(ၸၢႆးဢိူမ်ႈၾႃႉ သူင်ႇၶၢဝ်ႇ) ၵေႃႉဢၼ်ႁၢင်ႈမၢၵ်ႇပွမ်သေ ယွၼ်းငိုၼ်း တီႈႁၢၼ်ႉၶၢႆၼမ်ႉမၼ်း Denko တၢင်းၶဝ်ႈဝဵင်းၵျွၵ်ႉမႄး ၼၼ်ႉ ပလိၵ်ႈမၢၼ်ႈတီႉၺွပ်း လႆႈတူဝ်မၼ်းၸၢႆး မိူဝ်ႈဝႃးၼႆႉ။
ဝၼ်းထီႉ 21/10/2019 ယၢမ်းၵၢင်ဝၼ်း ၸဝ်ႈၼႃႈတီႈပလိၵ်ႈတီႉၺွပ်းလႆႈ ၽူဝ်းၶျိတ်ႉ တီႈႁိူၼ်းမၼ်းၶၢတ်ႈယူႇဢၼ်မီးၼႂ်း ပွၵ်ႉ 8 ဝဵင်းၵျွၵ်ႉမႄး ။ ယွၼ်ႉဝႃႈ ယၢမ်းၵၢင်ၼႂ်ၼၼ်ႉ မၼ်းၸၢႆးၵႂႃႇႁၢင်ႈမၢၵ်ႇ ပွမ်ဝႆႉၼႂ်းႁွင်ႈၼမ်ႉ တီႈပမ်ႉၼမ်ႉမၼ်း Denko သေလွၵ်ႇငိုတ်ႈယွၼ်းငိုၼ်းတီႈၸဝ်ႈလၢၼ်ႉ 10 သႅၼ်ပျႃး ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄးလၢတ်ႈဝႃႈ“မၼ်း မႃးၶၢတ်ႈယူႇတီႈပွၵ်ႉ 8 ၼႆႉ တိုၵ်ႉမီးမွၵ်ႇ 15-16 ဝၼ်းၼႆႉၵူၺ်း။ ၶႃႈတူၺ်းမၼ်း တေလႅပ်ႈပဵၼ်ၵူၼ်းႁဵတ်းၵိၼ် လွၵ်ႇၵိၼ်ၸိူင်ႉၼၼ်ၶႃႈဢေႃႈ။မၼ်းယွၼ်းငိုၼ်း 10 သႅၼ်ပျႃး ႁႂ်ႈသူင်ႇပၼ်ၼႂ်း wave money သေ ပၼ်ဝႆႉတီႈၵပ်းသိုပ်ႇမၼ်းဝႆႉလႄႈ ပိူၼ်ႈၶိုၼ်းဢဝ် Operator ထတ်းႁၼ်မၼ်းသေ ၺွပ်းလႆႈ တူဝ်မၼ်း ”ၼႆၶႃႈ။
ၵူၺ်းၵႃႈမၼ်းၸၢႆးပဵၼ်ၵူၼ်းၸႃႇတိတီႈလႂ် လုၵ်ႉလႂ်မႃးတႄႉဢမ်ႇလႆႈႁူႉၸွမ်း။ ယၢမ်းလဵဝ်ပလိၵ်ႈမၢၼ်ႈၵျွၵ်ႉမႄးၵုမ်းၶင်ဝႆႉသေ ၵူတ်ႇထတ်းဝႆႉယူႇဝႃႈၼႆ။
ၽူႈၸတ်းၵၢၼ် ႁၢၼ်ႉၶၢႆၼမ်ႉမၼ်း Denko လၢတ်ႈတီႈသိုဝ်ႇ ၶၢဝ်ႇဝႃႈ“ ယၢမ်းၵၢင်ၼႂ်ၼၼ်ႉမၼ်းၸၢႆးတႅမ်ႈလိၵ်ႈတိတ်းဝႆႉတီႈ ႁွင်ႈၼမ်ႉၼႂ်းပမ်ႉၼမ်ႉမၼ်းဝႃႈ တီႈၼႂ်းႁွင်ႈၼမ်ႉ မီးမၢၵ်ႇမႅင်း ႁၢင်ႈၵၢင်ဝႆႉ။ သင်ဝႃႈ တဵၵ်ႈၼဵၼ်မၼ်း ၵမ်းလဵဝ်ၵူၺ်း ၵေႃႈ မၢၵ်ႇတႅၵ်ႇယဝ်ႉ။ပေႃးၵူဝ်ၵေႃႈ သူင်ႇ ပၼ်ငိုၼ်းၸွမ်း Wave Money 10 သႅၼ်ပျႃး ၼႆဝႆႉ ။ၽိူဝ်ႇၸဝ်ႈၼႃႈတီႈမႃးးတူၺ်းပဵၼ်မၢၵ်ႇမႅင်းဢမ်ပွမ် ” – ဝႃႈၼႆ။
ၼႂ်းၸေႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးတင်းၼမ်၊ ၵူၼ်းႁေႃႈၵႃးတင်ႇဝူဝ်း/ၵႂၢႆး ဢၼ်ၺႃးယိုဝ်း မၢတ်ႇၸဵပ်းလူႉတၢႆ ၵေႃႈမီးၼမ်။ ၵူၼ်းမိူင်းၸိူဝ်းၵႂႃႇႁႆႈ၊ ၵႂႃႇသူၼ်ၵေႃႈ ၵႆႉယဵပ်ႇၺႃးမၢၵ်ႇ ၾင်လိၼ် မၢတ်ႇၸဵပ်းလူႇတၢႆၵေႃႈမီး ယူႇၵူႈလိူၼ်။
