Myanmar PRO (Myanmar Performance Rights Organization) ၸုမ်းႁၵ်ႉသႃသုၼ်ႇလႆႈပၢႆးမွၼ်း မိူင်းမၢၼ်ႈ ပိုၼ်ၽၢဝ်ႇဝႃႈ ၸဝ်ႈၶွင်ၽဵင်းၵႂၢမ်းၼႆႉပဵၼ်ၽူႈတႅမ်ႈၵႂၢမ်း၊  ပေႃးဢမ်ႇလႆႈၶႂၢင်ႉ ဢၼုယၢတ်ႈတီႈၸဝ်ႈၶွင် တိုၼ်းတေဢမ်ႇလႆႈဢဝ်ၸႂ်ႉ ၼႂ်းၵၢၼ်ပၢႆးမၢၵ်ႈမီးလႂ်သေဢၼ် တေဢဝ်လိူင်ႈၼင်ႇပၵ်းပိူင်မၢႆမီႈမီးဝႆႉ ဝႃႈၼႆ။

ဢဝ်သဵင်တွႆႇတိုင်ႈၵူၺ်းၵေႃႈလီ၊ ၼိူဝ်ႉၽဵင်းၵႂၢမ်းၵေႃႈလီ၊ ဢဝ်တင်းႁူဝ်ၵေႃႈယဝ်ႉ ပေႃးဢမ်ႇလႆႈဢၼုယၢတ်ႈ တီႈၸုမ်း Myanmar PRO ၸိုင် တိုၼ်းတေဢမ်ႇလႆႈဢဝ်ႁွင်ႉ  ၼိူဝ်ၶဵင်ႇပၢင်မူၼ်ႈသိူဝ်း ၊ ဢမ်ႇလႆႈဢဝ် ပွႆႇသဵင်၊ ပွႆႇငဝ်းႁၢင်ႈသဵင်၊ ဢမ်ႇလႆႈဢဝ်သိုဝ်ႉၶၢႆၵၼ်ၼိူဝ် Online ၊ ဢမ်ႇလႆႈဢဝ်ၸႂ်ႉတီႈသဵင်ႁွင်ႉၾူၼ်း Ring Tunes ၊ Ring Tone ၊ တေဢမ်ႇလႆႈၶၢႆပၼ်ၵၼ်ႁွင်ႉၶႃႊလႃႊဢူဝ်ႊၶေႊၼႂ်းလၢၼ်ႉ၊ တေဢမ်ႇ လႆႈ ဢဝ်ႁွင်ႉၼိူဝ်ၶဵင်ႇၸၢတ်ႈသႅင်း (ပၢင်ပျေႃႇမူၼ်ႈ၊ ပၢင်ႁႃငိုၼ်းၵွင်ၵၢင်)။ ပေႃးဝႃႈတေၶႂ်ႈႁွင်ႉ ၊ၶႂ်ႈၸႂ်ႉ ၽဵင်းၵႂၢမ်း ဢၼ်လႂ်ၵေႃႈယဝ်ႉ တေလႆႈယွၼ်းၶႂၢင်ႉ ဢၼုယၢတ်ႈတီႈၸုမ်း Myanmar PRO  ၵွၼ်ႇ။ သင်ဝႃႈဢမ်ႇယွၼ်းၶႂၢင်ႉသေ ဢဝ်ႁွင်ႉ ဢဝ်ၸႂ်ႉၸိုင် တေထုၵ်ႇ ဢဝ်လိူင်ႈ ၸွမ်းလူၺ်ႈပၵ်းပိူင်မၢႆမီႈ ဝၢၼ်ႈမိူင်းမီးဝႆႉၼၼ်ႉ – ၼႆ  ၸုမ်း Myanmar PRO ပိုၼ်ၽၢဝ်ႇဝႆႉၼႂ်း ၽိုၼ်ၶၢဝ်ႇလူင်ပွင်ၸိုင်ႈ (မျၢၼ်ႇမႃႉဢလိၼ်း)  ၸဵမ်မိူဝ်ႈ လိူၼ်မၢတ်ႉ ဝၼ်းတီႈ 25 ပီ 2019 ၼႆႉ။

