ၼၢင်းယိင်း သွင်ၵေႃႉမႄႈလုၵ်ႈၵႂႃႇႁႃၽိုၼ်းသေ ယဵပ်ႇၺႃးမၢၵ်ႇမႅင်းၾင်လိၼ် တႅၵ်ႇသႂ်ႇ မၢတ်ႇၸဵပ်းႁၢဝ်ႈႁႅင်း လႆႈႁၢမ် သူင်ႇႁူင်းယႃ လူင်ဝဵင်းလႃႈသဵဝ်ႈ။
ဝၼ်းတီႈ 28/1/2020 ယၢမ်းၵၢင်ၼႂ်မွၵ်ႈ 10 မူင်းပၢႆၼၼ်ႉ ပႃႈယႃၼူၼ်း ဢႃယု 49 ပီ တင်း လုၵ်ႈယိင်း လူၺ်းသႅင်လၢဝ် ဢႃယု 13 ပီ ယဵပ်ႇၺႃးမၢၵ်ႇမႅင်းၾင်လိၼ် တီႈသူၼ်ၼဵင်ႈ ႁိမ်းဝၢၼ်ႈၵွၼ်သလမ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၽွင်းၵႂႃႇႁႃၽိုၼ်း ဝႃႈၼႆ။
ၵူၼ်းပိုၼ်ႉတီႈ ပွတ်းမိူင်းငေႃႉ လၢတ်ႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ၊ သွင်ၵေႃႉမႄႈလုၵ်ႈ ယဵပ်ႇၺႃးမၢၵ်ႇ။ ပဵၼ်ပီႈၼွင်ႉလွႆ ႁဝ်းၶႃႈဢေႃႈ။ ၵေႃႉပဵၼ်လုၵ်ႈယိင်းတႄႉ တိူဝ်ႉမၢတ်ႇၸဵပ်းႁႅင်းဝႆႉၼႆၶႃႈဢေႃႈ၊ တၢင်းဝၢၼ်ႈၵွၼ်သလမ်းၼႆႉ မီးပွတ်းဝၢၼ်ႈ တေႃႉသၢင်ႇၼႆႉ၊ မီးၾၢႆႇတူၵ်းတင်းဝၢၼ်ႈပၢင်မၢၵ်ႇမိုဝ်း၊ တၢင်းပွတ်းတွၼ်ႈၼၼ်ႉတႄႉ ပဵၼ်ၸုမ်းယိပ်းၵွင်ႈၵၢင်ႇၶဝ် တူင်ႉ ၼိုင်ယူႇဝႆႉၶႃႈဢေႃႈၼၼ်ႉ”ဝႃႈၼႆ။
သွင်မႄႈလုၵ်ႈ ဢၼ်ယဵပ်ႇၺႃးမၢၵ်ႇမႅင်းၼႆႉ ၸုမ်းၸွႆႈထႅမ် “ဢိုမ်းတမၢဝ်း” လႆႈၵႂႃႇႁပ်ႉဢဝ်ဢွၵ်ႇမႃးသေ သူင်ႇႁူင်းယႃလႃႈ သဵဝ်ႈဝႆႉ။
မၢႆးဢပၢမ်း ၸုမ်းၸွႆႈထႅမ်ဢိုမ်းတမၢဝ်း လၢတ်ႈတီႈသိုဝ်ႇၶၢဝ်ႇ သူၺ်ႇၽီႇမေႇဝႃႈ “ ၵေႃႉပဵၼ်လုၵ်ႈယိင်းတႄႉ လႆႈတိူဝ်ႉမၢတ်ႇ ၸဵပ်း တီႈလုပ်ႇၶီႈၶင်ႈ၊ ၶႃသွင်ၶွၼ် မၢတ်ႇၸဵပ်းလိူဝ်ႁႅင်းဝႆႉ။ ၵေႃႉပဵၼ်မႄႈတႄႉ တိူဝ်ႉၺႃး ၶႃၾၢႆႇၶႂႃလႄႈတီႈပုမ် ၸိူဝ်းၼႆႉ” ဝႃႈၼႆ။
တၢင်းပွတ်းတွၼ်ႈ ႁိမ်းဝၢၼ်ႈၵွၼ်သလမ်း ဢၼ်သွင်မႄႈလုၵ်ႈ ယဵပ်ႇၺႃးမၢၵ်ႇမႅင်းၼၼ်ႉ မိူဝ်ႈဝႃးယၢမ်းၵၢင်ၼႂ် လႆႈပဵၼ် ပၢင်တိုၵ်းၵၼ် ၵမ်းၼိုင်ႈ ဢမ်ႇပေႃးႁၢဝ်ႈႁႅင်း ၵူၼ်းပိုၼ်ႉတီႈ တၢင်းဝၢၼ်ႈၵွၼ်သလမ်းလၢတ်ႈ။
ၵဵဝ်ႇလူၺ်ႈၵူၼ်းဝၢၼ်ႈ ယဵပ်ႇၺႃးမၢၵ်ႇမႅင်းၼႆႉ ပဵၼ်ၸုမ်းလႂ် ႁၢင်ႈၵၢင်ဝႆႉ ဢၼ်ဝႃႈၼၼ်ႉ ဢမ်ႇလႆႈႁူႉ၊ တၢင်းပွတ်းတွၼ်ႈ ၼၼ်ႉ တပ်ႉသိုၵ်းလူင်ပွင်ၸိုင်ႈတင်း သိုၵ်း TNLA တူင်ႉၼိုင်ၵႂႃႇမႃးယူႇတႃႇသေႇ ဝႃႈၼႆ။
ဝၼ်းတီႈ 28 ဝၼ်းလဵဝ်ၵၼ်ၵူၺ်းၼင်ႇၵဝ်ႇ သွင်မႄႈလုၵ်ႈ ၵူၼ်းဝၢၼ်ႈပၢင်မၢၵ်ႇမိုဝ်း တိူဝ်ႉၺႃးမၢၵ်ႇၵွင်ႈ ၼႂ်းၵႄႈပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်း TNLA တီႈႁိမ်းဝၢၼ်ႈပၢင်မၢၵ်ႇမိုဝ်းသေ လႆႈလူႉတၢႆထင်တီႈ တင်းသွင်ၵေႃႉ မႄႈလုၵ်ႈ ဝႃႈၼႆ။
