တင်ႈဢဝ်ႁူဝ်လိူၼ်ၵျၼ်ႊၼိဝ်ႊရီႊၼႆႉမႃး မွၵ်ႇၵွၼ်ၵီႈတဵမ်တူၼ်ႈ ၸွမ်းတိၼ်လွႆ ဝဵင်းလူင်တူၼ်ႈတီးၼၼ်ႉ မီးၵူၼ်းမႃးႁၢၵ်းၵိင်ႇမွၵ်ႇၵွၼ် လႄႈ ထိုင်တီႈၸုမ်းႁၵ်ႉတူၼ်ႈမႆႉ လႆႈတႅမ်ႈလိၵ်ႈမႃးတိၵ်းၸွမ်းတူၼ်ႈမႆႉ ပႃႇမွၵ်ႇၵွၼ် ဝႃႈ – ႁၢမ်ႈပိတ်းမွၵ်ႇၵွၼ်- ဝႃႈၼႆ။

မွၵ်ႇၵွၼ် ၵီႈတဵမ်တူၼ်ႈ ၸွမ်းတိၼ်လွႆ ၼႃႈဝၼ်းဢွၵ်ႇဝဵၼ်းတူၼ်ႈတီး တိၼ်လွႆဢၼ်မီးၵွင်းမူး သူၺ်ႇၽူင်းပုၼ်ႉ၊ တၢင်းၶိုၼ်ႈလွႆ ၽြႃးသူၺ်ႇမုၵ်ႉတေႃး၊ ဢိၵ်ႇပႃးတင်းပွၵ်ႉၽြႃးၶၢဝ် (ၽယႃးၽိဝ်ႇ) ၸိူဝ်းၼႆႉ။

ၵူၼ်းမႃးဢႅဝ်ႇယဵမ်ႈတူၺ်းတၢင်းႁၢင်ႈလီမွၵ်ႇၵွၼ်၊ ထၢႆႇၶႅပ်းႁၢင်ႈၵိုၵ်းပႃႇမွၵ်ႇၵွၼ် ၸိူဝ်းၼႆႉ ၵိုၼ်းၶွၼ်ႈလီၵူႈဝၼ်း။

ၸုမ်းႁၵ်ႉတူၼ်ႈမႆႉ ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ  တူၼ်ႈမွၵ်ႇၵွၼ်ၼႆႉပႃးၼႂ်းသဵၼ်ႈမၢႆ ဢၼ်လႆႈႁၵ်ႉသႃလုမ်းလႃး၊ ၵူၺ်းၵႃႈၵူၼ်းမႃးဢႅဝ်ႇယဵမ်ႈ သမ်ႉၶႂ်ႈပိတ်း ၶႂ်ႈႁၢၵ်းၵိင်ႇမွၵ်ႇၵွၼ်ဢဝ်မိူဝ်းသႂ်ႇမေႃႈၼမ်ႉၶဵင်ႇၽြႃး ၊ ဢဝ်မိူဝ်းဝႆႉပဵၼ်တၢင်းႁၢင်ႈလီ၊ ဢၼ်ႁၢႆႉၸႃႉလိူဝ်ပိူၼ်ႈသမ်ႉ ဢဝ်ၵႂႃႇၶၢႆၼႂ်းၵၢတ်ႇ။ ဢၼ်တႅပ်းဢဝ်ၵႂႃႇတင်းတူၼ်ႈတင်းတေႃ ၵေႃႈမီး ဝႃႈၼႆ။

