ပၢင်ၵုမ် PPST ၸတ်းႁဵတ်းတီႈဝဵင်းၵဵင်းမႂ်ႇ ၸိုင်ႈထႆးၼၼ်ႉ ဢုပ်ႇၵုမ်ၵၼ်လွင်ႈ ၽူႈၼမ်း မိူင်းမၢၼ်ႈတေၵႂႃႇၶိုၼ်ႈလုမ်းတြႃးလုမ်ႈၾႃႉ ICJ ၊ ပေႃးၾၢႆႇၵိုတ်းတိုၵ်း ၵမ်ႉထႅမ်သၢၼ်လူၵ်ႈ (လုမ်းတြႃး လုမ်ႈၾႃႉ) မိူၼ်သၢၼ်ၶတ်းလူင်ပွင်ၸိုင်ႈမၢၼ်ႈသိုၵ်းမၢၼ်ႈလႄႈ သမ်ႉၵူဝ်ၵၢၼ်ငမ်း ယဵၼ်လူႉၵွႆ – ဝႃႈၼႆ။
ပၢင်ၵုမ်ၸုမ်းၽူႈၼမ်းၸိၵ်းၸွမ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းလူင်းလၢႆးမိုဝ်း PPST ၸတ်းႁဵတ်းၼႂ်းဝၼ်းတီႈ 2 – 4 /12/2019 ၶၢဝ်းတၢင်း 3 ဝၼ်း သေ ဢွၵ်ႇၶေႃႈပိုၼ်ၽၢဝ်ႇ ၽိုၼ်ၼိုင်ႈ ဢၼ်မီးၶေႃႈတႅပ်း တတ်းလူင် 5 ၶေႃႈ။
ၸဝ်ႈၶိုၼ်းသႂ်ၸႂ်ယဵၼ် ၽူႈၵိူဝ်းၵုမ် PPST လၢတ်ႈဝႃႈ – “တၢင်းႁၼ်ႁဝ်းၶႃႈ ၼၼ်ႉ မၼ်းမီးဝႆႉ သွင်ပိူင် ။ ဢၼ်ၼိုင်ႈၼႆႉ လူဝ်ႇၵမ်ႉထႅမ် ပၼ်ႁႅင်းဢီး လူင်ပွင်ၸိုင်ႈလႄႈ တပ်ႉသိုၵ်း ႁႂ်ႈၵႂႃႇ တေႃႇသူ။ ထႅင်ႈဢၼ်ၼိုင်ႈသမ်ႉလူဝ်ႇၵမ်ႉထႅမ်သၢၼ်လူၵ်ႈ။ ပေႃးဝႃႈႁဝ်းႁဵတ်း ၸိူင်ႉၼႆ မၼ်းတေၵႂႃႇတၢင်းပႅၼ်ပႄႈသွင်ပိူင်။ ပေႃးႁဝ်းတေၵမ်ႉထႅမ် လူင်ပွင်ၸိုင်ႈ ၸိုင် ႁဝ်းတေ လႆႈဝူၼ်ႉထိုင် ၵူၼ်းမိူင်းဢၼ်လႆႈတုၵ်ႉၶ မႃးလၢႆႁူဝ်သိပ်းပီ။ ပေႃးႁဝ်းတေၵမ်ႉထႅမ် ICJ သဵၼ်ႈ တၢင်းငမ်းယဵၼ်ၼႆႉသမ်ႉ ယင်းပႆႇထိုင်ႈတီႈ သမ်ႉတေလုၵွႆ ။ ၵွပ်ႈၼႆလႄႈ ပႅၼ်ပႄႈသွင်ဢၼ်ၼႆႉ ႁဝ်းဢမ်ႇလီပႆ။ ၵွပ်ႈၼႆ ၼင်ႇႁိုဝ်တေလႆႈၶေႃႈတွပ်ႇဢၼ်ႇလီသုတ်းၼၼ်ႉ ၵူၼ်း 70-80 ၼႆႉလႆႈ ဢဝ်ၶၢဝ်းယၢမ်းတၢင်းဝၼ်းသေ လႆႈဢုပ်ႇၵုမ်ၵၼ်မႃးတႄႉတႄႉဝႃႈဝႃႈ ၶႃႈဢေႃႈလွင်ႈၼႆႉ” – ဝႃႈၼႆ။
