လုမ်းတြႃးၸေႈတွၼ်ႈ တူၼ်ႈတီး ပိုၼ်ၽၢဝ်ႇဝႃႈ  ၽူႈၶႃႈႁႅမ် ၸဝ်ႈၶွင် တိူၵ်ႈယႃႈယႃ မႃႉၽိူၵ်ႇ 2 တူဝ် လႄႈၵူၼ်းၸွႆႈတူၺ်းလုၵ်ႈဢွၼ်ႇၶဝ်ၼၼ်ႉပၢႆႈတၢင်းၽိတ်းဝႆႉလႄႈ တေႁႃတူဝ်ႁႂ်ႈႁၼ် တႃႇဢဝ်မႃး ၵူတ်ႇထတ်းပၼ်တူတ်ႈတၢမ်ႇဝႃႈၼႆ။

ပလိၵ်ႈပိုၼ်ၽၢဝ်ႇဝႃႈ  ၽူႈၶႃႈႁႅမ် ၵူၼ်း 4 ၵေႃႉတိူၵ်ႈယႃႈယႃမႃႉၽိူၵ်ႇ 2 တူဝ်ၼၼ်ႉ ၵိုတ်းထႅင်ႈ ၵေႃႉၼိုင်ႈ ။ ပဵၼ် ဢၢႆႈၸု ဢမ်ႇၼၼ် ပႃႉၸဵင်ႇ ယူႇဝၢၼ်ႈတွင်သီးလိၵ်ႉ ၸေႈဝဵင်းၵျွၵ်ႉမႄး။ ယၢမ်း လဵဝ်ပၢႆႈတၢင်းၽိတ်းဝႆႉ   ပၢႆႈၵႂႃႇႁဵတ်းၵၢၼ်မိူင်းႁိမ်းႁွမ်းၼႆလႄႈ  တေႁူမ်ႈမိုဝ်းၵၼ်တင်း ၸဝ်ႈၼႃႈတီႈၸိုင်ႈမိူင်း ၼၼ်ႉသေ တိၺွပ်းဢဝ်မႃးပၼ်တူတ်ႈတၢမ်ႇဝႃႈၼႆ။

တေႃႇဢိဢိထုၼ်း ၽူႈမီးၸၼ်ႉၾၢႆႇပွင်ႇၶၢဝ်ႇတီႈလုမ်း တြႃးၸေႈတွၼ်ႈတူၼ်ႈတီး လၢတ်ႈတီႈၼၵ်းၶၢဝ်ႇၵမ်ႇပေႃၸ တႅင်း ဝႃႈ- ဢူးတိၼ်ႇဢူင်း ၽူႈလူင်းမိုဝ်းၶႃႈႁႅမ်ၼၼ်ႉတႄႉ  လုတၢႆၵႂႃႇၼႂ်းၶွၵ်ႈ ယဝ်ႉၶႃႈၼႃႇ။ ဢၼ်ၵိုတ်း ထႅင်ႈၵေႃႉ ၼိုင်ႈၼႆႉပဵၼ်ဢၢႆႈၸု ၊ မၼ်းသမ်ႉဢမ်ႇမႃးၶိုၼ်ႈလုမ်းတြႃးၼင်ႇ ၸဝ်ႈၼႃႈတီႈႁွင်ႉဝႆႉၼၼ်ႉ သေဢမ်ႇၵႃး ၽိူဝ်ႇၵူၼ်းလူင်ဝၢၼ်ႈလႄႈ ၸဝ်ႈၼႃႈတီႈ  ၵႂႃႇတူၺ်းတီႈႁိူၼ်းမၼ်း မၼ်းသမ်ႉဢမ်ႇယူႇယဝ်ႉၼႆလႄႈ ၸင်ႇလႆႈတႅပ်းတတ်းမိူဝ်ႈဝၼ်းတီႈ 28 လိူၼ်ၵျူႊလၢႆႊပူၼ်ႉမႃးၼႆႉဝႃႈ ဢၢႆႈၸု ပၢႆႈတၢင်းၽိတ်း ၼႆသေ ယၢမ်းလဵဝ်တႄႉ တိုၵ်ႉႁွင်ႉၽူႈႁူႉႁၼ်လႄႈႁူႉၸၵ်း မႃးသေတွင်ႈထၢမ်ဝႆႉယူႇ။ –  ဝႃႈၼႆ။

