ဝၼ်းမိူင်းႁူမ်ႈတုမ် ၶွပ်ႈတဵမ် 73 ပီ ဢၼ်တေၸတ်းႁဵတ်းတီႈဝဵင်းပၢင်လူင် ၼၼ်ႉ ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸုၵျီႇ တေၶဝ်ႈႁူမ်ႈဝႃၼႆ။
တေႃႇဢွင်ႇသၢၼ်းၸုၵျီႇၼႆႉ ဝၼ်းတီႈ 11/2/2020 ႁွတ်ႈထိုင်ဝဵင်းလူင်တူၼ်ႈတီးသေ ဝၼ်းတီႈ 12/2/2020 ဝၼ်းမိူင်းႁူမ်ႈတုမ် ၶွပ်ႈတဵမ် 73 ပီၼၼ်ႉ မၼ်းၼၢင်းတေၵႂႃႇပၢင်လူင် ဝဵင်းၵိုၵ်းပိုၼ်း တႃႇဢဝ်လွတ်ႈလႅဝ်းၵွၼ်းၶေႃမိူင်းႁူမ်ႈတုမ်။ တေႁူပ်ႉထူပ်းပႃးၵူၼ်းမိူင်း ဝႃႈၼႆ။
“ၶိုၼ်းၼႆႉတႄႉ ၼွၼ်းတူၼ်ႈတီးၶႃႈ။ မိူဝ်ႈၽုၵ်ႈၸင်ႇမိူဝ်းပၢင်လူင်။ ပၢင်ၵႅဝ်ႈဝၼ်းမိူင်းႁူမ်ႈတုမ် တေပဵၼ်ၵၢင်ၼႂ် 10 မူင်းထိုင်ဝၢႆးဝၼ်း 3 မူင်း။ ၶပ်းမၢႆလၢၵ်ႇလၢႆး ဢမ်ႇမီးသင် ၵူၺ်း တေႁူပ်ႉထူပ်း ၵူၼ်းမိူင်းပိုၼ်ႉတီႈ တီႈဝၢင်းလၵ်းသဝ်ႁိၼ် ၼၼ်ႉၶႃႈဢေႃႈ ” – ၽူႈၸွမ်းၶၢဝ်းတၢင်းမၼ်းၼၢင်းမႃးမိူင်းတႆးၵေႃႉၼိုင်ႈ လၢတ်ႈၼင်ႇၼႆ။
တေႃႇဢွင်ႇသၢၼ်းၸုၵျီႇၼႆႉ မိူဝ်ႈပီ 2017 ဝၼ်းမိူင်းႁူမ်ႈတုမ်ၼၼ်ႉၵေႃႈ မၼ်းၼၢင်းမႃးၶဝ်ႈႁူမ်ႈပၢင်ၵႅဝ်ႈတီႈပၢင်လူင်ၼင်ႇၵဝ်ႇ။ မိူဝ်ႈၼၼ်ႉတႄႉ လႆႈႁူပ်ႉထူပ်းပႃး ၵူၼ်းႁိူၼ်း ၸိူဝ်ႉၶိူဝ်းၽူႈၼမ်းၸၢဝ်းၶိူဝ်း ၸိူဝ်းလူင်းလၢႆးမိုဝ်းလိၵ်ႈႁူမ်ႈမၢႆပၢင်လူင် ၼၼ်ႉယူႇ။
ၸၢႆးၸွမ် ၵူၼ်းပၢင်လူင်လၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်ၶၢဝ်းတၢင်း ၵမ်းထူၼ်ႈသွင် တႃႇမၼ်းၼၢင်းၶႃႈဢေႃႈ။ ပၢင်ဝၼ်းမိူင်းႁူမ်ႈတုမ်ပီၼႆႉတႄႉ ဢမ်ႇမီးၶပ်းမၢႆလၢၵ်ႇလၢႆးၼင်ႇၵဝ်ႇၶႃႈ။ ႁဝ်းၶႃႈႁၼ်ထိုင်တႄႉ ဢၼ်မၼ်းၼၢင်းမႃးၼႆႉ ၾၢႆႇၼိုင်ႈတၢင်းၼိုင်ႈၵေႃႈ မႃးႁႃႁူၺ်းသူၼ်းတႃႇပၢင်လိူၵ်ႈတင်ႈတေမႃးၼႆႉၵူၺ်းၶႃႈဢေႃႈ။”- ဝႃႈၼႆ။
