(ၸၢႆးဢိူမ်ႈၾႃႉ – သူင်ႇၶၢဝ်ႇ) ၸုမ်းၽွမ်ႉႁူမ်ႈ ထုင်ႉမၢဝ်း ႁဵတ်းၽိုၼ်လိၵ်ႈသၢၼ်ၶတ်း ႁူင်းၸၢၵ်ႈဝူၺ်ႇႁင်ႈၵူႈလွင်ႈလွင်ႈ ဢၼ်ႁဵတ်း ႁႂ်ႈတုမ်ႉတိူဝ်ႉၵႄးၼမ်ႉမၢဝ်း။
ဝၼ်းတီႈ 24/10/2019 ၸုမ်းၽွမ်ႉႁူမ်ႈထုင်ႉမၢဝ်း ၸႅၵ်ႇၽိုၼ်လိၵ်ႈဝႂ်ဝိဝ်ဢၼ် သၢၼ်ၶတ်း ႁူင်းၸၢၵ်ႈၸေႈ၊ ၵိူဝ်ဝၢၼ် ၊ ပလၢတ်ႉသတိၵ်ႉ လႄႈ ၸိူဝ်းဢၼ်ၸႂ်ႉတိုဝ်းၶူဝ်းထၢတ်ႈၶႅမ်ႊမီႊ (Chemical) ႁဵတ်းၵၢၼ်တင်းသဵင်ႈ၊ ယွၼ်ႉဝႃႈ ယုၵ်း ယၵ်း ၊ ၼမ်ႉဝူၺ်ႇႁင်ႈ တီႈႁူင်းၸၢၵ်ႈလႆၶဝ်ႈၼႂ်းၵႄးၼမ်ႉမၢဝ်း ႁဵတ်းႁႂ်ႈၼမ်ႉမၢဝ်း ဝူၺ်ႇႁင်ႈဢမ်ႇမူတ်းသႂ် ဝႃႈၼႆ။
ၸၢႆးသၢမ်မိူင်းထီး ၽူႈၼမ်းၼႂ်း ၸုမ်းၽွမ်ႉႁူမ်ႈ ထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ“ၸွမ်းသၢပ်ႇၼမ်ႉမၢဝ်း မီးႁူင်းၸၢၵ်ႈ ဢၼ်ၸႂ်ႉၶူဝ်းထၢတ်ႈၼႆႉၼမ်ၼႃႇ။ ႁႂ်ႈၶဝ်ၵိုတ်းလိုဝ်ႈၼႆ ၵူၼ်းဝၢၼ်ႈၵႂႃႇလၢတ်ႈ ၵေႃႈဢမ်ႇလႆႈ၊ ပူႇၵႄႇ/ ၵၢင်ႉ ၵႂႃႇလၢတ်ႈ ၵေႃႈ ဢမ်ႇလႆႈ။ ႁဝ်းၶႃႈ ႁူမ်ႈၵၼ်တၢင်ႇလိၵ်ႈၵႂႃႇၵေႃႈ ဢမ်ႇပေႃးထိုင်တီႈ။ ယွၼ်ႉၼၼ်ႉ ၶႂ်ႈႁႂ်ႈၵူၼ်းမိူင်းႁဝ်းႁူႉၸွမ်း လွင်ႈ ၼမ်ႉမၢဝ်းဢမ်ႇမူတ်းသႂ်သေ ႁဵတ်းၽိုၼ်ယိုၼ်ႈမိုဝ်း ၸႅၵ်ႇပၼ်ပီႈၼွင်ႉႁဝ်းၶႃႈမႃး”ဝႃႈၼႆ။
ၸုမ်းၽွမ်ႉႁူမ်ႈထုင်ႉမၢဝ်းၼႆႉ ၶွတ်ႇၽွတ်ႈမီးမႃး 5 တီႈ မိူၼ်ၼင်ႇ ဝဵင်းၼမ်ႉၶမ်း၊ ဝဵင်းမူႇၸေႈ(ၸေႊလၢၼ်ႉၶဝ်ႈပႃးဝႆႉ)၊ ပၢင်ႇ သၢႆး၊ ဢိူင်ႇသိပ်းၵဝ်ႈဝၢၼ်ႈ၊ ဢိူင်ႇထုင်ႉလွႆႁူဝ်သိူဝ်ႈ၊ ၸုမ်းၵူၼ်းၼုမ်ႇလႄႈ ပႃႇတီႇၵၢၼ်မိူင်းၸိူဝ်းၼႆႉၵေႃႈ ၶဝ်ႈပႃး ဝႃႈၼႆ။
“ၼမ်ႉမၢဝ်းႁဝ်းၶႃႈၼႆႉ ဢမ်ႇမူတ်းသႂ်ယဝ်ႉ၊ ပႃၵေႃႈဢမ်ႇပေႃးမီးယဝ်ႉ ၶႂ်ႈႁႂ်ႈၵူၼ်းၼႂ်းဝၢၼ်ႈၼႂ်းသူၼ်ႁဝ်း ႁူႉၸွမ်း ”ၸၢႆးသၢမ်မိူင်းထီး လၢတ်ႈၼႄၼင်ၼႆ။
လိူဝ်ၼၼ်ႉ ၵၢၼ်လုတ်ႇသၢႆးၼႂ်းၼမ်ႉမၢဝ်းၸိူဝ်းၼၼ်ႉၵေႃႈ တေသၢၼ်ၶတ်းၵႂႃႇ ယွၼ်ႉဝႃႈတုမ်ႉတိူဝ်ႉသိင်ႇဝႅတ်ႉလွမ်ႉ သေဢမ်ႇၵႃး ႁဵတ်းႁႂ်ႈၼမ်ႉလိုၵ်ႉႁႅင်း၊ ၾင်ႇႁိုၵ်းၵၢၼ်ႉ ၸဵမ်ၸိူဝ်းၼႆႉ။
ၸုမ်းၽွမ်ႉႁူမ်ႈထုင်ႉမၢဝ်းၼႆႉ မီးယိူင်းဢၢၼ်း တႃႇႁႂ်ႈၽွမ်ႉႁူမ်ႈ ပဵၼ်ဢၼ်လဵဝ်ၵၼ်၊ တႃႇၵႅတ်ႇၶႄ ၼမ်ႉလိၼ်ႁိၼ်ၽႃ လႄႈ သုၼ်ႇလႆႈသုၼ်ႇပဵၼ်ၵူၼ်း ၊ တႃႇႁႂ်ႈလႆႈပွင်ၵၢၼ် ႁုၼ်ႈမုၼ်းၶိုၼ်ႈယႂ်ႇ ၸိူဝ်းၼႆႉ။
