ၸုမ်းဢူၺ်းလီပွတ်းႁွင်ႇ 4 ၸုမ်း တေႁူပ်ႉတူဝ်တႅၼ်း လူင်ပွင်ၸိုင်ႈမၢၼ်ႈ ၼႂ်းႁၢင်လိူၼ်မေႊၼႆႉ ဝႃႈၼႆ။
ပေႃးထိုင်မႃး ဝၼ်းတီႈ 24-25/05/2019 ၸိုင် ၸုမ်းဢူၺ်းလီပွတ်းႁွင်ႇ 4 ၸုမ်း မိူၼ်ၼင်ႇ ၸုမ်းတဢၢင်း TNLA၊ ၵဝ်ႈၵၢင်ႉ MNDAA (ၵူဝ်းၵၢင်ႉ)၊ ၶၢင် KIA လႄႈ ရၶႅင်ႇ AA ၸိူဝ်းၼႆႉ တေႁူပ်ႉဢုပ်ႇတူဝ်တႅၼ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်း မၢၼ်ႈ ထႅင်ႈၵမ်းၼိုင်ႈ ဝႃႈၼႆ။
ဢူးတၢၼ်းဢွင်ႇ ၽူႈၶဝ်ႈၸုမ်းၾၢႆႇပွင်သၢင်ႈလွင်ႈငမ်းယဵၼ် (PCG) လၢတ်ႈဝႃႈ “ မိူဝ်ႈဝၼ်းတီႈ 30 လိူၼ်ဢေႊပရိူဝ်ႊ 2019 ၼၼ်ႉ ဝၢႆးသေ ပၢင်ႁူပ်ႉထူပ်းတီႈမူႇၸေႊယဝ်ႉၼၼ်ႉ တေဢၢၼ်းႁႂ်ႈမီးပၢင်ဢုပ်ႇဢူဝ်းၵၼ်ပွၵ်ႈၵမ်း 2 ။ တီႈမၼ်းတႄႉ တေပဵၼ်တီႈၾၢႆႇလူင်ပွင်ၸိုင်ႈတင်း တပ်ႉသိုၵ်းမၢၼ်ႈ လိူၵ်ႈႁႃ ဢဝ်သေတီႈၼိုင်ႈ တီႈဢၼ်ၶဝ်ၵႆႉၵႂႃႇမႃး။ ယိူင်းဢၢၼ်း ဝႆႉတႄႉ ပဵၼ်မိူင်းတႆးသေတီႈတီႈၵူၺ်း” ဝႃႈၼႆ။
ၸွမ်းၼင်ႇပၢင်ႁူပ်ႉထူပ်းဢုပ်ႇဢူဝ်း တီႈမူႇၸေႊ ၼႂ်းဝၼ်းတီႈ 30/04/2019 ပူၼ်ႉမႃးၼၼ်ႉ တင်းသွင်ၾၢႆႇ ဢမ်ႇမီးၽူႈ တႅပ်းတတ်းလႆႈလႄႈ မီးလွင်ႈၶွင်ႉၶမ်ၵိုတ်းဝႆႉယူႇ 2 ႁူဝ်ၶေႃႈ။ ပွၵ်ႈၵမ်းၼႆႉတႄႉ ယွၼ်ႉတေပႃးၽူႈတႅပ်းတတ်းလႆႈလႄႈ ၸၢင်ႈဢွင်ႇမၢၼ်ယူႇႁိုဝ် ဝႃႈၼႆ။
ၼင်ႇႁိုဝ် ၵၢၼ်ဢုပ်ႇဢူဝ်းလွင်ႈငမ်းယဵၼ် တေသိုပ်ႇၶိုပ်ႈၼႃႈၵႂႃႇလႆႈၼႆၼၼ်ႉ ၸွမ်းၼင်ႇတပ်ႉသိုၵ်းလူင်ပွင်ၸိုင်ႈမၢၼ်ႈ လႆႈပိုၼ်ၽၢဝ်ႇၵိုတ်းတိုၵ်းဝႆႉ ၶၢဝ်းတၢင်း 4 လိူၼ် သုတ်းသဵင်ႈၵႂႃႇမိူဝ်ႈဝၼ်းတီႈ 30/04/2019 သေ ၾၢႆႇတပ်ႉသိုၵ်းလူင်ပွင် ၸိုင်ႈမၢၼ်ႈၶဝ် လႆႈသိုပ်ႇယိုတ်ႈၶၢဝ်းယၢမ်းပၼ်ထႅင်ႈ တႃႇ 2 လိူၼ် တေႃႇထိုင် ၼႂ်းလိူၼ်ၵျုၼ်ႊသဵင်ႈ ဝႃႈၼႆ။
ၶေႃႈမုလ်း – BBC
လႅင်ႈၶၢဝ်ႇ – သီလႅင် ဝၢၼ်ႈၽုၺ်း ၵေးသီး
