ၸဝ်ႈတူၼ်ၶူးသုၶမ်း ၸဝ်ႈတူၼ်ၶူးဝိသဵတ်ႇ (ဝတ်ႉပုင်ႇလူဝ်ႉ တႃႈၶီလဵၵ်း) ဢွၼ်ႁူဝ်ၼမ်းၼႃႈ ပီႈၼွင်ႉ ၵူၼ်းမိူင်းၼၢႆး တေသၢင်ႈၽရထၢတ်ႈၵွင်းမူး  ၼိူဝ်လွႆၵႃႁ ဝဵင်းမိူင်းၼၢႆး။

တင်ႈဢဝ်ဝၼ်းတီႈ 11/12/2019 ၼႆႉသေ  တၵ်ႉၵႃႇသတ်ႉထႃးမိူင်းၼၢႆး လႄႈမေႃမိုဝ်းပွတ်းဢွၵ်ႇၶူင်း 9 ၵေႃႉ တႄႇႁူမ်ႈၵၼ်ၵေႃႇ ၽရထၢတ်ႈၵွင်းမူး “ႁူမ်ႈယဵၼ်ဝိသဵတ်ႇ သႅင်မိူင်းလွႆလူင်ၵႃႁ ” တီႈၼိူဝ်လွႆလူင်ၵႃႁ ဢၼ်မီးၸဵင်ႇၸၢၼ်းဝၼ်းတူၵ်း ဝဵင်းမိူင်းၼၢႆး ယၢၼ်ၵၼ်တင်းဝဵင်းမိူင်းၼၢႆးမွၵ်ႈ 8 လၵ်း။ မီးႁိမ်းသဵၼ်ႈတၢင်းမွၵ်ႇမႆႇ မိူင်းၼၢႆး။

ၸၢႆးမွင်ႇၵျီး ၵူၼ်းၼုမ်ႇၽူႈႁၵ်ႉသႃပႂ်ႉပႃးၶူဝ်းၶွင်ၵိုၵ်းပိုၼ်း ၊ ၽူႈလႆႈၶဝ်ႈႁူမ်ႈတႃႇပွင်ပဵၼ်ၵၢၼ်ၵေႃႇ ၵွင်းမူးလွႆလူင်ၵႃႁ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇတၢင်းယုမ်ႇယမ် ပီႈၼွင်ႉမိူင်းၼၢႆးမီးဝႆႉသေ ၽွင်းၸဝ်ႈမိူင်းလွႆၵႃႇႁ လူင်းၼၼ်ႉ မၼ်းၸဝ်ႈလၢတ်ႈဝႃႈ ၶႂ်ႈတိုဝ်းၵမ်ၽႃဝၼႃ ၶႂ်ႈမီးၽရထၢတ်ႈ ၵွင်းမူးၼႆလႄႈ ႁဝ်းၶႃႈပီႈၼွင်ႉမိူင်းၼၢႆးၸင်ႇလႆႈ လဝ်ႈလၢတ်ႈယွၼ်းတၢင်းၸွႆႈထႅမ်သင်ၶၸဝ်ႈၶဝ်၊ ၸဝ်ႈၶူးသုၶမ်းၶဝ်ၸဝ်ႈ၊ ၸဝ်ႈၶူးဝိသဵတ်ႇၶဝ်ၸဝ်ႈ မႃးဢွၼ်ႁူဝ်ၵေႃႇသၢင်ႈၶႃႈဢေႃႈ။ ဝၢႆးၵၢတ်ႇ (မိူင်းၼၢႆး)ၼိုင်ႈဝၼ်း ႁဝ်းၶႃႈၵူၼ်းမိူင်းတေႁူမ်ႈၵၼ်ၶိုၼ်ႈလွႆ ၵႂႃႇႁဵတ်းၵႃႇယၵုသူဝ်ႇ ၼႂ်းၵၢၼ်ၵေႃႇသၢင်ႈ ၵွင်းမူး ၶႃႈဢေႃႈ” – ဝႃႈၼႆ။

