ဝၼ်းတီႈ 26 – 27 လုၵ်ႈလိူၼ်ၼူဝ်ႊဝႅမ်ပိူဝ်ႊ ၶမ်ႈၶိုၼ်းလိူၼ်သိပ်းသွင်လပ်း တင်း ၶမ်ႈဝၼ်းပီမႂ်ႇတႆး 2114 ၼီႈ ၼၼ်ႉ သင်ၶ ၵူၼ်းမိူင်းလၢႆး ႁၢင်ႈႁႅၼ်းတႃႇႁဵတ်းပွႆးမူၼ်ႈသိူဝ်း ႁပ်ႉပီမႂ်ႇတႆး ၸတ်းတင်ႈပၢႆႉႁပ်ႉတွၼ်ႈပၢင်ပွႆး သမ်ႉၺႃး ၵူၼ်းဢမ်ႇ ႁူႉၾၢႆႇ ၾၼ်းလၢႆႉပၢႆႉသိၵ်ႇ ၵႂႃႇ။

ဝၼ်းတီႈ 23/11/2019 ၼီႈ ၼႆႉ သင်ၶၸဝ်ႈဢွၼ်ႁူဝ် ၵူၼ်းမိူင်းလၢႆးၶႃႈ သႂ်ႇႁႅင်း ႁၢၼ်ႈႁႅၼ်း တႃႇႁဵတ်းပၢင်ပွႆးပီမႂ်ႇတႆး တီႈပၢင်ႇႁူင်းထမ်း (ဢွင်ႈႁိူၼ်းၸဝ်ႈၶူးလူင်) ဢၼ်မီး ၼႂ်း ဝၢၼ်ႈၼွင်ပၢင် ဝဵင်းလၢႆးၶႃႈ။ ပၢႆႉႁပ်ႉတွၼ်ႈၶဝ်ႈႁူမ်ႈပၢင်ပွႆး ၸတ်းတၢင်ႇယုၵ်ႉပူၵ်းမိူဝ်ႈဝႃး ၵၢင်ဝၼ်း 10 မူင်း။ ထိုင်မႃး ၵၢင်ၶိုၼ်းၵေႃႈ ၺႃးယႃႉ သိၵ်ႇၵွႆ ဝႆႉဝႃႈၼႆ။

ၸဝ်ႈၶူး ၵေႃးသၼ်လ ၸဝ်ႈဢၼ်ၶဝ်ႈပႃး ၼႂ်းၵေႃ ပွင်ပဵၼ် ပၢင်ပွႆးလၢတ်ႈဝႃႈ – “ပဵၼ်ၽႂ်မႃးယႃႉၵေႃႈ ဢမ်ႇႁူႉ၊ တိုၵ်ႉႁူမ်ႈၵၼ် ထတ်းတူၺ်းယူႇ။ ပွႆးပီမႂ်ႇၼႆႉ  မၼ်းပဵၼ် ပွႆး ၾိင်ႈ ဢၼ်ၵိုၵ်း ၵပ်းၶိူဝ်းတႆး၊ ပဵၼ်ပွႆးၼႄတၢင်းၵႃႈ ၾိင်ႈတႆး ပွႆးတေတၢၼ်းၶဝ်ႈမႂ်ႇၼမ်ႉမႂ်ႇ၊ သမ်ႉမႃး ယႃႉၵွႆ ၸိူင်ႉၼႆ မၼ်းဢမ်ႇလီပဵၼ်၊ ၸႂ်ၵေႃႈ ဢမ်ႇလီၸွမ်း ၵျႃႉ။ ပေႃးၵႂႃႇႁဵတ်းမႂ်ႇ ၵေႃႈ ၵူဝ်ဢမ်ႇတၼ်းၶိုၼ်း။ လႆႈၵုပ်းၵပ်းၵၼ် သေ မိူဝ်ႈၼႆႉ ပိုတ်ႇပၢင်ၵႂႃႇ ”- ဝႃႈၼႆ။

ပၢင်ပွႆး ႁပ်ႉတွၼ်ႈ ပီမႂ်ႇတႆး ၼႆႉ ပဵၼ်ႁူဝ်ၸႂ် ပီႈၼွင်ႉတႆး၊ ဢမ်ႇၵွမ်ႉၵႃႈ တီႈဝဵင်းလၢႆးၶႃႈၵူၺ်း၊ တႆးႁွတ်ႈဝၢၼ်ႈလႂ် မိူင်းလႂ် ၵေႃႈ ၸတ်းႁဵတ်း ၼင်ႇၵႃႈပွင်ပဵၼ်လႆႈ။

“ပီမႂ်ႇတႆး တီႈဝဵင်းလၢႆးၶႃႈ ႁဝ်းၼႆႉ ဢမ်ႇမိူၼ်တၢင်ႇဝဵင်း၊ ပဵၼ် သင်ၶၸဝ်ႈ ဢွၼ်ႁူဝ်ၼမ်းၼႃႈ ၸတ်းႁဵတ်းမႃးၵူႈပီ၊ ၵူၼ်းဝၢၼ်ႈ ၵူၼ်းမိူင်းၵေႃႈ ၵမ်ႉထႅမ် ပၼ်ႁႅင်းတႄႉ၊ ဢၼ်ပဵၼ် ၸိူင်ႉၼႆ ၼႆႉ ၵႃႈၵွၼ်ႇပူၼ်ႉမႃးၵေႃႈ ဢမ်ႇယၢမ်ႈႁၼ် မႃးသေပွၵ်ႈ ”-  ၸၢႆးၼုမ်ႇလၢႆးၶႃႈလၢတ်ႈၼႄ ၼင်ႇၼႆ။

ပီမႂ်ႇတႆး ဢၼ်ၸတ်းၵိုၼ်းယႂ်ႇ ၼႂ်းပီၼႆႉ တီႈဝဵင်းတူၼ်ႈတီး ၸတ်းႁဵတ်း 7 ဝၼ်း 7 ၶိုၼ်း၊ တၢင်ႇဝဵင်းၵေႃႈ ၸတ်းႁဵတ်း သိုဝ်ႈၽႂ်သိုဝ်ႈမၼ်း။ တၢင်းပွတ်း မိူင်းၵျပၼ်ႊ၊ သိင်ႇၵပူဝ်ႇ၊ ဢိင်းၵလဵတ်ႈ ၊ ဢမေရိၵ ပႃး ၸဵမ်မိူင်းထႆး ဝဵင်းလူင်မိူင်းၵွၵ်ႇ၊ ၵဵင်းမႂ်ႇ ၸိူဝ်းၼႆႉၵေႃႈ ၸတ်းႁဵတ်း။