သိုၵ်းလူင်ပွင်ၸိုင်ႈမၢၼ်ႈ  သူင်ႇႁႅင်းသိုၵ်း ႁူမ်ႈဢႃႊသီႊယၼ်ႊ ၾိုၵ်းလိုမ်ႉၵၢၼ်သိုၵ်း ၸွမ်းမိူင်း ဢမေႊရီႊၵၼ်ႊ  တီႈၵူတ်ႉၼမ်ႉပၢင်ႇလၢႆႇထႆးတင်ႈတႄႇဝၼ်းမိူဝ်ႈၼႆႉထိုင်ဝၼ်းတီႈ 6 /9/2019။

ပၢင်ၾိုၵ်းၵၢၼ်သိုၵ်းၼမ်ႉ    ဢၼ်မီးၸိုဝ်ႈဝႃႈ ASEAN-US Maritime Exercise – AUMX    ၼႆႉ ၾၢႆႇတၢင်းမိူင်းမၢၼ်ႈ သူင်ႇႁႅင်းသိုၵ်း ၼိုင်ႈတပ်ႉၵွင်  ဢၼ် ၸဝ်ႈသိုၵ်းလူင် ၶုၼ်ႇဢွင်ႇၵျေႃႇ ၼမ်းၾုင်ႁိူဝ်းသိုၵ်း “ၵျၢၼ်ႇၸိတ်ႉတႃး” ၼၼ်ႉၶဝ်ႈႁူမ်ႈၾိုၵ်းၸွမ်း။ ပၢင်ၾိုၵ်းသိုၵ်းၵမ်းၼႆႉမီး ႁိူဝ်းမိၼ်လႄႈႁိူဝ်းၼမ်ႉ   7 ၸိုင်ႈမိူင်း မႃးၾိုၵ်းၵၢၼ်သိုၵ်း။

ၸိုင်ႈမိူင်း ဢႃႊသီႊယၼ်ႊ 10 မိူင်းၼႆႉ မိူဝ်ႈပီ 2018 ၵေႃႈ ၾိုၵ်းသိုၵ်းၸွမ်း မိူင်းၶႄႇ ၼႂ်းၼမ်ႉပၢင်ႇလၢႆႇၶႄႇတွၼ်ႈၸၢၼ်း။ ၽူႈလဵပ်ႈႁဵၼ်းၵမ်ႈၽွင်ႈလၢတ်ႈဝႃႈ ဢၼ်ႁူမ်ႈတုမ်မိူင်းဢႃႊသီႊယၼ်ႊ ၾိုၵ်းသိုၵ်းၸွမ်း မိူင်းဢမေႊရီႊၵၼ်ႊ  ၼႆႉယွၼ်ႉပိူဝ်ႈၶႄႇ သူင်ႇႁႅင်းသိုၵ်း ၶိုင်ၵုမ်းၵမ် ၼႃႈၼမ်ႉပၢင်ႇလၢႆႇ ၵုၼ်ထႅဝ်ဢၼ်မီးပၼ်ႁႃ ဝူင်ႈၵၢင်မိူင်းၶႄႇ မိူင်းၾိလိပ်ႉပိၼ်း ၊ မိူင်းဝႅတ်ႉၼၢမ်းၸိူဝ်းၼႆႉဝႃႈၼႆ။

ၸွမ်းၼင်ႇၸုမ်း GFP (Global Firepower) ပိုၼ်ၽၢဝ်ႇႁၢႆးငၢၼ်း ၸၼ်ႉဢဵၼ်ႁႅင်းသိုၵ်းၼႂ်းလုမ်ႈၾႃႉ ၼၼ်ႉသေ ၼႂ်းပီ 2019 ၼႆႉ 137 ၸိုင်ႈမိူင်း   ၼႂ်းလုမ်ႈၾႃ ႉ ၼႆႉ ဢမေႊရီႊၵၼ်ႊ  မီးႁႅင်းသိုၵ်း ၼမ်သုတ်းထိ 1 ။ ၶႄႇပဵၼ်ထိ 3 ။ မိူင်းဢိၼ်ႊတူဝ်ႊၼီႊသျႃႊ မီးႁႅင်းသိုၵ်းၼမ်ထိ 16 ၊ ဝႅတ်ႉၼၢမ်း 23၊ ထႆး 26 သေ တပ်ႉသိုၵ်းမၢၼ်ႈၼႆႉ ႁႅင်းသိုၵ်းမီးတီႈၸၼ်ႉ 37- ဝႃႈၼႆဝႆႉ။

တပ်ႉသိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ဢဵၼ်ႁႅင်းသိုၵ်းၶဝ်မီး  4 သႅၼ်ပၢႆ။ တပ်ႉလူမ်းၶဝ်မီး ၶိူင်ႈမိၼ် ယိုဝ်း သိုၵ်းလႄႈ ၶိူင်းမိၼ်တေႃႉသူင်ႇၶူဝ်း တင်းမူတ်းမီး 276 လမ်း။ တီႈတပ်ႉလိၼ်ၼၼ်ႉ မီးရူတ်ႉၵႃးတႅင်ႉ 434 လမ်း၊ ၵႃးၵၢပ်ႇလဵၵ်း 1300 လမ်း။ ၵႃးၵွင်ႈလူင် 108 လမ်း။ ၵွင်ႈလူင် (သွႆးဢမျွၵ်ႉ) မီး 1500 ပၢႆ။ မၢၵ်ႇလွင်ႇၶျႃႇ 114 ဢၼ်၊ တီႈတပ်ႉၼမ်ႉၼၼ်ႉမီးၶိူင်ႈၸႂ်ႉၼႂ်းၼမ်ႉ 155 လမ်း – ဝႃႈၼႆ။

သိုဝ်ႇၶၢဝ်ႇမျၢၼ်ႇမႃႇထၢႆးမ်တႄႉပိုၼ်ၽၢဝ်ႇဝႆႉဝႃႈ တႃႇတေယုၵ်ႉၸၼ်ႉတပ်ႉသိုၵ်းလူင်ပွင်ၸိုင်ႈၼႆသေ ၸွမ်ၸိၵ်းသိုၵ်းလူင်မိၼ်းဢွၵ်ႇလႅင်ႇ ႁွတ်ႈထိုင်မိူင်း ရတ်ႉသျႃး၊ မိူင်း ယူႊရူပ်ႊ ၊ မိူင်းဢိတ်ႉသရေး ၊ မိူင်းၶႄႇ ၊မိူင်းဢိၼ်ႊတီႊယႃႊ မိူင်းၸဵင်ႇၸၢၼ်း ဝၼ်းဢွၵ်ႇၵုၼ်ၶဵဝ်ဢေႊသျႃႊ။ ႁႃသိုဝ်ႉၶိူင်ႈၵွင်ႈၵၢင်ႇထႅမ်ဝႆႉသေ ႁူမ်ႈမိုဝ်းၵၼ်တင်း လၢႆလၢႆၸိုင်ႈမိူင်း- ဝႃႈၼႆ။