တႃႇတေၵေႃႇသၢင်ႈၵွင်းမူးၼႆႉ တၵ်ႉၵႃႇသတ်ႉထႃး ၸဝ်ႈတူၼ်ၶူးၶဝ်ၸဝ်ႈ ဢၼ်မီးတီႈၸမ်တီႈၵႆ  ပဵၼ်ၸဝ်ႈတႃႇၼလူင်သေ တၵ်ႉၵႃႇသတ်ႉထႃး ၼႂ်းဝဵင်းမိူင်းၼၢႆးၵေႃႈလႆႈၶဝ်ႈႁူမ်ႈလူႇတၢၼ်းဝႆႉပႃး လႄႈ ၶိူင်ႈၵေႃႇသၢင်ႈၵွင်းမူးတႄႉ မီးဝႆႉယဝ်ႉ ။ ပီႈၼွင်ႉမိူင်းၼၢႆး တေႁူမ်ႈၵၼ်ၶိုၼ်ႈလွႆ တႃႇၵေႃႇသၢင်ႈၵွင်းမူးတႄႉပဵၼ်ၼႂ်းဝၼ်းတီႈ 11-16-21-26-31/12/2019 ၼႆလႄႈ ပီႈၼွင်ႉ တီႈၸမ်တီႈၵႆ ၸၢင်ႈၶဝ်ႈႁူမ်ႈႁဵတ်းသၢင်ႈၵုသူဝ်ႇ ၸွမ်းၵၼ်  ဝႃႈၼႆ။

ၸၢႆးမွင်ႇၵျီး သိုပ်ႇလၢတ်ႈဝႃႈ – “ၸွမ်းၼင်ႇၸဝ်ႈတူၼ်ၶူးၶဝ်ၸဝ်ႈ လၢတ်ႈတႄႉ  တေႇဢၢၼ်းႁႂ်ႈယဝ်ႉၵွၼ်ႇပီ 2019 ပႆႇသဵင်ႈၼႆႉ ၼႆၶႃႈဢေႃႈ။ သင်ၸိူဝ်ႉဝႃႈ ဢမ်ႇယဝ်ႉလႆႈၵေႃႈ တေပဵၼ်ၼႂ်းႁူဝ်ပီ 2020  တေဢၢၼ်းယၢတ်ႇၼမ်ႉလူႇတၢၼ်းၼႆၶႃႈဢေႃႈ”- ဝႃႈၼႆ။

ထၢတ်ႈၼႆႉ တေဢၢၼ်းႁဵတ်းတၢင်းသုင် 6 မီႊတိူဝ်ႊ  (ႁိမ်းၸမ် 20 ပေႇ) ။ လွႆၵႃႇႁ ၼႆႉသမ်ႉတၢင်းသုင်မီးမွၵ်ႈ 1700 မီႊတိူဝ်ႊ (ႁိမ်းၸမ် 5000 ပေႇ)။

ဝဵင်းမိူင်းၼၢႆးၼႆႉ ပဵၼ်ဝဵင်းၸဝ်ႈၾႃႉၽွင်းငမ်း။ မီးထၢတ်ႇၵွင်းမူးဢႃယုၼပ်ႉႁူဝ်ပၢၵ်ႇပီလႄႈ ၶူဝ်းၶွင်ၵဝ်ႇၵႄႇၵိုၵ်းပိုၼ်းတင်းၼမ်။ ယၢမ်းလဵဝ်မီးၼႂ်းၸေႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ။ ယူႇတီႈၵူၼ်းၼုမ်ႇပိုၼ်ႉတီႈလႄႈ ၽူႈတႅၼ်းသၽႃးတုၵ်းယွၼ်းဝႆႉ ႁႂ်ႈလႆႈပဵၼ်ဝဵင်းဢၼ်ၵူၼ်းၼွၵ်ႈမိူင်းၸၢင်ႈမႃးတွင်ႈတဵဝ်းဢႅဝ်ႇယဵမ်ႈလဵပ်ႈႁဵၼ်း-ၼႆဝႆႉ ။