ပွႆးတၢင်ႇထီးထၢတ်ႈၵွင်းမူးလွႆလၢၼ်း ၼႂ်းၸႄႈဝဵင်းတၢင်ႉယၢၼ်း ၽူႈၼမ်း SSPP ၶဝ်ႈႁူမ်ႈ တၢင်ႇထီး။
ဝၼ်းတီႈ 23/2/2020 ယၢမ်းၵၢင်ၼႂ် သင်ၶၸဝ်ႈ၊ တၵ်ႉၵႃႇသတ်ႉထႃးလႄႈ ဢိၵ်ႇပႃး ၸွမ်သိုၵ်းလူင် ပၢင်ႇၾႃႉ ၽူႈၼမ်း ပႃႇ တီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ႁူမ်ႈၵၼ် တၢင်ႇထီးထၢတ်ႈ ၵွင်းမူးလွႆလၢၼ်း ဢၼ်မီးဝႆႉ ၸဵင်ႇ ၸၢၼ်းဝၼ်းတူၵ်းတၢင်ႉယၢၼ်း ၼႂ်းၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းၼုမ်ႇ SSPP ၽူႈၶဝ်ႈႁူမ်ႈၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ ပဵၼ်ပွႆးလူႇတၢၼ်း တၢင်ႇထီးထၢတ်ႈၶႃႈ။ ၸဝ်ႈ ပၢင်ႇၾႃႉတင်း လုၵ်ႈလၢင်းလႄႈ လုၵ်ႈၼွင်ႉတပေး ၶဝ်ႈႁူမ်ႈတၢင်ႇထီး။ ယဝ်ႉၵေႃႈ တၵ်ႉၵႃႇသတ်ႉထႃး ၶဝ်ႈႁူမ်ႈၵိုၼ်းၶွၼ်ႈ ၼမ်တႄႉ” ဝႃႈၼႆ။
“ၵွင်းမူးၼႆႉတႄႉ ယူႇတီႈသင်ၶၸဝ်ႈလႄႈ တၵ်ႉၵႃႇ ထုင်ႉၼၼ်ႉ ယဝ်ႉၵေႃႈ ႁူဝ်ပဝ်ႈလူင် ၸဝ်ႈပၢင်ႇၾႃႉ ဢွၼ်ႁူဝ်ၼမ်း ၼႃႈသေ ႁူမ်ႈၵၼ်တႄႇထၢတ်ႈလူႇတၢၼ်းၶႃႈဢေႃႈ” ၵူၼ်းၼုမ်ႇ SSPP သိုပ်ႇလၢတ်ႈၼႄၼင်ႇၼႆ။
ပၢင်ပွႆးတၢင်ႇထီးထၢတ်ႈၵွင်းမူးလွႆလၢၼ်းၼႆႉ မီးသင်ၶၸဝ်ႈ ၸိုဝ်ႈသဵင်ယႂ်ႇ ၼႂ်းမိူင်းတႆးလၢႆလၢႆၸဝ်ႈဢိၵ်ႇ သင်ၶၸဝ်ႈ ၼႂ်း ထုင်ႉတၢင်ႉယၢၼ်းလႄႈ တီႈၸမ်ၵႆ ၶဝ်ႈႁူမ်ႈတၢင်ႇထီးတင်းၼမ်လၢႆ။
လိူဝ်ၼၼ်ႉ တၵ်ႉၵႃႇသတ်ႉထႃး ၼႂ်းတူင်ႇဝဵင်းတၢင်ႉယၢၼ်းလႄႈ တီႈၸမ်ၵႆ ဢွၼ်ၵၼ်မႃးၶဝ်ႈႁူမ်ႈလူႇတၢၼ်း တင်းမူတ်း ဢမ်ႇယွမ်း ၼိုင်ႈႁဵင် ဝႃႈၼႆ။
လႅင်ႇၶၢဝ်ႇ – တႆးႁုၼ်ႈမႂ်ႇ
