဵဝ်သူင်ႇႁႂ်ႈယဝ်ႉမူတ်းၼႆဢမ်ႇပဵၼ်လႆႈၶႃႈ။ လႆႈဢုပ်ႇၵၼ်တင်းၸဝ်ႈၼႃႈတီႈ ၾင်ႇၶႄႇ ၾင်ႇမၢၼ်ႈသေ သူင်ႇၶဝ်ႈ ဝၼ်း 200 ၵေႃႉ ၶႃႈဢေႃႈ။ ”- ဝႃႈၼႆ။
တွၼ်ႈတႃႇၵူၼ်းလုၵ်ႉမိူင်းၶႄႇမႃးၼၼ်ႉ ၶွမ်ႊမတီႊၾၢႆႇၵႅတ်ႇၶႄ တၢင်းပဵၼ်ၶူဝ်ႊဝိတ်ႉ 19 ဝဵင်းလႂ်ဝဵင်းၼၼ်ႉ ႁၢင်ႈႁႅၼ်းဝႆႉ ဢွင်ႈတီႈ တႃႇၵုမ်းၶင်တူဝ် (တွၼ်ႈတႃႇၵူၼ်းပိုၼ်ႉတီႈ) သေ တေႁႂ်ႈၵုမ်းၶင်တူဝ်တႃႇ 21 ဝၼ်းၵွၼ်ႇၸင်ႇတေပၼ်ပွၵ်ႈႁိူၼ်းၽႂ်မၼ်း။
ၽွင်းၵုမ်းၶင်တူဝ်ၼၼ်ႉၵေႃႈ ၶူဝ်းၸႂ်ႉသွႆ သိူဝ်ႈၽႃႈ ဢိၵ်ႇငိုၼ်းတွင်းၵႃႈၸႂ်ႉၸၢႆႇ တေလႆႈဢွၵ်ႇႁင်းၵူၺ်း ဢွၵ်ႇလိၵ်ႈဝႆႉ ဝႃႈၼႆ။
ၽွင်းလူင်ၾၢႆႇပိူင်ၵူၼ်းတႄႉလၢတ်ႈဝႃႈ ၵူၼ်းဢၼ်ဢမ်ႇၸႂ်ႈၵူၼ်းမိူင်းၶၢင်ၵေႃႈ ႁဵတ်းဝႆႉပၼ်တီႈယူႇယဝ်ႉ ။ ႁႂ်ႈၵုမ်းၶင်တူဝ်သေ ၸင်ႇပွၵ်ႈမိူဝ်း ဝၢၼ်ႈၽႂ်မိူင်းမၼ်း။ ၵူၺ်းၵႃႈ ဢမ်ႇပၼ်ၵႂႃႇၶိုၼ်းမိူင်းၶႄႇယဝ်ႉ- ဝႃႈၼႆ။
ၼႂ်း ၵူၼ်းပွၵ်ႇမႃးၸိူဝ်းၼၼ်ႉ ၵမ်ႈၼမ်ပဵၼ်ၵူၼ်းမိူင်းၶၢင် လိူဝ်ၼၼ်ႉပဵၼ်ပႃးၵူၼ်းမိူင်းတႆး၊ တိူင်းတႃႈလိူဝ်ႇ၊ ၵူၼ်းမိူင်းရၶႅင်ႇ ၸိူဝ်းၼႆႉ။
တၢင်းပဵၼ်ၵႃႇလၶႄႇ ၶူဝ်ႊဝိတ်ႉ 19 ၼႆႉ တႄႇပဵၼ်တီႈမိူင်း ဝူႊႁၢၼ်ႉ မိူင်းၶႄႇ ၸဵမ်မိူဝ်ႈႁၢင်ပီ 2019 ။ တႄႇၶဝ်ႈမႃးမိူင်းမၢၼ်ႈ မိူဝ်ႈ ၵၢင်လိူၼ်မၢတ်ႉၶျ်။ ယၢမ်းလဵဝ် ၵူၼ်းမိူင်းႁူမ်ႈတုမ်တင်းမူတ်း ၸိူဝ်းတိတ်းၸပ်းၸိူဝ်ႉမႅင်းမီး 85 ၵေႃႉယဝ်ႉသေ တၢႆ 4 ၵေႃႉယဝ်ႉ။