ၼၢင်းလိုၼ်းၶမ်း ၽူႈၶဝ်ႈၸုမ်းႁၵ်ႉတူၼ်ႈမႆႉ ဝဵင်းတူၼ်ႈတီးလၢတ်ႈဝႃႈ-  တူၼ်ႈမွၵ်ႇၵွၼ်ၼႆႉ ပဵၼ်မဵတ်ႇမၢႆၵိုၵ်းၵပ်းမိူင်းတႆး။ မၼ်းၵျိုၵ်ႈတီႈၵတ်း တီႈသုင်မိူၼ်ၼင်ႇသၼ်လွႆတႆး၊သၼ်လွႆၶျၢင်း ၸိူဝ်းၼႆႉ။ မၼ်းၵီႈၼိုင်ႈပီၼိုင်ႈပွၵ်ႈၵူၺ်း။ၵွပ်ႈၼႆၶႂ်ႈႁႂ်ႈၵူႈၵေႃႉဝႆႉၵႃႈၶၼ်မွၵ်ႇၵွၼ်။ ဢမ်ႇၶႂ်ႈႁႂ်ႈႁၢၵ်းပိတ်းမွၵ်ႇၵွၼ်၊ ဢမ်ႇၶႂ်ႈႁႂ်ႈတႅပ်းတူၼ်ႈမၼ်းလႄႈၸင်ႇလႆႈဢွၼ်ၵၼ်တႅမ်ႈလိၵ်ႈႁၢမ်ႈပိတ်းမွၵ်ႇၼၼ်ႉၵႂႃႇတိတ်းဝႆႉၶႃႈဢေႃႈ- ဝႃႈၼႆ။

ၸၢႆးလႃႉမွင်ႇ ၵူၼ်းတူၼ်ႈတီးလၢတ်ႈဝႃႈ မွၵ်ႇၵွၼ်ၼႆႉပဵၼ်မွၵ်ႇဢၼ်ႁၢင်ႈလီၵိုၵ်းတူၼ်ႈမၼ်းၵူၺ်း ၊ ပေႃးပိတ်းယဝ်ႉဢမ်ႇႁိုင် ႁဵဝ်ႇငၢႆႈလႄႈလီသေလၢႆတၢင်းႁၢင်ႈလီမၼ်း ၵွပ်ႈၼၼ် တိုၵ်းသူၼ်းယႃႇပေပိတ်းမွၵ်ႇ ဝႃႈၼႆ။

“ၼင်ႇႁိုဝ်ၵူၼ်းတင်းၼမ်တေလႆႈႁၼ် တၢင်းႁၢင်ႈလီမွၵ်ႇၵွၼ်ၼၼ်ႉထုၵ်ႇလီပၼ်မွၵ်ႇယူႇၼိူဝ်တူၼ်ႈမၼ်းၵူၺ်းၶႃႈဢေႃႈ၊ ပေႃးပိတ်းလူင်းမႃး မၼ်းပေႃးႁဵဝ်ႇယဝ်ႉလႄႈ သမ်ႉလႆႈဢွၼ်ၵၼ်ထိုမ်ႈပႅတ်ႈၵူၺ်းၼင်ႇၵဝ်ႇ  ။တႃႉဝႆႉပၼ်မၼ်းႁၢင်ႈလီၼိူဝ်တူၼ်ႈမၼ်းၶႃႈလႃႈ ” – ဝႃႈၼႆ။

ၼႂ်းမိူင်းတႆးၼႆႉ လိူဝ်သေဝဵင်းတူၼ်ႈတီးယဝ်ႉဝဵင်းဢၼ်မီးၼိူဝ်လွႆ ၊ ၾိင်ႈၾႃႉၵတ်းလီ  မိူၼ်ၼင်ႇတီႈလွႆမူၺ် ၵဵင်းတုင်ၵေႃႈ  မွၵ်ႇၵွၼ်ၵီႈပူင်းႁၢင်ႈလီ၊ မီးၵူၼ်းႁၢၵ်းၵိင်ႇမွၵ်ႇၵွၼ်ၼင်ႇၵဝ်ႇ။ ၵွပ်ႈၼႆ ၸုမ်းလုမ်းလႃးသူၼ်လႆႈတႅမ်ႈလိၵ်ႈတိတ်းဝႆႉတီႈတူၼ်ႈမႆႉဝႃႈ ပေႃးႁၢၵ်းၵိင်ႇမွၵ်ႇ၊ တႅပ်းတူၼ်ႈမွၵ်ႇတေမႂ်ငိုၼ်း ႁႃႈမိုၼ်ႇပျႃး- ဝႃႈၼႆ။