ပီႈၼွင်ႉၵူၼ်းမိူင်းလႃႈသဵဝ်ႈ ႁူမ်ႈၵၼ်ပႆတၢင်းၼေၵၢင်ၸႂ် သၢၼ်ၶတ်း လွင်ႈၵၼ်ႉၸၼ်လူလၢႆလုၵ်ႈဢွၼ်ႇ

ပီႈၼွင်ႉၵူၼ်းမိူင်းလႃႈသဵဝ်ႈ ဢဵၼ်ႁႅင်းမွၵ်ႈ 600 ပၢႆ ပႆတၢင်းၼေၵၢင်ၸႂ် သၢၼ်ၶတ်းလွင်ႈၵၼ်ႉၸၼ်လုၵ်ႈဢွၼ်ႇလဵၵ်ႉ၊ တုၵ်းယွၼ်းႁႂ်ႈလိူင်ႈ (ၶၻီး)ၼွင်ႉဢွၼ်ႇ ဝိၵ်ႉထူဝ်ႊရီႊယႃႊလႆႈလွင်ႈၽဵင်ႇပဵင်း ။

ဝၼ်းတီႈ 14/7/2019 ပီႈၼွင်ႉၵူၼ်းမိူင်းလႃႈသဵဝ်ႈ 600 ပၢႆ လုၵ်ႈဢွၼ်ႇလႄႈၼၢင်းယိင်းၵမ်ႈၼမ် သႂ်ႇသိူဝ်ႈသီၶၢဝ်မိူၼ်ၵၼ် ဢၼ်တႅမ်ႈဝႆႉဝႃႈ Justice for Victoria  ၼႆၼၼ်ႉသေ၊  ယိပ်းပၢႆႉဢၼ် တႅမ်ႈဝႆႉဝႃႈ – လိူင်ႈ (ၶၻီး)ၼွင်ႉဢွၼ်ႇ ဝိၵ်ႉထူဝ်ႊရီႊယႃႊၼၼ်ႉ ႁႂ်ႈၸဵဝ်းၵူတ်ႇထတ်းတိၺွပ်း ပၼ်တူတ်ႈ တၢမ်ႇၵူၼ်းႁဵတ်းၽိတ်း၊ ႁႂ်ႈၼွင်ႉ Victoria ၼၼ်ႉ လႆႈလွင်ႈၽဵင်ႇပဵင်း Justice for Victoria ၊  ႁႂ်ႈၸွႆႈ သၢင်ႈပၼ် ယႃႈႁႂ်ႈမီးလွင်ႈၵၼ်ႉၸၼ်လုၵ်ႈဢွၼ်ႇလဵၵ်ႉ၊ ၸဵမ်ၸိူဝ်းၼႆႉသေ ဢွၼ်ၵၼ်ပႆတၢင်း လုၵ်ႉဢဝ်တီႈ ဝတ်ႉၵျွင်းပေႃးၻႃႇယူင်ႇ ပွၵ်ႉသီႇ ပႆတၢင်းတေႃႇထိုင် ႁူဝ်တၢင်းပိဝ်ႇႁႃႇ ပွၵ်ႉၼိုင်ႈ ဝဵင်းလႃႈသဵဝ်ႈ တၢင်းၵႆမွၵ်ႈ 1 လၵ်း။

မထူၺ်းထူၺ်း ၽူႈဢွၼ်ႁူဝ်တူင်ႉၼိုင်တႃႇၼေၵၢင်ၸႂ်လၢတ်ႈဝႃႈ- “ပိူင်လူင်တႄႉ ႁဝ်းၶႃႈမီးယိူင်း ဢၢၼ်း ဝႃႈ ယႃႇႁႂ်ႈမီးၼွင်ႉဝိၵ်ႉထူဝ်ႊရီႊယႃႊ ၵေႃႉထိသွင် ထိသၢမ်ထႅင်ႈ။ ပိူင်ပဵၼ်ၸိူင်ႉၼႆၼႆႉ  ၶႂ်ႈႁႂ်ႈမီး တူတ်ႈတၢမ်ႇဢၼ်ၼၵ်းၼႃႁၢဝ်ႈႁႅင်း ဢမ်ႇၼၼ် ႁႂ်ႈပဵၼ်တူတ်ႈတၢမ်ႇတၢႆ ” – ဝႃႈၼႆ။

လွင်ႈၵၼ်ႉၸၼ်လူလၢႆလုၵ်ႈဢွၼ်ႇ ဢႃယုယင်းပႆႇတဵမ် 18 ၼႆႉ တီႈမိူင်းမၢၼ်ႈၼႆႉ မီးၼမ်မႃးၵူႈမိုဝ်ႉၵူႈဝၼ်း။

