ၽူႈၸၢႆး 2 ၵေႃႉ ၵႂႃႇႁႃၽိုၼ်း(မႆႉလူဝ်) တႃႇမႃးလူႇတၢၼ်း ၼႂ်းလိူၼ် 3 မူၼ်း ၵႂႃႇယဵပ်ႇၺႃးမၢၵ်ႇမႅင်းၾင်လိၼ် တၢႆၵေႃႉ ၼိုင်ႈ မၢတ်ႇၸဵပ်းႁၢဝ်ႈႁႅင်းၵေႃႉၼိုင်ႈ။
ဝၼ်းတီႈ 3/2/2020 ယၢမ်းႁူဝ်ၶမ်ႈ 5 မူင်း မွင်ႇဢႃးသၢမ် ဢႃယု 28 ပီ တင်း မၢႆးမွင်ႇၼၢႆႇ ဢႃယု 20 ပီ ၵႂႃႇႁႃၽိုၼ်း(မႆႉလူဝ်) သေ ယဵပ်ႇၺႃးမၢၵ်ႇမႅင်းၾင်လိၼ် တီႈႁိမ်းမၢၼ်ႈၵၢင် ၵိင်ႇၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ မွင်ႇ ဢႃးသၢမ်တႄႉ လႆႈလူႉတၢႆတီႈၼၼ်ႈ။ ၵေႃႉပဵၼ် မၢႆးမွင်ႇၼၢႆႇ လႆႈမၢတ်ႇၸဵပ်းႁၢဝ်ႈႁႅင်း။ ယူႇတီႈၸုမ်းၸွႆႈထႅမ် ဢိုမ်းတမၢဝ်း လႆႈၵႂႃႇႁပ်ႉတူဝ်တၢႆလႄႈ ၵူၼ်းမၢတ်ႇၸဵပ်း သူင်ႇႁူင်းယႃ ၵျွၵ်ႉမႄး။
မွင်ႇဢႃႈပမ်း ၸုမ်းၸွႆႈထႅမ် ဢိုမ်းတမၢဝ်း လၢတ်ႈတီႈၽူႈတွႆႇႁွၵ်ႈဝႃႈ “ ပေႃးလိူၼ် 3 မူၼ်းၼႆႉ ႁဝ်းၶႃႈ တေလူႇမႆႉလူဝ်ၵၼ် ၶႃႈ။ ယွၼ်ႉၼၼ် ၶဝ် 2 ၵေႃႉ ၵႂႃႇတႅပ်ႉမႆႉလူဝ် တီႈႁိမ်းမၢၼ်ႈၵၢင်ၼၼ်ႉ။ ထိုင်မႃး ယၢမ်းႁူဝ်ၶမ်ႈ 5 မူင်းၼႆႉ ယဵပ်ႇၺႃးမၢၵ်ႇ မႅင်း” ဝႃႈၼႆ။
မွင်ႇဢႃးသၢမ် ဢႃယု 28 ပီ ဢၼ်ယဵပ်ႇၺႃးမၢၵ်ႇသေ လူႉတၢႆၼၼ်ႉ ပဵၼ်ၵူၼ်းတၢင်းဝၢၼ်ႈတေႃႉၽေႇ။ မၢႆးမွင်ႇၼၢႆႇ ဢႃယု 20 ပီသမ်ႉ ပဵၼ်ၵူၼ်းတၢင်းဝၢၼ်ႈဢႃႇပျွင်ႇ (အာပြောင်ကျေးရွာ) ဝႃႈၼႆ။
မွင်ႇဢႃႈပမ်း လၢတ်ႈဝႃႈ “ ၵေႃႉလူႉတၢႆၼၼ်ႉ ဢမ်ႇၸႂ်ႈဝႃႈ မၼ်းၸၢႆးလူႉတၢႆထင်ႇတီႈၵမ်းလဵဝ်။ မိူဝ်ႈၽွင်းၼၼ်ႉ ၶႃမၼ်း ပုတ်းတင်း 2 ၶွၼ်သေ မၼ်းၸၢႆးၼႅတ်ႈၵၢၼ်းၵႂႃႇဢဝ်ၶႃမႃးသႂ်ႇ ယွၼ်ႉလိူတ်ႈဢွၵ်ႇၼမ်သေ လႆႈလူႉတၢႆၵႂႃႇ” ဝႃႈၼႆ။
လိူဝ်ၼၼ်ႉ မၢႆးမွင်ႇၼၢႆႇတႄႉ မၢၵ်ႇတႅၵ်ႇတိူဝ်ႉသႂ်ႇ ၶႃၾၢႆႇသၢႆႉ တင်း ႁူင်းယဵဝ်ႈ ဝႃႈၼႆ။
မွင်ႇဢႃႈပမ်း လၢတ်ႈဝႃႈ “ တေႃႈလဵဝ်ၼႆႉ ၵူၼ်းမၢတ်ႇၸဵပ်းတႄႉ လႆႈသူင်ႇႁူင်းယႃ ၵျွၵ်ႉမႄးဝႆႉ။ ၵူၺ်းၵႃႈ ဢမ်ႇထိုင်တီႈလႆႈ မႆႈၸႂ်။ သင်ဝႃႈ မီးလွင်ႈႁၢဝ်ႈႁႅင်းၸိုင် တေဢဝ်တေႃႉသူင်ႇၵႂႃႇ လႃႈသဵဝ်ႈဢမ်ႇၼၼ် ဝဵင်းလိူဝ်ႇ” ဝႃႈၼႆ။
ၼႂ်းၵိင်ႇၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄးၼႆႉ ၼႂ်းႁူဝ်ပီ 2020 ၼႆႉၵူၺ်း ၵူၼ်းမိူင်း ယဵပ်ႇၺႃးမၢၵ်ႇမႅင်း လႆႈလူႉတၢႆၵႂႃႇ မီး 2 ၵေႃႉယဝ်ႉ။ မၢတ်ႇၸဵပ်း 10 ၵေႃႉ ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်း ၵျွၵ်ႉမႄးႁဝ်းၶႃႈဢၼ်ယူႇၸမ်ႁိမ်းၸုမ်းယိပ်းၵွင်ႈၵၢင်ႇ တူင်ႉၼိုင်ယူႇၼၼ်ႉ ၵူၼ်းမိူင်းလႆႈပဵၼ်ဢၼ်လႆႈၵူဝ်ဝႆႉယူႇ ၵူႈၶၢဝ်း ယၢမ်း” ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းသိုၵ်းလူင်ပွင်ၸိုင်ႈမၢၼ်ႈ၊ သိုၵ်း TNLA ၊ RCSS လႄႈ SSPP ၸဵမ်ၸိူဝ်းၼႆႉ တူင်ႉၼိုင် ၵႂႃႇမႃး ယူႇသဝ်းဝႆႉ ဝႃႈၼႆ။
