ၸုမ်းဢူၺ်းလီပွတ်းႁွင်ႇ 4 ၸုမ်း တေ ႁူပ်ႉဢုပ်ႇတင်းလူင်ပွင်ၸိုင်ႈမၢၼ်ႈ မိူဝ်ႈလဵဝ်ၵၼ် ယူႇတီႈတၢင်းၾၢႆႇ လူင်ပွင် ၸိုင်ႈမၢၼ်ႈ တူၵ်းလူင်းလႆႈၸႂ်ဝႆႉယဝ်ႉ ဝႃႈၼႆ။

ဢူးသၢၼ်းဢွင်ႇ ၸုမ်းၸွႆႈသၢင်ႈလွင်ႈငမ်းယဵၼ် ၶၢင် (PCG) လၢတ်ႈတီႈသိုဝ်ႇၶၢဝ်ႇ 7 Day ဝႃႈ “ ယူႇတီႈ ၾၢႆႇ KIO တုၵ်းယွၼ်းဝႆႉ။ မိူဝ်ႈႁူပ်ႉၵၼ်ပွၵ်ႈပူၼ်ႉ ႁူပ်ႉထူပ်းၵၼ်ပဵၼ်ၼွၵ်ႈလႅၵ်ႈၵူၺ်း။ တေႃႈလဵဝ်ၼႆႉ တေႁူမ်ႈၵၼ်တင်း မူတ်းသေ ႁူပ်ႉမိူဝ်ႈလဵဝ်ၵၼ်။ ၵူၺ်းၵႃႈ လွင်ႈႁူဝ်ယွႆႈယႅမ်းတေဢုပ်ႇသင်ၵၼ်ဢၼ်ဝႃႈၼၼ်ႉ တေပႆႇၸၢင်ႈလၢတ်ႈ” ဝႃႈၼႆ။

ၸုမ်းၸွႆႈသၢင်ႈလွင်ႈငမ်းယဵၼ်ၶၢင် (PCG) ၼႆႉ ပၼ်ၸုမ်းဢၼ်ယူႇၼႂ်းၵႄႈဝူင်ႈၵၢင်ငူပ်ႉငီႉပၼ် တၢင်းၾၢႆႇလူင် ပွင်ၸိုင်ႈမၢၼ်ႈ၊ တပ်ႉသိုၵ်းမၢၼ်ႈ လႄႈ ၸုမ်းဢူၺ်းလီပွတ်းႁွင်ႇ ဝႃႈၼႆ။

မိူဝ်ႈဝၼ်းတီႈ 21/01/2019 ၼၼ်ႉ ယူႇတီႈၶွမ်ႊမသျိၼ်ႊငမ်းယဵၼ်မၢၼ်ႈတင်း KIO ႁူပ်ႉၵၼ်တီႈမိူင်းယုၼ်ၼၢၼ် ၸိုင်ႈမိူင်းၶႄႇ။ တီႈၼၼ်ႈ တူၵ်းလူင်းလႆႈၸႂ် တေႁူပ်ႉဢုပ်ႇၵၼ်ပဵၼ်တၢင်းၵၢၼ် ဝႃႈၼႆ။

ၸုမ်းဢူၺ်းလီပွတ်းႁွင်ႇ 4 ၸုမ်း ဢၼ်တေႁူပ်ႉၵၼ်တင်းလူင်ပွင်ၸိုင်ႈမၢၼ်ႈ မိူဝ်ႈလဵဝ်ၵၼ်ၼၼ်ႉ တေပဵၼ်ၸုမ်း သိုၵ်းတဢၢင်း TNLA၊ ၵူဝ်းၵၢင်ႉ MNDAA၊ ရၶႅင်ႇ AA လႄႈ ၶၢင် KIO ၸိူဝ်းၼႆႉ။

ၸုမ်းယိပ်းၵွင်ႈသိုၵ်းတဢၢင်း TNLA၊ သိုၵ်းၵူဝ်းၵၢင်ႉ MNDAA တင်း သိုၵ်းရၶႅင်ႇ AA ၼႆႉ လူင်ပွင်ၸိုင်ႈၼေႇပျီႇတေႃႇ ပိုၼ်ၽၢဝ်ႇဝႆႉဝႃႈ ပဵၼ်ၸုမ်းသုၵ်ႉယုင်ႈဢူၼ်ၵဝ်း၊ သၽႃးမိူင်းတႆးၵေႃႈယၢမ်ႈၵမ်ႉထႅမ်သေ ပိုၼ်ၽၢဝ်ႇမၵ်းမၼ်ႈပဵၼ် ၸုမ်းသုၵ်ႉယုင်ႈ ဢူၼ်ၵဝ်းဝႆႉ။