ပလိၵ်ႈၸေႈမိူင်း မိူင်းတႆးပိုၼ်ၽၢဝ်ႇဝႃႈ တိလႆႈၵူၼ်းႁၢႆႉ ဢၼ်ၶႃႈႁႅမ် ၵူၼ်း 4 ၵေႃႉ ၼၼ်ႉယဝ်ႉဝႃႈၼႆ။
ပလိၵ်ႈမိူင်းတႆးလၢတ်ႈဝႃႈ ၸွမ်းၼင်ႇၵူၼ်းမိူင်းသူင်ႇၶၢဝ်ႇပၼ်သေ ၸဝ်ႈၼႃႈတီႈပလိၵ်ႈ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူတ်ႇထတ်း ၵုမ်းၶင် လုင်းတိၼ်ႇဢူင်း (ႁိုဝ်) ဢၢႆႈဢူင်း ဢႃယု 60 ပီ ၽူႈဢၼ်လီထၢင်ႇထိူမ် ၼႂ်းၵၢၼ်ၶႃႈႁႅမ် ၵူၼ်း 4 ၵေႃႉ ။ ၸဝ်ႈၼႃႈတီႈပိုၼ်ၽၢဝ်ႇဝႃႈ တိၺွပ်းလုင်းတိၼ်ႇဢူင်း တီႈႁိူၼ်းမၼ်းၸၢႆး တီႈဝၢၼ်ႈဢထႅတ်ႉမိၼ်းၵႂိၼ်း ၸေႈဝဵင်းၵျွၵ်ႉမႄး မိူဝ်ႈဝၼ်းတီႈ 29 ယၢမ်းၵၢင်ၼႂ် 7 မူင်း ဝႃႈၼႆ။
ၸုမ်းၶၢဝ်ႇတၢၼ်ႇလုၼ်ႇတူၺ်းၶျိၼ်း ပိုၼ်ၽၢဝ်ႇဝႃႈ ယၢမ်းလဵဝ် လႆႈၵူတ်ႇထတ်းထဵတ်ႈထၢမ်ယဝ်ႉလီငၢမ်းသေ လႆႈႁူႉဝႃႈ မၼ်းၸၢႆးပဵၼ် ၽူႈၽႅၼ်ၵၢၼ် ဢွၼ်ဢဝ်ၸုမ်းၵူၼ်းႁၢႆႉ ၶဝ်ႈႁိူၼ်း၊ ၶႃႈႁႅမ် ၸၢႆးသိူဝ်မူၼ်း ၊ၼၢင်းၶမ်းလႅင် လႄႈလုၵ်ႈၸၢႆး ၾႃႉၾႃႉ ဢိၵ်ႇ ပီႈလဵင်ႉလုၵ်ႈဢွၼ်ႇ ၸိုဝ်ႈ ဢေးမူဝ်း ၶဝ် 4 ၵေႃႉ မိူဝ်ႈဝၼ်းတီႈ 28 /4/2019 ယၢမ်းၵၢင်ၶိုၼ်းၼၼ်ႉဝႃႈၼႆ။
ၸွမ်းၼင်ႇ ပလိၵ်ႈၵူတ်ႇထတ်းထဵတ်ႈထၢမ်သေ လႆႈႁူႉဝႃႈ – လုင်းတိၼ်ႇဢူင်း (ဢၢႆႈဢူင်း)ၼႆႉ ပဵၼ်လုၵ်ႈပီႈလုၵ်ႈၼွင်ႉၵၼ်တင်း ပႃႈဢေးသူၺ်ႇ ၸဝ်ႈၶွင်ႁူင်းယႃႈယႃ မႃႉၶၢဝ် 2 တူဝ်။ ပႃႇဢေးသူၺ်ႇၶႃပူႇဢွၵ်ႇၼႆႉ ဢမ်ႇမီးလုၵ်ႈလၢင်းလႄႈ ၸင်ႇလႆႈၵဵပ်းလဵင်ႉ ၸၢႆးဝုၼ်းမွင်ႇ ၵေႃႉပဵၼ်လုၵ်ႈၸၢႆးလုင်းတိၼ်ႇဢူင်း ။ ဝၢႆးၸၢႆးဝုၼ်းမွင်ႇ တႄႇၼႃႈႁိူၼ်းသေ ၽႄၵႂႃႇယူႇႁိူၼ်းၵူၺ်းယဝ်ႉ ပႃႈဢေးသူၺ်ႇသမ်ႉ ၵဵပ်းလဵင်ႉ ၼၢင်းၶမ်းလႅင် ၼႆႉထႅင်ႈ။ ၼၢင်းၶမ်းလႅင် တႄႇၼႃႈႁိူၼ်း မီးလုၵ်ႈလၢင်းယဝ်ႉ ပႃႈဢေးသူၺ်ႇ ပၼ်ယိပ်းပႃးၵၢၼ်ငၢၼ်းလႄႈ လုင်းတိၼ်ႇဢူင်း ၵူဝ်လုၵ်ႈၸၢႆးမၼ်းဢမ်ႇလႆႈၶူဝ်းပူၺ်ႈ (ဢမူၺ်ႇ) ၼမ်။ ၸင်ႇလႆႈႁူမ်ႈၵၼ်တင်းၸုမ်းၵူၼ်းႁၢႆႉ သေ ၽႅၼ်ၵၢၼ် ၶဝ်ႈၸူၼ်ႁိမ်ၶူဝ်းၶွင်တီႈႁိူၼ်းပီႈၼၢင်းၶႅၼ်ႈတွင်ႉမၼ်း ပႃႈဢေးသူၺ်ႇ။ ထိုင်တီႈလႆႈၶႃႈႁႅမ်လုၵ်ႈလၢၼ်တၢႆ- ပိုၼ်ၽၢဝ်ႇဝႆႉၼင်ႇၼႆ။
ၵူၺ်းၵႃႈ ဝၼ်းၶႃႈႁႅမ်ၵၼ်ၼၼ်ႉ ပႃႈသူၺ်ႇဢေး ၵႂႃႇပၢင်လူင်လႄႈ ဢမ်ႇၺႃးၶႃႈႁႅမ်ပႃး – ဝႃႈၼႆ။
ပလိၵ်ႈတူၼ်ႈတီး ယင်းလႆႈပိုၼ်ၽၢဝ်ႇဝႆႉပႃးဝႃႈ – လုင်းတိၼ်ႇဢူင်း ႁပ်ႉပၢၵ်ႇဝႃႈပဵၼ်ၵူၼ်းလူင်းမိုဝ်း ၶႃႈႁႅမ်သေဢမ်ႇၵႃး မိူဝ်ႈဝၼ်းတီႈ 1/5/2019 ပလိၵ်ႈသိုပ်ႇၶူၼ်ႉသွၵ်ႈတီႈႁိူၼ်းမၼ်းၸၢႆးထႅင်ႈ လႆႈပႃးၶူဝ်းၶွင်ငိုၼ်းၶမ်းတင်းၼမ်။ ၶမ်း ၼမ်ႉၼၵ်းမွၵ်ႈ 1 ၸွႆႉ၊ ငိုၼ်း 7 သႅၼ် 2 မိုၼ်ႇပျႃး ။
ၼင်ႇႁိုဝ်တေတိလႆႈၵူၼ်းႁၢႆႉတင်းမူတ်းလႄႈ တႃႇတေလႆႈၶိုၼ်းငိုၼ်းၶမ်းၶူဝ်းၶွင်တင်းမူတ်းၼၼ်ႉ တေၶတ်းၸႂ်ၸွပ်ႇသွၵ်ႈၵူတ်ႇထတ်းထႅင်ႈယူႇ ဝႃႈၼႆ။
ၵူၼ်း 4 ၵေႃႉဢၼ်ၺႃးၶႃႈႁႅမ်တၢႆၼၼ်ႉတႄႉ ပေႃႈမႄႈပီႈၼွင်ႉလႆႈၽဝ်ၶၢပ်ႈတူဝ်မိူဝ်ႈဝၼ်းတီႈ 30/4/2019 တီႈပႃႇႁဵဝ်ႈၸၢဝ်းၶိူဝ်း ဝဵင်းတူၼ်ႈတီး။
