ၵူၼ်းၼုမ်ႇတႆး ႁွတ်ႈၵဵင်းမႆႇ တေႁူမ်ႈၵၼ်လဵၼ်ႈမၢၵ်ႇၼင် မၢႆတွင်းႁပ်ႉတွၼ်ႈပီမႂ်ႇတႆး 2114 ၼီႈ လႄႈ ႁႃငိုၼ်းၵွင်ၵၢင် တႃႇၵမ်ႉၸွႆႈ ႁူင်းႁဵၼ်းၸွမ်းလႅၼ်လိၼ်တႆး – ထႆး။
ဝၼ်းတီႈ 17/11/2019 ယၢမ်းၵၢင်ၼႂ် 9 မူင်း ၵူၼ်းၼုမ်ႇတႆး လၢႆလၢႆၸုမ်း ၼႂ်းၵဵင်းမႆႇ (Shan Football Club) တေႁူမ်ႈၵၼ် လဵၼ်ႈမၢၵ်ႇၼင် တီႈပၢင်ႇလဵၼ်ႈမၢၵ်ႇၼင် 2S SPORT ARENA ၸႄႈဝဵင်းၵဵင်းမႆႇ ၸိုင်ႈထႆး။ ၸုမ်းၵူၼ်းၼုမ်ႇတႆး ဢၼ် တေၶဝ်ႈ ႁူမ်ႈလဵၼ်ႈ ပၼ်သဵၼ်ႈမၢႆဝႆႉ တင်းမူတ်းမီး 24 ၸုမ်းယဝ်ႉ ဝႃႈၼႆ။
ၸၢႆးၶိူဝ်းလႅင်း ၽူႈဢွၼ်ႁူဝ်တႃႇပွင်ပဵၼ်မႃး ပၢင်ၶေႉမၢၵ်ႇၼင် လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ႁဝ်းၶႃႈ တေၸတ်းႁဵတ်း မၢႆတွင်းႁပ်ႉတွၼ်ႈပီမႂ်ႇတႆး 2114 ၼီႈသေ တေၵဵပ်းပႃးငိုၼ်းၵွင်ၵၢင် တီႈၸုမ်းမႃးၶဝ်ႈၶေႉၶဵင်ႇပိတ်ႉ ၼိုင်ႈၸုမ်းလႂ် 1,200 ဝၢတ်ႇ။ ငိုၼ်းၸိူဝ်းၼႆႉ ႁဝ်းၶႃႈ တေႁၵ်းၸႂ်ႉၸၢႆႇ ၵႃႈပၢင်ႇလဵၼ်ႈယဝ်ႉသေ တီႈလိူဝ်မၼ်း တင်းမူတ်း ႁဝ်းၶႃႈ တေဢဝ်မိူဝ်း ၸွႆႈပၼ် လုၵ်ႈႁဵၼ်းတီႈႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်းၶႃႈ” ဝႃႈၼႆ။
ယူႇတီႈၵူၼ်းၼုမ်ႇတႆး ၵဵင်းမႆႇၼႆႉ ႁူမ်ႈၵၼ်လဵၼ်ႈမၢၵ်ႇၼင်သေ ႁႃငိုၼ်းၵွင်ၵၢင် ၵႂႃႇၸွႆႈၵမ်ႉထႅမ်ပၼ်လုၵ်ႈႁဵၼ်း တီႈႁူင်း ႁဵၼ်းၸိူဝ်ႉၸၢတ်ႈ လွႆတႆးလႅင်းၼၼ်ႉ မီးမႃး 3 ပီ ယဝ်ႉ ဝႃႈၼႆ။
ၸၢႆးၶိူဝ်းလႅင်း သိုပ်ႇလၢတ်ႈဝႃႈ “ ႁဝ်းၶႃႈ ပႂ်ႉႁပ်ႉသဵၼ်ႈမၢႆၸုမ်းၵူၼ်းၼုမ်ႇႁဝ်းၶႃႈ တေၶဝ်ႈႁူမ်ႈလဵၼ်ႈၸွမ်း တေႃႇထိုင် ဝၼ်း တီႈ 10/11/2019 လိူၼ်ၼႃႈၶႃႈ။ ငိုၼ်းၵွင်ၵၢင် ဢၼ်ႁဝ်းၶႃႈ လႆႈမႃးၼၼ်ႉ တေသိုဝ်ႉၶိူင်ႈၵမ်ႉထႅမ် လွင်ႈၸႂ်ႉတိုဝ်းၼႂ်းၵၢၼ် ႁဵၼ်း။ ယဝ်ႉၵေႃႈ ၵၢၼ်လဵၼ်ႈႁႅင်း မၢၵ်ႇၼင်၊ ၵူဝ်း ၸဵမ်ၸိူဝ်းၼႆႉ တေဢဝ်မိူဝ်ႈတွၼ်းပၼ် လုၵ်ႈႁဵၼ်း။ ႁဝ်းၶႃႈတႄႉ ႁၢင်ႈ ႁႅၼ်းဝႆႉ ၸိူင်ႉ ၼႆၶႃႈ” ဝႃႈၼႆ။
ပၢင်ပွႆးၶေႉၶဵင်ႇလဵၼ်ႈမၢၵ်ႇၼင်ပွၵ်ႈၼႆႉ တေမီးသူးရၢင်းဝလ်းတွၼ်ႈထိုင် ၽူႈၵတ်ႉၶႅၼ်ႇ/ ၸုမ်းၵတ်ႉၶႅၼ်ႇ ဢၼ်လႆႈသူး ထီႉၼိုင်ႈ၊ သွင်၊ သၢမ် ဝႃႈၼႆ။