တႃႇတေပဵၼ်ပၢင်ၵႅဝ်ႈ ဝၼ်းမိူင်းႁူမ်ႈတုမ် တီႈပၢင်လူင်ပီၼႆႉ ပဵၼ်လူင်ပွင်ၸိုင်ႈၵေႃႉႁပ်ႉပုၼ်ႈၽွၼ်းၸတ်း။ ၼႂ်းၸုမ်းၵေႃႇမတီႇၾၢႆႇပွင်ပဵၼ်ပၢင်ၵႅဝ်ႈၼၼ်ႉၵေႃႈ ၵူၼ်းမိူင်းဢမ်ႇၶဝ်ႈႁူမ်ႈဢဝ်ပုၼ်ႈၽွၼ်းသင် ၸၢႆးၸွမ်လၢတ်ႈၼေၼင်ႇၼႆ။
ပဵၼ်လူင်ပွင်ၸိုင်ႈမႃးၶိုင်မူတ်းၶႃႈယဝ်ႉ။ မိူဝ်ႈပီဢွၼ်တၢင်းပုၼ်ႉၼႆ ၶဝ်ယင်းဢမ်ႇၸႂ်ႉတုင်းၸၢဝ်းၶိူဝ်း တုင်းၸိူဝ်ႉၸၢတ်ႈတႆး ၵွၼ်ႇဢေႃႈ။ ၶဝ်ၸႂ်ႉတုင်းၸိူဝ်ႈၸၢတ်ႈမိူင်းႁူမ်ႈတုမ်လႄႈ တုင်းပႃႇတီႇ NLD ၶဝ်ၵူၺ်းလူးၵွၼ်ႇ။ ပီၼႆႉတႄႉႁဝ်းၶႃႈ ၵူၼ်းမိူင်းယင်းလႆႈတုၵ်းယွၼ်းဝႆႉ ယွၼ်ႉပဵၼ်ဝၼ်းမိူင်းႁူမ်ႈတုမ်လႄႈ ႁႂ်ႈၶဝ်ပၵ်းပႃးတုင်းၸၢဝ်းၶိူဝ်း ၼႆလူးၵွၼ်ႇဢေႃႈ – ၸၢႆးၸွမ်လၢတ်ႈထႅင်ႈၼင်ႇၼႆ။
ၵူၼ်းမိူင်းပၢင်လူင်တႄႉဢွၼ်ၵၼ်လၢတ်ႈဝႃႈ ပၢင်ပွႆးဝၼ်းမိူင်းႁူမ်ႈတုမ်ဢၼ်တေၸတ်းတီႈပၢင်လူင်ၼႆႉ ဢမ်ႇၸႂ်ႈမိူင်းႁူမ်ႈတုမ် ဢၼ်မၢၼ်ႇမႅၼ်ႈ ဢၼ်ၸၢဝ်းၶိူဝ်းၶႂ်ႈလႆႈ ဝႃႈၼႆ။
ဝၼ်းတီႈ 12/02/1947 ၼႆႉ ပဵၼ်ဝၼ်းဢၼ်ၽူႈၼမ်းၸၢဝ်းၶိူဝ်း ၸဝ်ႈၾႃႉတႆးလႄႈ ၽူႈၼမ်းမၢၼ်ႈႁူမ်ႈၵၼ် လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင် တူၵ်းလူင်း တႄႇတင်ႈမိူင်းႁူမ်ႈတုမ်။ မိူင်းလႂ်မိူင်းၼၼ်ႉ ႁႂ်ႈမီးသုၼ်ႇလႆႈတႅပ်း တတ်းႁင်းၶေႃ ၽွင်းငမ်းတူဝ်ၵဝ်ႇၽႂ်မၼ်း လွတ်ႈ လွတ်ႈလႅဝ်းလႅဝ်း။ ဝၢႆးလင် ႁူမ်ႈၵၼ်ထိုင်သိပ်းပီယဝ်ႉ ၸၢဝ်းၶိူဝ်း မီးသုၼ်ႇလႆႈၽၢတ်ႇဢွၵ်ႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