ယၢမ်းလဵဝ်ၾၢႆႇပလိၵ်ႈ လႆႈတၢင်ႇဝႆႉဝႃႈ ၽူႈယိုၼ်ႈလိူင်ႈမီး 27 ၵေႃႉ။တေႃႇထိုင်ဝၼ်းတီႈ 21 လိူၼ်ဢေႃးၵတ်ႉသ်ၼႆႉ ထတ်းထၢမ်ယဝ်ႉတူဝ်ႈၵႂႃႇ 7 ၵေႃႉယဝ်ႉ ဝႃႈၼႆ။

မိူဝ်ႈၵၢင်ၶိုၼ်းဝၼ်းတီႈ 28 လိူၼ် ဢေႊပရိူဝ်ႊ ၼၼ်ႉ ၸၢႆးသိူဝ်မူၼ်း (27 ပီ) ၼၢင်းၶမ်းလႅင် (23 ပီ) လႄႈလုၵ်ႈၸၢႆးဢွၼ်ႇ ၸၢႆးၾႃႉၾႃႉ (7 လိူၼ်) ဢိၵ်ႇပႃးတင်းၵူၼ်းလဵင်ႉလုၵ်ႈဢွၼ်ႇၶဝ် ဢေးမူဝ်း (17 ပီ) တီႈတိူၵ်ႈယႃႈယႃ မႃႉၽိူၵ်ႇ 2 တူဝ်ၼၼ်ႉၺႃးၶႃႈတၢႆ။ ဝၼ်းတီႈ 29 ပလိၵ်ႈၸေႈဝဵင်း မိူဝ်းတိၺွပ်းလုင်းဢၢႆႈဢူင်း (ဢႃယု 60 ပီ) တီႈဝၢၼ်ႈ မိၼ်းၵုၼ်းၼိူဝ် ၸေႈဝဵင်းၵျွၵ်ႉမႄး။ ၽွင်းဢဝ်မႃးၵူတ်ႇထတ်းတီႈႁူင်းပလိၵ်ႈတီႈဝဵင်းတူၼ်ႈတီးၼၼ်ႉ မၼ်းၸၢႆးမဝ်းလူမ်ႉသေ လုတၢႆၵႂႃႇပႅတ်ႈၵမ်းလဵဝ်မိူဝ်ႈဝၼ်းတီႈ 4 လိူၼ်မေႊ။

ၾၢႆႇပလိၵ်ႈမိူင်းတႆး ၽူႈၵွၼ်းပလိၵ်ႈ ၸေႃႇၶိၼ်ႇဢွင်ႇတႄႉလၢတ်ႈဝႃႈ – တီႈဝဵင်းလူင်တူၼ်ႈတီးၼႆႉ ယၢမ်ႈမီးလွင်ႈ ၶႃႈႁႅမ် 4 ၵေႃႉၼိုင်ႈမူႇ မီး 2 ပွၵ်ႈ။ 2 ၵေႃႉၼိုင်ႈမူႇ 1 ပွၵ်ႈ ပဵၼ်သင်ၶ 2 တူၼ်။ ဢၼ်ၶႃႈ ႁႅမ် 4 ၵေႃႉ ၼႂ်းတပ်ႉတိူင်းသိုၵ်းၼၼ်ႉ ၽူႈလူင်းမိုဝ်းၶႃႈႁႅမ် ၶိုၼ်းၶႃႈတူဝ်တၢႆ။ ဢၼ်ၶႃႈႁႅမ် သင်ၶၸဝ်ႈ 2 တူၼ်ၼၼ်ႉၵေႃႈ တိၺွပ်းလႆႈယဝ်ႉသေ ပၼ်တူတ်ႈတၢမ်ႇၶမ်ၶွၵ်ႈ 40 ပီ လူၺ်ႈႁဵတ်းၵၢၼ်ယၢပ်ႇ- ဝႃႈၼႆ။