ၵူၼ်းဝၢၼ်ႈ 2 ၵေႃႉ ၵႂႃႇၽဵဝ်ႈသူၼ်ၼဵင်ႈၼႂ်းၸႄႈဝဵင်းၵျွၵ်ႉမႄး ယဵပ်ႇၺႃးမၢၵ်ႇမႅင်းၾင်လိၼ်လႄႈ လူႉတၢႆထင်တီႈ 1 ၵေႃႉ မၢတ်ႇၸဵပ်း 1 ၵေႃႉ။
ဝၼ်းတီႈ 8/10/2019 ယၢမ်းၵၢင်ၼႂ်မွၵ်ႈ 10 မူင်းၼၼ်ႉ လုင်းတႃႇဢေး ဢႃယု မွၵ်ႈ 40 ပီ တင်း ၸၢႆးပၢၼ်းၸၢမ်ႇ ဢႃယု မွၵ်ႈ 30 ပၢႆ ပဵၼ်ၵူၼ်းဝၢၼ်ႈတွင်ႇပလူဝ်ႉ ဢိူင်ႇတေႃႉသၢင်ႇ ၵိင်ႇၸႄႈဝဵင်းမိူင်းလူင် ၸႄႈတွၼ်ႈၵျွၵ်ႉမႄး ၵႂႃႇၽဵဝ်ႈသူၼ်ၼဵင်ႈ သေ ယဵပ်ႇၺႃးမၢၵ်ႇမႅင်းၾင်လိၼ်။
ဢူးတႃႇဢေး မၢၵ်ႇတႅၵ်ႇတိူဝ်ႉတၢႆထင်တီႈ။ ၵေႃႉမၢတ်ႇၸဵပ်းသမ်ႉ ပဵၼ်ၸၢႆး ပၢၼ်းၸၢမ်ႇ ဝႃႈၼႆ။
ဢူးတိၼ်ႇမွင်ႇတဵင်း ၸုမ်းၸွႆႈထႅမ်ၸီႇဝိတ်ႉတ ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵၢင်ၼႂ် 10 မူင်းၼၼ် ၶဝ်မိူဝ်းၽဵဝ်ႈသူၼ်ၼဵင်ႈသေ ယဵပ်ႇၺႃးမၢၵ်ႇ ၶဝ်ၵပ်းၾူၼ်းမႃးလႄႈ ႁဝ်းၶႃႈလႆႈၵႂႃႇႁပ်ႉမႃး။ ၽူႈၸၢႆး ၵေႃႉၼိုင်ႈတႄႉ လႆႈ လူႉတၢႆထင်တီႈ၊ ထႅင်ႈၵေႃႉၼိုင်ႈသမ်ႉ မၢတ်ႇၸဵပ်းႁႅင်းဝႆႉ။ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ် ထိုင်မႃး ယၢမ်းႁူဝ်ၶမ်ႈ မွၵ်ႈ 5 မူင်းၶိုင်ႈၼၼ်ႉ ၸင်ႇလႆႈတေႃႉဢဝ်မႃးသူင်ႇတီႈႁူင်းယႃ ၵျွၵ်ႉမႄး”ဝႃႈၼႆ။
ၸၢႆးပၢၼ်းၸၢမ်ႇ ၵေႃႉတိူဝ်ႉၺႃးမၢၵ်ႇၼၼ်ႉသမ်ႉ တိူဝ်ႉၺႃး ၼႃႈဢူၵ်းၾၢႆႇၶႂႃ၊ လင်မိုဝ်းၾၢႆႇသၢႆႉ၊ ၶႃၾၢႆႇၶႂႃ ယဝ်ႉၵေႃႈ ၸွမ်း ပုမ် ၸဵမ်ၸိူဝ်းၼႆႉ။
ၼႂ်းၸႄႈဝဵင်းၵျွၵ်ႉမႄးၼႆႉ တႄႇဢဝ်ၼႂ်းလိူၼ်သႅပ်ႊထႅမ်ႊပိူဝ်ႊ လႄႈ ႁူဝ်လိူၼ်ဢွၵ်ႊထူဝ်ႊပိူဝ်ႊ 2019 ၼႆႉ မႃးၵူၼ်းမိူင်း ယဵပ်ႇၺႃးမၢၵ်ႇမႅင်း တင်းမူတ်း 6 ၵေႃႉ။ ၼႂ်းၼၼ်ႉ တႃႇ 4 ၵေႃႉ လႆႈသူင်ႇယူတ်းယႃတူဝ် တီႈႁူင်းယႃ ၵျွၵ်ႉမႄး။