“မၢႆမီႈ Copy Rights လွင်ႈၽဵင်းၵႂၢမ်းၼႆႉ မီးဝႆႉၸဵမ်မိူဝ်ႈပၢၼ်လူင်ပွင်ၸိုင်ႈ ဢိင်းၵလဵတ်ႈၽွင်းငမ်းမိူင်း မၢၼ်ႈပုၼ်ႉသေတႃႉၵေႃႈ  ၵူၼ်းမိူင်း ပႃးၸဵမ်လူင်ပွင်ၸိုင်ႈ ဝႆႉမဝ်မၢင်လႄႈ ဢမ်ႇပဵၼ်ၸႂ်ႉတိုဝ်း။ ၵွပ်ႈၼၼ်ႈၽဵင်းၵႂၢမ်းၵေႃႈ ၽႂ်ၶႂ်ႈဢဝ်ၸႂ်ႉတီႈလႂ်ၵေႃႈၸႂ်ႉၵၼ်ယူႇ။ ပေႃးၸႂ်ႉတိုဝ်းမၢႆမီႈလႄႈပိူင်ၼႆႉၵႂႃႇၸိုင် တၵ်းတေပဵၼ်ပၵ်းပဵၼ်ပိူင်မႃးယူႇ – မျိၼ်ႉမူဝ်းဢွင်ႇ ၽူႈတႅမ်ႈၵႂၢမ်း ၊ ဢၼ်ပဵၼ်ၵႅမ်ႁူဝ်ပဝ်ႈၸုမ်း Myanmar PRO ၼၼ်ႉလၢတ်ႈ”  ၼႆ ၸုမ်းၶၢဝ်ႇဢေႊရႃႊဝတီႊ ဢွၵ်ႇၶၢဝ်ႇဝႆႉၼင်ႇၼႆ။

မၢႆမီႈ Copy Rights ၽဵင်းၵႂၢမ်းၼၼ်ႉတႄႉ မီးဝႆႉဝႃႈ – သင်ဝႃႈဢမ်ႇလႆႈၶႂၢင်ႉ ဢၼုယၢတ်ႈတီႈ ၽူႈတႅမ်ႈၵႂၢမ်းသေ ဢဝ်ၵႂႃႇၸႂ်ႉတႃႇပၢႆးမၢၵ်ႈမီးၸိုင်  ၽူႈထုၵ်ႇပူၼ်ႉပႅၼ်သုၼ်ႇလႆႈ (ၸဝ်ႈၶွင်ၽဵင်းၵႂၢမ်း)  ယွၼ်းၵႃႈသၢႆႈတႅၼ်းၵႃႈႁိုဝ်ၵေႃႈ တၵ်းလႆႈပၼ်– ဝႃႈၼႆ။

မိူဝ်ႈၵွၼ်ႇ ဢၼ်ႁွင်ႉၽဵင်းၵႂၢမ်းၸွမ်းပွႆးလၢမ်း၊ၸၢတ်ႈသႅင်း၊ လၢၼ်ႉၶႃႊလႃႊဢူဝ်ႊၶေႊ ၊ လၢၼ်ႉၶဝ်ႈၽၵ်း (တၢင်းၵိၼ်) ဢၼ်မီးပႃးၶဵင်ႇႁွင်ႉၵႂၢမ်း ၸိူဝ်းၼၼ်ႉ ၵူၼ်းႁွင်ႉၵႂၢမ်းလႄႈ ၸုမ်းတွႆႇတိုင်ႈၵူၺ်း လႆႈႁပ်ႉၼမ်ႉတွၼ်း၊ လႆႈငိုၼ်းတွင်း။ ၽူႈတႅမ်ႈၽဵင်းၵႂၢမ်းၼႆႉဢမ်ႇမီးသုၼ်ႇလႆႈသုၼ်ႇလီသင်ၸွမ်းလႄႈ  ဝၢႆးလင် ၸုမ်း  Myanmar PRO ဢွၵ်ႇၶေႃႈပိုၼ် ၽၢဝ်ႇတေဢဝ်လိူင်ႈ ၼႆႉယဝ်ႉ ၸိုင် ၽူႈတႅင်ႇတႅမ်ႈၽဵင်း ဢမ်ႇလႆႈငိုၼ်းတွင်းၵမ်းလဵဝ်သေတႃႉ ယုမ်ႇယမ်ဝႃႈ ၸၢင်ႈတေပဵၼ်ဢၼ်ယုၵ်ႉမုၼ်းၵႃႈၶၼ် ၽူႈတႅင်ႇတႅမ်ႈၽဵင်းၵႂၢမ်းယူႇ- ၸုမ်းၸဝ်ႈပၢႆးမွၼ်း မိူင်းမၢၼ်ႈ ၵေႃႈထတ်းသၢင်ၼင်ႇၼႆ။

