ၸုမ်းဢူၺ်းလီပွတ်းႁွင်ႇ 4 ၸုမ်း တင်း NRPC တေႁူပ်ႉၵၼ် ၼႂ်းႁၢင်လိူၼ်ၼႆႉ တီႈၸႄႈဝဵင်းမူႇၸေႊ လႅၼ်လိၼ် တႆး – ၶႄႇ။
ဝၼ်းတီႈ 30/04/2019 တေထိုင်ၼႆႉ ၸုမ်းဢူၺ်းလီပွတ်းႁွင်ႇ 4 ၸုမ်း မိူၼ်ၼင်ႇ တပ်ႉသိုၵ်းၶၢင် KIA တပ်ႉသိုၵ်းရၶႅင်ႇ AA တပ်ႉသိုၵ်းတဢၢင်း TNLA လႄႈ တပ်ႉသိုၵ်းၵဝ်ႈၵၢင်ႉ MNDAA တေႁူပ်ႉၵၼ်တင်း တူဝ်တႅၼ်း သုၼ်ၵၢင်ငမ်းယဵၼ်မႄး လီၼႂ်းၸိူဝ်ႉၸၢတ်ႈ NRPC တီႈၸႄႈဝဵင်းမူႇၸေႊ။
ၸဝ်ႈႁၢၼ် မၢႆးဢၢႆႈၵျေႃႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း လၢတ်ႈတီႈသိုဝ်ႇ DVB ဝႃႈ “ လွင်ႈတေႁူပ်ႉၵၼ်ၼႆႉ တေၵဵဝ်ႇ ၵပ်းပၢင်တိုၵ်း။ တေႁဵတ်းၸိူင်ႉႁိုဝ် ႁႂ်ႈပၢင်တိုၵ်းလူတ်းယွမ်း။ ဢၼ်လမ်ႇလွင်ႈမၼ်းတႄႉၵေႃႈ လွင်ႈပၢင်တိုၵ်းၶႃႈယဝ်ႉ။ တွၼ်ႈတႃႇ ပၢင်တိုၵ်းပေႃးတေလူတ်းယွမ်းၼၼ်ႉ ႁဝ်းၶႃႈ ၶပ်းၶိုင်ႁၢင်ႈႁႅၼ်းဝႆႉယူႇ” ဝႃႈၼႆ။
တွၼ်ႈတႃႇ ၶၵ်ႉၵၢၼ်လွင်ႈငမ်းယဵၼ် ၼႂ်းမိူင်းႁူမ်ႈတုမ် ပေႃးတေပဵၼ်ၵၢၼ် ၶိုတ်းဝႆးၼၼ်ႉ ယူႇတီႈၸုမ်းဢူၺ်းလီ ပွတ်း ႁွင်ႇ 3 ၸုမ်း မိူၼ်ၼင်ႇ ၸုမ်းရၶႅင်ႇ၊ ၸုမ်းၵဝ်ႈၵၢင်ႉလႄႈ ၸုမ်းတဢၢင်း တုၵ်းယွၼ်းထိုင် တီႈလူင်ပွင်ၸိုင်ႈၶႄႇသေ ႁႂ်ႈ ၶဝ်ႈၸွႆႈၶပ်းၶိုင်ပၼ် ၼႂ်းဝူင်ႈၵၢင်မၼ်း ဝႃႈၼႆ။
ၼွၵ်ႈလိူဝ်ၼၼ်ႉ ၼႂ်းၸႄႈမိူင်းရၶႅင်ႇၵေႃႈ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းရၶႅင်ႇ ပဵၼ်ပၢင်တိုၵ်း ၵၼ်ယူႇ။ တိုၵ်ႉမီးလွင်ႈၽိူမ်ႉထႅမ်ႁႅင်းသိုၵ်းထႅင်ႈယူႇ။ ၵဵဝ်ႇၵပ်းလွင်ႈၼႆႉ ယူႇတီႈ ၸုမ်းဢူၺ်းလီပွတ်း ႁွင်ႇ 3 ၸုမ်း တိုၵ်း သူၼ်းႁႂ်ႈၵိုတ်းတိုၵ်းၽႂ်းၽႂ်း သင်ဢမ်ႇၵိုတ်းၸိုင် တေႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ၼႆယဝ်ႉ။