ပေႃးမႃးတူၺ်းၶိုၼ်း ဢမု (ၶၻီး) ၵၼ်ႉၸၼ်လုၵ်ႈဢွၼ်ႇၼႂ်းပီ 2017 တေႃႇထိုင် ပီ 2019 လိူၼ်ၵျုၼ်ႊ ၼႆႉ ၼႆၸိုင် မိူဝ်ႈပီ 2017 ၼၼ်ႉ မီးလွင်ႈၵၼ်ႉၸၼ်လုၵ်ႈဢွၼ်ႇ 63.84% ၼႂ်းပီ 2018 သမ်ႉ လွင်ႈၵၼ်ႉၸၼ်လုၵ်ႈဢွၼ်ႇမီး 64.93% လႄႈ ၼႂ်းပီ 2019 တိုၵ်ႉမီးၶၢဝ်းတၢင်း 6 လိူၼ်ၵူၺ်း သမ်ႉပေႃးမီးယူႇ 67.98% ယဝ်ႉလႆႈႁူႉၸွမ်းသဵၼ်ႈမၢႆ ပလိၵ်ႈၸွပ်ႇလွင်ႈၵေႃႇၵၢၼ်ႁၢႆႉပိုၼ်ၽၢဝ်ႇ ဝႆႉၼင်ႇၼႆ။

ၼွင်ႉဝိၵ်ႉထူဝ်ႊရီႊယႃႊ Victoria ၼႆႉ ဢႃယုမီး 3 ၶူပ်ႇ။ ယူႇႁူင်းႁဵၼ်းၸၼ်ႉဢွၼ်( မူႇၵဵဝ်ႇ) Wisdom Hill တီႈၼေႇပီႇတေႃႇ။ မိူဝ်ႈလိူၼ်မေႊ ဝၼ်းတီႈ 16 ပူၼ်ႉမႃး မႄႈလုၵ်ႈဢွၼ်ႇ ႁၼ်လိူတ်ႈ တီႈၵူၼ်လုၵ်ႈဢွၼ်ႇလႄႈ ၵႂႃႇၸူးႁူင်းယႃ ။ လႆႈႁူႉဝႃႈလုၵ်ႈဢွၼ်ႇၸဝ်ႈၵဝ်ႇၺႃးၵၼ်ႉၸၼ်။ ၵူၺ်းၵႃႈတီႈႁူင်းႁဵၼ်းဢမ်ႇယွမ်းႁပ်ႉပုၼ်ႈၽွၼ်းလွင်ႈၼႆႉသေဢမ်ႇၵႃး ၾၢႆႇပလိၵ်ႈ CID ၵေႃႈ ဢမ်ႇႁိပ်ႈၼႅတ်ႈ ၶူၼ်ႉႁႃၵူၼ်းၽိတ်းဢဝ်မႃးပၼ်တူတ်ႈတၢမ်ႇလႆႈ ထိုင်ယၢမ်းလဵဝ်ႁိုင်မႃး 2 လိူၼ်ပၢႆ။ လိူဝ်ၼၼ်ႉ ယင်းပၢႆတိၺွပ်းပႃး ၵူၼ်းၸိူဝ်းဢၼ်တူင်ႉၼိုင် ၸွႆႈထႅမ်တႃႇႁႂ်ႈဢမု (ၶၻီႊ)ၼႆႉ ၸဵဝ်းလႆႈပၼ်တူတ်ႈတၢမ်ႇၵေႃႉၽိတ်းဝႆးဝႆးၼၼ်ႉ လၢႆလၢႆၵေႃႉလူးၵွၼ်ႇ။

ၵဵဝ်ႇၵပ်းလွင်ႈပၼ်ႁႃၼႆႉသေ ပလိၵ်ႈတိဝႆႉ ဢွင်ႇၵျီး ဢႃယု 30 ပီ ၵူၼ်းႁေႃႈၵႃး ၽူႈၵုမ်းႁူင်းႁဵၼ်း ။ ဝႃႈပဵၼ်ၵေႃႉဢၼ်လီထၢင်ႇထိူမ် ၵၼ်ႉၸၼ်လုၵ်ႈဢွၼ်ႇဝႃႈၼႆ။ ပလိၵ်ႈတေဢဝ်တူဝ်မၼ်းဢွၵ်ႇမႃးထဵတ်ႈထၢမ်တီႈလုမ်းတြႃးပဵၼ်ပွၵ်ႈၵမ်းႁႅၵ်ႈ ၼႂ်းဝၼ်းမိူဝ်ႈၼႆႉ 15/7/2019 ဝႃႈၼႆ။

မိူင်းႁူမ်ႈတုမ်မၢၼ်ႈၼႆႉ တွၼ်ႈတႃႇၵေႃႉပူၼ်ႉပႅၼ်ၵၼ်ႉၸၼ်လုၵ်ႈဢွၼ်ႇၼႆႉ တူတ်ႈတၢမ်ႇသုင်သုတ်း ပဵၼ် တူတ်ႈၶွၵ်ႈဢမ်ႇပူၼ်ႉ 20 ပီ  ။