ပလိၵ်ႈ CID ဝဵင်းလိူဝ်ႇ ႁွင်ႉဢဝ် ၵူဝ်ႇၼေႇမဵဝ်းလိၼ်း ဢႄႊတီႊတိူဝ်ႊ လႄႈ ၽူႈၵေႃႇတင်ႈၸုမ်းၶၢဝ်ႇ VOM Voice of Myanmar ၵႂႃႇတႃႇတွင်ႈထၢမ် ၼႆသေ တေႃႇထိုင်ယၢမ်းလဵဝ် ဢမ်ႇပႆႇပွႆႇလွတ်ႈမႃးၶိုၼ်း ၶင်ဝႆႉတီႈလႂ် လုၵ်ႈမေးဢမ်ႇလႆႈႁူႉၸွမ်း။
ဝၼ်းတီႈ 30/3/2020 ယၢမ်းၵၢင်ၶိုၼ်း 9 မူင်းၼႆႉ ၾၢႆႇပလိၵ်ႈ CID ၾၢႆႇရႃႇၸဝၢတ်ႈ ဝဵင်းလိူဝ်ႇ မႃးႁွင်ႉဢဝ်မၼ်းၸၢႆးတီႈႁိူၼ်း မၼ်းတလေး (ဝဵင်းလိူဝ်ႇ) သေ ဢဝ်ၵႂႃႇၶင်ဝႆႉ။ ယွၼ်ႉသင် ၊ တေဢဝ်ၵႂႃႇတီႈလႂ်ၵေႃႈဢမ်ႇလၢတ်ႈၼေလုၵ်ႈမေးၵူၼ်းႁိူၼ်း။
ၵူၼ်းႁိူၼ်းၵႂႃႇယွၼ်းႁူပ်ႉတီႈႁူင်းပလိၵ်ႈ ၵေႃႈ ပလိၵ်ႈဢမ်ႇပၼ်ႁူပ်ႉ။
ယူႇတီႈၸုမ်းၶၢဝ်ႇလၢႆလၢႆဢၼ် ထတ်းသၢင်ဝႃႈ ၶႂ်ႈမိူၼ်ငဝ်းလၢႆး ပိူင်ၽွင်းငမ်းသိုၵ်း မႃးၶိုၼ်းယဝ်ႉ ၼႆသေ တုၵ်းယွၼ်းထိုင် ၶွင်ႊသီႊသိုဝ်ႇၶၢဝ်ႇၸိုင်ႈမိူင်း လႄႈ လူင်ပွင်ၸိုင်ႈ ႁႂ်ႈၸွႆႈၵႄႈလိတ်ႈပၼ်ဝႆးဝႆး- ဝႃႈၼႆ။
ၾၢႆႇၼိုင်ႈ ၽွင်းတပ်ႉသိုၵ်းလႄႈ ၾၢႆႇသိုဝ်ႇသၢၼ် ပိၵ်ႉႁႅတ်ႉသၢႆ ဢိၼ်းထိူဝ်ႊၼႅတ်ႇ မိူင်းရၶႅင်ႇ ၼၼ်ႉ ပိၵ်ႉႁႅတ်ႉပႃးဝႅပ်ႉသၢႆႇၶၢဝ်ႇဢၼ်ပၵ်းၼႂ်းၼႃႈလိၼ်ၸၢဝ်းၶိူဝ်းတင်ႈဢဝ်မိူဝ်ႈဝၼ်းတီႈ 23/3/2020 တေႃႇထိုင်ဝၼ်းမိူဝ်ႈၼႆႉယင်းပႆႇပိုတ်ႇပၼ်ၶိုၼ်း။