ၸုမ်းသုၼ်ႇလႆႈၵူၼ်းၵူႈမိူင်းမိူင်းဝႃႈ – မိူဝ်ႈၼႂ်းပီ 2016 -2017 သိုၵ်းလူင်ပွင်ၸိုင်ႈမၢၼ်ႈ ၽဵဝ်ႈမူၺ်ႉၵူၼ်းၶိူဝ်း ရူဝ်ႊႁိၼ်ႊၵျႃႊ ၼႂ်းမိူင်းရၶႅင်ႇ လူႉတၢႆတင်းၼမ်၊ ႁူဝ်ၵူၼ်း 7 သႅၼ်ပၢႆ လႆႈပၢႆႈၵႂႃႇယူႇ မိူင်းပင်ႊၵလႃႊထဵတ်ႉ။ ၽွင်းၼၼ်ႉမီးပႃးလွင်ႈပူၼ်ႉပႅၼ်သုၼ်ႇလႆႈၵူၼ်း လွင်ႈၶႃႈႁႅမ်တၢႆ ၼိူဝ်ၵူၼ်းပၢႆႈၽေး ၼႆၸုမ်း တူင်ႉ ၼိုင်သုၼ်ႇလႆၵူၼ်းၶဝ်ပိုၼ်ၽၢဝ်ႇဝႆႉ။
ၵဵဝ်ႇၵပ်းလွင်ႈ ႁူမ်ႈတုမ်ၸိုင်ႈမိူင်းမူႊသလိမ်ႊ ၶဝ်ႈ ၸႅင်ႈၵႂၢမ်း(ၸွႆးတြႃး) မိူင်းမၢၼ်ႈ တီႈလုမ်းတြႃး လုမ်ႈၾႃႉ ၼႆႉသေ တပ်ႉသိုၵ်းၸိုင်ႈတႆး တင်းသွင်ၸုမ်း RCSS/SSA လႄႈ SSPP/SSA ၵေႃႈ ဢွၵ်ႇ လိၵ်ႈ ပိုၼ်ၽၢဝ်ႇၽိုၼ်ၼိုင်ႈ။ ၼၼ်ႉၵေႃႈ တိုၵ်းသူၼ်း ႁႂ်ႈဢဝ်ၶေႃႈမုလ်း လၵ်းထၢၼ်တဵမ် ထူၼ်ႈသေ ၵႂႃႇၶိုၼ်ႈလုမ်းတြႃးလုမ်ၾႃႉ – ဝႃႈၼႆ။
ဝၼ်းတီႈ 11 /11/2019 ၼၼ်ႉ မိူင်းၵမ်ႊပီႊယႃႊ တၢင်တူဝ်မိူင်းမူႊသလိမ်ႊ 57 မိူင်းသေ ၸႅင်ႈၵႂၢမ်းတီႈလုမ်းတြႃး ၸၢတ်ႈၸိုင်ႈလုမ်ႈၾႃႉ ICJ ဝႃႈ သိုၵ်းမၢၼ်ႈၶႃႈႁႅမ်ၽဵဝ်ႈမူၺ်ႉၶိူဝ်းၵူၼ်း၊ ပူၼ်ႉပႅၼ်သုၼ်ႇလႆႈၵူၼ်း ၸၢဝ်းၵြႃးမူႊသလိမ်ႊ ဢၼ် သွၼ်တူဝ်ၵဝ်ႇ ဝႃႈပဵၼ် ၶိူဝ်းရူဝ်ႊႁိၼ်ႊၵျႃႊ ဝႃႈၼႆ။ ၵဵဝ်ႇၵပ်းလွင်ႈၼႆႉ လူင်ပွင်ၸိုင်ႈမၢၼ်ႈ တတ်းတတ်းဝၼ်း တီႈ 20/11/2019 ဝႃႈ တူဝ် တေႃႇဢွင်ႇသၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်း/ၽွင်းလူင်ၾၢႆႇၼွၵ်ႈမိူင်း ၼၼ်ႉ တေၵႂႃႇတေႃႇသူႈလိူင်ႈလၢဝ်း တီႈလုမ်းတြႃး ICJ ဝႃႈၼႆ။
