မိူဝ်ႈဝၼ်းတီႈ 4/7/2019 တပ်ႉပလိၵ်ႈၾၢႆႇၵူတ်ႇထတ်းလွင်ႈၵေႃႇၵၢၼ်ႁၢႆႉ တိၺွပ်းၵူၼ်းႁေႃႈလူတ်ႉ ၽူႈၵွၼ်းႁူင်းႁဵၼ်း ၸၼ်ႉဢွၼ် (မူကြို) Winsdom Hill တီႈၼေႇပျီႇတေႃႇ။ ဢဝ်လိူင်ႈ တၢင်ႇလုမ်းတြႃး ပိုတ်ႇဢမု ဝႆႉဝႃႈ ၵူၼ်းႁေႃႈလူတ်ႉပဵၼ်ၽူႈဢၼ်လီထၢင်ႇထိူမ် ၼႂ်းပၼ်ႁႃ လုၵ်ႈဢွၼ်ႇ 3 ၶူပ်ႇ တီႈႁူင်းႁဵၼ်းၺႃးၵၼ်ႉၸၼ် ၼၼ်ႉဝႃႈၼႆ။
ဢၼ်ပလိၵ်ႈၶဝ်တိၺွပ်းဢဝ်လိူင်ႈၼႆႉပဵၼ် ဢွင်ႇၵျေႃႇမဵဝ်း (ဢွင်ႇၵျီး) ဢႃယု 30 ပီ ပဵၼ်ၽူႈၶပ်း လူတ်ႉ ၵႃး မေႃသွၼ် တေႃႇဢူင်ႇမႃႇလႅင်ႇ ၽူႈၵွၼ်းႁူင်းႁဵၼ်း Winsdom Hill ၼေႇပီႇတေႃႇ။
ယူႇတီႈ ၵႅမ်ၽူႈၵွၼ်းပလိၵ်ႈ ဢွင်ႇၼၢႆႇတူႇ ၸုမ်းပလိၵ်ႈ ၵူတ်ႇထတ်းလွင်ႈၵေႃႇၵၢၼ်ႁၢႆႉ CID သပ်းၸႅင်ႈ ၶၢဝ်ႇ တီႈၼေႇပျီႇတေႃႇ ဝၼ်းတီႈ 5 လိူၼ်ၵျူႊလၢႆႇ ဝၼ်းမိူဝ်ႈၼႆႉ ဝႃႈ – “ဢွင်ႇၵျီး ၵူၼ်းၶပ်းလူတ်ႉ ၼႆႉယွမ်းႁပ်ႉဝႃႈမၼ်းပဵၼ်ၵူၼ်းႁဵတ်း။ လုၵ်ႈဢွၼ်ႇၵေႃႈ ဝႃႈ ပဵၼ် ဢွင်ႇၵျီးႁဵတ်း ၼႆလႄႈ ဝၼ်းတီႈ 15 လိူၼ်ၵျူႊလၢႆႊၼႆႈ တေဢဝ် ဢွင်ႇၵျီးၶိုၼ်ႈလုမ်းတြႃး ၵူတ်ႇထတ်းထဵတ်ႈထၢမ် ပဵၼ် ပွၵ်ႈၵမ်း ႁႅၵ်ႈ ” – ဝႃႈၼႆ။
လုၵ်ႈဢွၼ်ႇယိင်း ၸိုဝ်ႈလဵၼ်ႈ ၼွင်ႉဝိၵ်ႇထူဝ်းရီးယႃး ဢႃယု 3 ၶူပ်ႇ ပဵၼ်လုၵ်ႈႁဵၼ်းတီႈႁူင်းႁဵၼ်း ၸၼ်ႉဢွၼ် မူကြို Wisdom Hill တီႈၼေႇပျီႇတေႃႇ မိူဝ်ႈဝၼ်းတီႈ 16/6/2019 ယၢမ်းဝၢႆးဝၼ်း ၽွင်းပွၵ်ႈႁူင်းႁဵၼ်းမႃး ၵေႃႉပဵၼ်မႄႈ ႁၼ်ၺႃးမႅၼ်ႈ လိူတ်ႈဢွၵ်ႇၸွမ်းၵူၼ်ႈ ၸွမ်းတူဝ်သေ ၼႅတ်ႈဢဝ် ၵႂႃႇႁူင်းယႃတီႈၼေႇပျီႇတေႃႇ။ မေႃယႃဝႃႈ ပဵၼ်ၾၢင်ႁၢင်ႈၺႃးၵၼ်ႉၸၼ် ဝႃႈၼႆ။
ၸွမ်းၼင်ႇၶေႃႈမၢတ်ႈမၢႆ ပလိၵ်ႈလႄႈ ၽူႈမီးပုၼ်ႈၽွၼ်းၵူတ်ႇထတ်းတူၺ်း ၼႂ်းၵွင်ႈထၢႆႇ CCTV ဢိၵ်ႇလၢႆလၢႆလွၵ်းလၢႆး ၼႂ်းၶၢဝ်းတၢင်း လိူၼ်ပၢႆၼႆႉ လၢႆၾၢႆႇလၢႆၸုမ်း ၸိူဝ်းပၵ်းတႃလွင်ႈၼႆႉ လၢတ်ႈဝႃႈ လႅပ်ႈပဵၼ် ၼမ်ႉမိုဝ်းလုၵ်ႈၸၢႆးၸဝ်ႈၶွင်ႁူင်းႁဵၼ်း သွင်ၵေႃႉပီႈၼွင်ႉ။ ဢႃယု 18 ၵေႃႈၼိုင်ႈလႄႈ ဢႃယု 15 ၵေႃႈၼိုင်ႈ ၼႆသေတႃႉ ထိုင်တီႈပလိၵ်ႈၾၢႆႇၵူတ်ႇထတ်းလွင်ႈၵေႃႇၵၢၼ်ႁၢႆႉ လူင်းႁဵတ်းၵၢၼ် ၵူတ်ႇ ထတ်း ၶၢဝ်းတၢင်းလိူၼ်ပၢႆ သမ်ႉၸိၼႄးဝႃႈ ဝၼ်းၼၼ်ႉ ဢွင်ႇၵျီး ၶဝ်ႈမႃးၼင်ႈၼႂ်းႁူင်းႁဵၼ်း မွၵ်ႈၶိုင်ႈၸူဝ်ႈမူင်း၊ ဢၼ်ၵၼ်ႉၸၼ်လုၵ်ႈဢွၼ်ႇၼႆႉပဵၼ် ဢွင်ႇၵျီးၵူၺ်းၼႆသေ တိၺွပ်း။
ၾၢႆႇပေႃႈမႄႈလုၵ်ႈဢွၼ်ႇယိင်းလၢတ်ႈဝႃႈ – “ၼွင်ႈဝိၵ်ႉထူဝ်ႊရီႊယႃႊ လၢတ်ႈဝႃႈ ပဵၼ် ပီႈပီႈ သွင်ၵေႃႉႁဵတ်း။ မေႃသွၼ်ၼိၼ်းၼု ၵေႃႈႁူႉၸွမ်း ။ မေႃသွၼ်ၼိၼ်းၼု လႃႇပီႈပီႈ သွင်ၵေႃႉ ၼႆသေတႃႉ လႆႈလိူၼ်ပၢႆယဝ်ႉ တေႃႇထိုင်ဝၼ်းမိူဝ်ႈၼႆႉ ယင်းပႆႇတိလႆႈၵေႃႉႁဵတ်းၽိတ်း။” – ဝႃႈၼႆ။
ၵဵဝ်ႇၵပ်းလွင်ႈဢမု ၶတီႊလိူင်ႈၼႆႉသေ ၵူၼ်းမိူင်းမၢၼ်ႈ ၽူႈဢၢၼ်ႇၶၢဝ်ႇ ၽူႈပၵ်းတႃလွင်ႈၼႆႉဢိၵ်ႇပႃး ၸုမ်းၸိူဝ်းၸၢႆးၸိူင်း ၼၢင်းၸိူင်း ဢိၵ်ႇ ၸဝ်ႈပၢႆးမွၼ်းၶဝ် ဢမ်ႇပဵင်းပေႃးၸႂ်။ ပႃးၸဵမ်ၸွမ်ၸိုင်ႈတူၵ်ႇတၵ်ႉ ပလိၵ်ႈ CID လႄႈ ၾၢႆႇတတ်းသိၼ်တြႃး ဝႃႈ ႁႂ်ႈၵူတ်ႇထတ်းပၼ်လီလီ ႁႂ်ႈမီးလွင်ႈၽဵင်ႇပဵင်း၊ ႁႂ်ႈၸဵဝ်းႁႃႁၼ်ပၼ်တူတ်ႈတၢမ်ႇၵူၼ်းႁဵတ်းၽိတ်း ပူၼ်ႉပႅၼ်သုၼ်ႇလႆႈၵူၼ်းလႄႈသုၼ်ႇလႆႈလုၵ်ႈဢွၼ်ႇ ၼၼ်ႉဝႆးဝႆး ဝႃႈၼႆ။
ၵူၺ်းၵႃႈ ပၵ်းပိူင်မၢႆမီႈ ၵဵဝ်ႇၵပ်းလွင်ႈ ၵၼ်ႉၸၼ်လူလၢႆလုၵ်ႈဢွၼ်ႇဢႃယု 18 လူင်းတႂ်ႈၼႆႉ မီးဝႆႉဝႃႈ ၽူႈပူၼ်ႉပႅၼ်တၵ်းလႆႈၺႃးတူတ်ႈၶွၵ်ႈ 20 ပီ ဝႃၼႆဝႆႉ။ ၸွမ်းၼင်ႇၵူၼ်းမိူင်းတုၵ်းယွၼ်းဝႃႈ ႁႂ်ႈမီးမၢႆမီႈ ပၼ်တူတ်ႈတၢမ်ႇၽူႈပူၼ်ႉပႅၼ်ၵၼ်ႉၸၼ်ၼႆႉ ႁႂ်ႈလႆႈၺႃးတၢမ်ႇတၢႆ ဝႃႈၼႆသေတႃႉ ၾၢႆႇတၢင်းသၽႃး ၵဵပ်းၵၢင်ၸႂ် ၶႅပ်းမႄး ၊ ၾၢႆႇတပ်ႉသိုၵ်း ဢမ်ႇၽွမ်ႉၸွမ်း ဢမ်ႇႁၼ်လီလႄႈ ဢမ်ႇၸၢင်ႈမၵ်းမၼ်ႈပၼ်။ ၵူၺ်းၵႃႈ လိုၼ်းသုတ်း တႅပ်းတတ်းႁဵတ်းဢွၵ်ႇမၢႆမီႈမႃးဝႃႈ ၽူႈၵၼ်ႉၸၼ်လုၵ်ႈဢွၼ်ႇ ၊ တေလႆႈတူၵ်းၶွၵ်ႈတေႃႇၸူဝ်ႈသုတ်းပၢၼ်၊ တေႃထိုင်ပေႃးတၢႆ – ဝႃႈၼႆ။
