ၽူႈယိင်း 2 ယဵပ်ႇၺႃးမၢၵ်ႇ တီႈႁိမ်းဝၢၼ်ႈၶုမ်ငိုၼ်း ၸႄႈဝဵင်းၵျွၵ်ႉမႄး မၢတ်ႇၵေႃႉၼိုင်ႈ၊ တၢႆၵေႃႉၼိုင်ႈ ဝႃႈၼႆ။
ဝၼ်းတီႈ 11/11/2018 ယၢမ်းၵၢင်ၼႂ် 9 မူင်း ၽူႈယိင်း 2 ၵေႃႉ ၶီႇရူတ်ႉၶိူင်ႈသွၼ်ႉမႃးၸွမ်းၵၼ်သေ ႁွတ်ႈၽႅဝ်တီႈႁိမ်း ၶူဝ်ၶုမ်ငိုၼ်း ၾၢႆႇတူၵ်းမိူင်းတၢင်ႈ ၼႂ်းၵႄႈ ၵျွၵ်ႉမႄး – ၼွင်ၶဵဝ် ၼႂ်းၸႄႈဝဵင်းၵျွၵ်ႉမႄး မၢၵ်ႇတႅၵ်ႇၽူင်ႉသႂ်ႇၶႃသွင်ၵေႃႉ။ လူၺ်းၶမ်းယဵၼ်ႇ ဢႃယု 20 ပီ လႄႈ လူၺ်းငူၺ်ႇၶၢႆႇ ဢႃယု 26 ပီ ဝႃႈၼႆ။
ၸဝ်ႈၼႃႈတီႈ ၼႂ်းၸုမ်းၸွႆႈထႅမ် ၽေးၵိုင်ႉၵၢင်ႉၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ လုၺ်ႈငူၺ်ႇၶၢႆႇ လႆႈတိူဝ်ႉၸွမ်း ပုမ်၊ ၶေႃးလႄႈ မိုဝ်း ၸိူဝ်းၼႆႉ။ လူၺ်းၶမ်းယဵၼ်ႇသမ်ႉ မၢတ်ႇၸဵပ်းလိူဝ်ႁႅင်း လႆႈၵႂႃႇလူႉတၢႆ တီႈႁူင်းယႃလူင် ဝဵင်းလိူဝ်ႇ ယၢမ်းၵၢင်ၶိုၼ်း 11 မူင်း” ဝႃႈၼႆ။
သိုပ်ႇလၢတ်ႈဝႃႈ “ၵူၼ်းယဵပ်ႇၺႃးမၢၵ်ႇ 2 ၵေႃႉၼႆႉ မိူဝ်ႈတႄႇမၼ်း သူင်ႇၵႂႃႇတီႈႁူင်းယႃၵျွၵ်ႉမႄး။ ယွၼ်ႉဝႃႈ ၶိူင်ႈၽႃႇ တတ်း ဢမ်ႇတဵမ်ထူၼ်ႈၼႆသေ လူၺ်းၶမ်းယဵၼ်ႇၼၼ်ႉ လႆႈသူင်ႇတူဝ်ၵႂႃႇတီႈႁူင်းယႃ ဝဵင်းလိူဝ်ႇ ႁွတ်ႈၽႅဝ်တီႈ ပုၼ်ႉ 7 မူင်းၵၢင်ၶမ်ႈ။ ထိုင်မႃး ယၢမ်း 11 မူင်းၵၢင်ၶိုၼ်းၵေႃႈ မၼ်းၼၢင်းလႆႈလူႉတၢႆၵႂႃႇ” ဝႃႈၼႆ။
တီႈႁိမ်းဝၢၼ်ႈၶုမ်ငိုၼ်း ၸႄႈဝဵင်းၵျွၵ်ႉမႄးၼၼ်ႉ ၵူၼ်းမိူင်းယဵပ်ႇၺႃးမၢၵ်ႇ မီး 3 ၵေႃႉယဝ်ႉသေ ၼႂ်းပီၼႆႉ ၵူၼ်းမိူင်း ၵျွၵ်ႉမႄး ယဵပ်ႇၺႃးမၢၵ်ႇ ဢမ်ႇယွမ်း 10 ၵေႃႉယဝ်ႉ ဝႃႈၼႆ။
ၸုမ်းၸွႆႈထႅမ် ၵျွၵ်ႉမႄး ၵေႃႉၼိုင်ႈလၢတ်ႈဝႃႈ “ ယူႇတီႈၸုမ်းႁဝ်းၶႃႈ လႆႈၸွႆႈထႅမ်ၵူၼ်းမိူင်းဢၼ်ယဵပ်ႇၺႃးမၢၵ်ႇၼႆႉ ဢမ်ႇယွမ်း 10 ၵေႃႉယဝ်ႉ။ ဢၼ်ယဵပ်ႇၺႃးတႄႉၵေႃႈ သင်ၶၸဝ်ႈ၊ ၽူႈယိင်း၊ ၽူႈၸၢႆးလႄႈ လုၵ်ႈဢွၼ်ႇ ၸဵမ်ၸိူဝ်းၼႆႉ” ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃး တပ်ႉသိုၵ်းလူင်ပွင်ၸိုင်ႈမၢၼ်ႈ၊ တပ်ႉ သိုၵ်းတဢၢင်း(TNLA)၊ တပ်ႉသိုၵ်း(SSPP)လႄႈ တပ်ႉသိုၵ်း(RCSS) ၸဵမ်ၸိူဝ်းၼႆႉ တူင်ႉၼိုင်ၵႂႃႇမႃးယူႇတႃႇသေႇ ၵူၺ်းပဵၼ်ၼမ်ႉမိုဝ်းၽႂ်ၼႆ ထိုင်ယၢမ်းလဵဝ်ယင်းပႆႇႁူႉ။