မိူဝ်ႈပီ 2018 လိူၼ်ဢေႃးၵၢတ်ႉသ် ၼၼ်ႉ မေႃႁွင်ႉၵႂၢမ်းတႆးပၢၼ်မႂ်ႇ ၸၢႆးတိုၼ်းလီ လႆႈဢဝ်ၵႂၢမ်း ၸၢႆးၶမ်းလဵၵ်း ဢၼ်မီးၸိုဝ်ႈဝႃႈ “ၶိုၼ်းလႆႈၵိူတ်ႇမႃးပုၼ်ႈတၢင်းႁၵ်ႉ” ၼၼ်ႉႁွင်ႉၼႂ်း App Samule သေ တၢင်ႇၼိူဝ် ယူႊထုပ်ႉ ။ ယင်းလႆႈပဵၼ်ပၼ်ႁႃၵၼ်တင်း  Dr.ၼွႆႉၼွႆႉတိၼ်ႇ (မေးၼၢင်း Dr.ၸၢႆးၶမ်းလဵၵ်း)  ။ မိူဝ်ႈၼၼ်ႉ Dr.ၼွႆႉၼွႆႉတိၼ်ႇ လၢတ်ႈဝႃႈ   မၼ်းၸၢႆးဢမ်ႇယွၼ်းဢၼုယၢတ်ႈ  သေ ဢဝ်ႁွင်ႉ  လႄႈ ပေႃးဢမ်ႇယွၼ်းၼွမ်း ပိုၼ်ၽၢဝ်ႇၼႂ်း ၽိုၼ်ၶၢဝ်ႇ မျၢၼ်ႇမႃႉ ဢလိၼ်းပဵၼ်တၢင်းၵၢၼ်ၸိုင်  တေထုၵ်ႇၸုမ်း  Myanmar PRO ၸႅင်ႈၵႂၢမ်းဢဝ် လိူင်ႈမၼ်းၸၢႆး ၼႆလူးၵွၼ်ႇ။

ၸုမ်း Myanmar PRO ၼႆႉ  ၽူႈတႅမ်ႈၽဵင်းၵႂၢမ်း  ၸိုဝ်ႈသဵင်လင်မိူၼ်ၼင်ႇ ၸေႃးၶူႇသႄး၊ သဝႃႇ၊ ၸၢႆးၶမ်းလဵၵ်း၊ သတူင်း၊ KAT၊ မိၼ်းၶျိတ်ႉတူႇ – ဢိၵ်ႇပႃးတင်းၽူႈတႅမ်ႈၽဵင်းၵႂၢမ်း  30 ၵေႃႉ ႁူမ်ႈၵၼ် ၶွတ်ႇၽွတ်ႈဝႆႉ မိူဝ်ႈပီ 2014။ Dr.ၸၢႆးၶမ်းလဵၵ်း ပဵၼ်ၼႃႇယၵ ၊ ၽူႈတႅမ်ႈၽဵင်း သုၶမိင်ႇလႅင်ႇ ပဵၼ်ႁူဝ်ပဝ်ႈ ဝႆႉ ဝႃႈၼႆ။

ဢၢင်ႈဢိင်ၶၢဝ်ႇတီႈ   Irrawaddy news